Золоты Юбилеи — Николай Цисляк

Лемкы физично належат до здорового племени. Хроничны хвороты, котры переходят с рода в род, с покоління на поколінне, котры трудно лічити, а котрыма страдают жители навет найздоровшых климатов — меже лемками были незнаны. Процент переживающых понад сто роков меже лемками не был высокий, но зато лемкы солидно доживали понад 80 до сто роков свого віку. Высока смертность меже молодыми лемками от выпадковых причин существовала лем через брак докторской помочы.

Тото крепке здоровье, одідичене по своих предках, лемкы принесли зо собом и в Америку. Доказом того можут послужити факты, што велике большинство лемков працували по майнах и фабриках на найтяжшых роботах, шкодливых людскому здоровью, а и так оставили по собі замічательный рекорд: они выробили по сорок и пятьдесят літ и не стратили ани одного дня роботы за цілый тот час на рахунок свого здоровья. Такий правдивого подиву рекорд за лемками найдете, где лем пойдете.

Благодаря тому мы днеска являємеся свідками многочисленных праздников 50-літных юбилейов супружества меже нашыми краянами в Америкі. Хоц наша организация Лемко-Союза в членстві процентово до нашой емиграпии маленька окрушина, а и меже нашыми членами єсть много, котры празднуют 50-літия свого супружества, и начинают нову 50-тку в добром здоровью и крепком настронии. Для приміра приведеме историю житья такых краянов, котры за послідны рокы праздновали свое 50-літие супружества тут у нас в Кливланді, хоц о всік юбилеях мы анй не знаме, бо не всі члены выходят с тым наверх, лем што діти часом выкрыют дату супружества своих родичов.




Члены отділов Лемко-Союза в Кливланді горды на то, што меже ними находятся члены-пионеры, котры закладали нашу организацию, хоц одны больше другы меньше трудилися, бо то залежало от сознательности и другых обставин, в якых нашы люде находилися. Они гордятся, што можут праздновати и веселитися в их честь, бо теперь такых юбилейов што раз меньше меже людьми. Не лем што не доживают до 50-літного юбилею, но теперь настає мода розводов, и гдекотры до 50 літ свого житья женаты два и три разы. А тут єсть доказ не лем солидного здоровья у нашых лемков, но и признак морального выхованья нашого народа, за котре мы тоже высоко гордимеся. Всім нашым юбилянтам от щирости душы выражаме найлучшы пожелания всіх благ, штобы счастливо доживали свой золотый вік и своима порадами помагали нам в дальшой организацийной роботі. Их пионерскы приміры мы будеме честно наслідувати.


Николай Цисляк.



[BACK]