Гордость — А. Белоглав
В світі стара єсть грішниця
И дуже шкодлива, —
Миллионам страшной біды
Она наробила.

От ней пошла перша война
Между ангелами,
Бо хотіла их зровнати
С Божыми силами.

И хоц она там програла,
И с неба скинена,
Але тут на землі она
Сильна и шалена.

Она творит всякы войны,
Нищит всьо и палит
И хоц сама Дуже глупа,
Все ся дуже хвалит.

Она двигат генералов
С чудными шапками,
А королей то возвышат
Понад небесами.

Епископы, кардиналы
В ней ся залюбили,
Они душу єй отдают,
Смиренность забыли.

И маленькы іегомосці
Ней ся потішают,
Дуже они всякы чачка
На себе вішают.

Але она их загублят,
Славом их чарує, —
Она не зна будувати,
Она лем руйнує.

И Наполеону она
Ногу подставила.
Славу, царство обіцала,
Потом загубила.

А за Дуче и Фюрера
Не єсть и бесіды,
Она так их загладила,
Што пропали сліды.

Тысячу літ пануванья
Им о біцувала,
И хоц они уж пропали,
Она ся остала.

Теперь тоже всякым другым
Головонькы крутит,
Они собі так думают,
Што лем с ними шутит.

Але она єсть циганка,
Она всіх обмане,
И всі, котры єй слухают,
Жиют, як погане.

И где тилько заглянути,
Всюда гордость, пыха...
Але лучше — перестану
Споминати лиха.


А. Белоглав,
Шелтон, Конн.



[BACK]