Бизнес

Нью Йорк єсть найбольше бизнесове місто Америкы. Но бизнесы бывают розмаиты и бизнесмены всякого рода.

До юивелирного штору Макса Фридмана в долішньой части Нью Йорку пришла молода пара — обоє парадно убраны, деликатны и гречны. На око можна было зараз повісти, што они заручены и хотят купити обручальне кольцо. Они то подтвердили, што так єсть: будут женитися, то молодый мужчина хоче допасовати диаментовый перстень на палец свойой возлюбленной.

Макс показує им свой товар. Он познал, што тоты молоды люде из больше заможной кляссы, то и товар показує по их кляссі. Дівчина пробує один перстень, потом другий. Наконец выбрала один, вложила на третий палец лівой рукы и любуєся. Диамент блестит, як ярка звізда. Но поглянула на карточку с ціном: там было зазначено $900.00. Дівчина обернула очы на свого компаниона, як бы хотіла спроситися, ци то не за дорого.

— Йес, моя голубко, — отвітил, усміхаючись, молодый человік, — нас стати на такий перстень.

Так они згодилися, што берут тот диамент. Но молодый мужчина говорит до Макса:

— Тут треба буде трохи втяти, штобы пасувало лучше, бо он трошечки за великий, так може я оставлю вам депозит — скажме: 100 долларов, а за тыждень мы придеме и росплатимеся.

— Файно, дуже файно, — сказал задоволенный такым бизнесом Макс.

Он принял 100 долларов и дал им росписку. Молодята взялись под ркуы и вышли. Макс смотріл вслід за ними и ище вздохнул: “О яка то крас пара залюбленных молодых людей!”

За тыждень они пришли. Макс был один в шторі. Он вынял из сейфа готовый перстень, дівчина вложила перстень на палец и воскликнула радостно:

— О яка красота!

Протягнула руку и крутила ньом, а блеск диаменту як бы танцувал в очах нареченого.

— А допасованый добре на палец? — спросился ище молодый человік.

— Лучше ани не може быти! — отвітила радостно дівчина.

— Ол-райт, — сказал молодый человік и сягнул быстро руком до бочного кармана. Потом обернулся до Макса и уж цілком зміненным — холодным, суровым тоном проговорил:

— А теперь докончиме тот бизнес чым скорше...

Макс смотрит, а тут автоматичный пистолет наставленый до його груди. Молодый человік ище сказал сухо:

— Притом я хочу свой депозит... Обернися назад!

Макс обернулся, а молодый мужчина вытяг йому из заднього кармана пулярес, в котром было 280 долларов. На предлавку была выставлена женска годинка на руку вартости 30 долларов, то и тоту годинку переложил спокойно до свого кармана.

— А ты идий туда до задньой комнаты! — скомандовал молодый мужчина Максу и поднял выше пистолет. Свойой товаришкі кивнул головом, штобы ишла к дверям.

Макс исполнил послушно, што было йому приказано. Но як переходил мимо задньой шафы, то рушил алярмовый свич, соєдиненный с агенциом детективов, котра мала протекцию над бизнесом Макса. За пару минут детективы и полиция были уж на місци. Но молода пара уж вышла из штору и смішалась с уличном толпом. Як далеко видно, улица была полна народом. Посмотріли на то детективы, посмотріл и Макс и махнул руком. Детективы вернулися до свого офису, а Макс до свого штору чекати на новых костумеров.




[BACK]