Так Судьба Рішила — Йосиф Фрицкий
То правда, же Гриша с Евком
ся не любили,
А силом родиче обоих
поженили.
Казали в стан супружеский
зараз ставати
На вірность и любовь досмертну
присягати.

В церкви то было, — они
клячали,
Люде молились, пісни
співали,
Священник кольца на пальцы
вложил,
Три разы вколо столика
водил.

А по вінчанью, як с церкви
вышли
И под музыком до дому
пришли,
Староста свадьбы рюк
в проповіди,
Як Бог створил на світ
двое люди.

Был Адам, потом была
и Ева,
А так дошол до того
дерева,
С котрого яблочко
они зъіли
И тяжко пред Богом
согрішили.

Гостились люде — добре
попили
И молодятам красно
жичили:
“Любіться, діточкы —
голубята,
А буде достаток —
полна хата.”

На жаль великий вышло
иначе:
Бо Евка суміна и тихо
плаче.
А потом судьба так им
рішила,
Што раз и на все их
розлучила.

Выіхал Гриша сам аж
за море
Заробить грошы, забыти
горе.
А жену оставил
газдувати,
Но маму просил єй
дозерати.

И правда, мати там
дозерала,
Што зле где виділа, —
напоминала:
“Невістко моя, дуже
гуляєшь,
А ты выдана и мужа
маєшь.”

Невістка мамы мало
слухала,
Где лем ся дало,
собі гуляла.
За много было того
гулянья, —
Як с неба гром — народился
Ваня.

И мати пише: “Дорогий
сыну,
Доношу тобі таку
новину,
Што жена твоя ся
догуляла,
Дітину тобі сама
придбала.”

От мамы письмо Гриша
получил,
Новину читат, очы
выпучил.
И в чувствах своих барз
ображеный
Он пише гнівно
до свойой жены:
“Несчастна ты и во вік
проклята,
Най тебе похлоне
земля свята,
Я в майнах тяжко роблю, —
гарую,
А с краю за тебе таке
чую.”

Поіхал Гриша попу
сказати,
Порады просил, што тут
почати.
Смієся поп, встає
от столика
И каже, што кривда
не велика,
Бо жена може так
согрішити,
И Бог казал гріхы
отпустити.

Но Гриша каже: “Але я
знаю,
Же Бог зараз выкинул
с раю,
Як Ева нарушила
законы
И против Господньой
забороны
Урвала ябко с того
дерева
И мужа до гріху ще
привела.
А вы тут кажете всьо
забыти
И мойой Еві гріхы
простити!”

Но поп отвітил на
тоты слова,
Же была там вина
Адамова.
Бо муж за жену все
отвічає,
И сам винен, як не
доглядає.

Гришовом бідом тішились
люде,
Ворожили, што с ним теперь
буде,
Бо люде не видят уж
в том гріху
И с чужой біды мают
потіху,

А Гриша носит свою
турботу,
До житья навет стратил
охоту,
Лем ходит такий все
засмученный,
И в чорной жалобі
углубленный.

С думками тыми сіл он
под стромом
При малой річкі зараз
за домом
И слухат, бо якось так
выходит,
Же сама річка йому
говорит:
“Грицуню, не треба
сумувати,
Суть ишны дівкы, мож
счастье мати.
Молодость твоя скоро
минає,
А што минуло, уж
не вертає

Но Гриша не мог дуже
думати,
Лем очы закрыл и стал
дремати.
Так оно часто в житью
быває,
Где ніт духа, там судьба
рішає.


Йос. Фрицкий,
Ровей, Н. Дж



[BACK]