Иван и Розалия Барна

Иван и Розалия Барна, John and Rosalia Barna
Розалия и Иван Варна.

Отділы Л.С. в Кливланді, при помочы Петра и Теодосии Дзвончиков, враз с дітьми устроили 50-літие супружества в честь Ивана и Розалии Варна 5 мая 1952 року. Иван Варна родился 5 июня 1876 року, в селі Кункова, Горлицкого повіта, на Лемковині. До Америкы выбрался 19-літным хлопцом в 1895 року, в майнерску містность в Пеннсильвании Джексбург, где стал на роботу в майнах.

Жена його Розалия, донька Афтана Цапинского, из села Ліщин, сусідного села и с под одного звона, родилася 26 декабря 1885 року. Ліщиняне, подобно Новичанам, ходили по світу зо своими выробами, с лампашами, подсвічниками и шибами, а часть, подобно як всі лемкы, ходили на жнива в Мадьярщину. Из выходцев на жнива и торговцев в Мередьгазі, в Мадьярщині, установилася маленька лемковска колония. Так и родиче Розалии переселилися в тоту колонию, и єй 4-літном дітином взяли зо собом в тоту чужу краину, где она выховалася аж до свого выізду в Америку в 1899 року. Тут она познакомилася с близкым краяном Иваном Варна и 6-го мая 1902 року в Лайферинг, Па., повінчалися.

Послі 7-літного житья в Пеннсильвании, они поселилися знов при майнах в Вулф Рон, Огайо где прожили 14 літ, послі чого переселилися в город Кливланд, штобы помочи дітям достати высше образование. Розалия утримувала дом, а Иван іздил на долгы периоды часу до роботы в майнах на Вулф Рон, О. Их житье было увінчане красном родином, бо выховали и выобразовали 4 сынов и 4 донькы. По порядку они родилися так: Стефан, Анна, Мария, Иван, Петро, Розалия, Михаил и Юлия. Найвысше образованным єсть сын Петро, котрый за долгий час был завідующым трьох великых заводов Томсон Продуктс, а теперь єсть президентом одного из Пекард заводов в Детройті. До часу их 50-літного юбилею у Барнов было 19 внуков.

Початкы Лемко-Союза сильно связаны с именом Розалии Варна, бо яко сознательна лемковска жена она приняла программу Лемко-Союза за свою народну и много потрудилася в трудных организацийных початках, в часах затяжной кризы, в яку попала тогдашня Америка. Она належит до числа членкинь-основательок и на пару заводов служила женскому отділу предсідательком. В знак благодарности за добре выхованье родины, діти их три рокы тому назад набыли своим родичам новый домик в недалеком от кливланду Стронгсвилл, где Варны проживают в спокою свой преклонный золотый вік.


Николай Цисляк.



[BACK]