В житью нашом так быває,
Што при новой зміні года
Человіку так ся здає,
Же каждому єсть нагода
Стары гріхы закопати
И жизнь нову начинати.

Но то иншы суть порядкы
В земном житью меже нами,
Каждый свои недостаткы
Разом с добрыми ділами
Постоянно с собом носит,
в Новый Год их переносит.

Што зроблено в старом году,
В новом с тым мушено жити,
Бо не можна стару шкоду
За дверями оставити,
Ани стары рокы діда,
Ани долгы у сусіда.

Иде так и политика
В світі меже народами,
Грызня мала ци велика
Стоит рокы за роками,
Бо зла легко натворити,
Но зло тяжко направити.

Мы прекрасно о том знаме,
Але нашой Америкі
С Новым Годом все-ж желаме
Полной зміны в политикі,
Штоб свой “колд вор” раз забыла,
В старом року го лишила.