Историчне Торжество

Минувшого 1954 року исполнилося 25 літ от основания отділов Лемко-Союза, народной и культурно-просвітительной организации, рождение котрой змінило напрям житья и историю лемковского народа. Сознаючи важность успіхов и прогресса, сділанных нашом организациом, отділы Лемко-Союза в Кливланді устроили в том року особливе торжественне чествование 25-літного юбилею. Празднование отбылося не в день основания отділа, бо отділ был завязный 24 марта 1929 року, а 4 сентября, под праздникы американского Дня Труда, штобы дати можность ширшым кругам нашого народа приняти в нем участие. Наше чествование в Кливланді вышло ище больше торжественно тому, што подчас него была совершена церемония “паления” долгу на красивой Народной Будові містных отділов Л.С. Через совпадение тых событий торжество носило на собі печать историчного значения.

История кливландскых отділов, мужского ч. 6 и женского ч. 1, єсть дуже важном частьом истории цілого Лемко-Союза, бо тут были покладены основы Лемко-Союза, тут отбылся первый Лемковский Съізд, заложена редакция и типография органа “Лемко”, и тут была перва обытель Главного Правления Лемко-Союза. В виду того история Лемко-Союза не може обыйтися без истории кливландскых отділов, котры и послі переноса Главного Правления на Восток С. Ш. Америкы проявили дальше громадну енергию при здобытии Народной Будовы и в ведении культурно-просвітительной діятельности среди нашого народа.

Правдом єсть, што гдекотры передовы лемковскы селения в Америкі мали свои организации народного характера ище перед 1929 роком. Але тоты организации не знали за себе, и кажда из них мала иншу программу. Основы нашой организации Лемко-Союза были заложены 9 января, 1929 року, в городі Виннипегу, Канада. Основатели Первого числа Л.С. уложили программу и объявили єй в газеті “Лемко”. Их программа была так ясна и говоряща до сознания каждого лемка, што существующы лемковскы организации приняли єй за свою и быстро примкли к Лемко-Союзу, а за ними и містцевости, где не было лемковскых организаций, начали организовати отділы до Лемко-Союза. Основание Первого отділа Лемко-Союза было як бы сигналом для нашой лемковской колонии в Кливланді. Отділ Л. Сюза ч. 1 был заснованый 9 января, а 24 марта того самого року уж основался отділ Л.С. ч. 6 в Кливланді. Основательне собрание отбылося в школі при Русской Прав. церкви, што на Старкведер. Урядниками отділа были избраны Михаил Баволяк, предсідатель, Прокоп Русиник, секр., и Афтанасий Ардан, кассир. Почетным предсідателем был избраный о. Капанадзе. В первый рок записалося до отділа 155 членов. Запримітивши велике заинтересование свойом народном организациом в Кливланді, бывший редактор “Лемка” Димитрий Вислоцкий посітил Кливланд літом, где на пикниках он встрітил массу нашого народа. Як передают, он мал заявити: “Столицом Лемко-Союза буде город Кливланд”. Он начал деятельность в напрямі створения тут редакции. Были то часы затяжной кризы и безроботья, так и начата робота в том напрямі была дуже трудном. Вырентовано поміщение под редакцию под ч. 2490 Профессор евню. Закуплено машинерию на выплату. Містны лемкы жертвовали што могли, устроювали всякы предприятия, помагали в роботі. Нашлися и такы, котры дали большы пожичкы на выплату машинерии и удержание редакции. Настигала велика потреба сознвания Лемковского Съізда, котрый и был созваный 11 февраля 1931 року, и котрый отбылся в Менникер Голл (угло Вест 10-ой улицы и Джефферсон евню). Понеже в тот час Лемко-Союз не посідал свого устава, то на тот съізд мог прийти каждый, кто интересовался судьбом Лемко-Союза. Явилися передовы члены из 11 отділов, но разом с ними пришло много выходцев из В. Галичины и бывшой России. Гдеякы из них пришли в надіи розбити Лемко-Союз, а не будувати. Тот съізд напоминал собом больше публичне віче, як съізд организации. Аж по закрытии того “віча”, коли на гали осталися лем тоты, котрым лежала на сердци судьба Лемко-Союза, был прочитаный и принятый Статут организации и выбраный Головный Уряд Л.С. Первыми Головными урядниками были выбраны містны люде, бо издание газеты потребувало близкой опікы. Предсідателем был избраный Михаил Баволяк, Ф. Секретарем Стефан Ткач. Кассиром Юлиян Федак. Штобы вести діла организации по закону, организация должна быти зарекордована и. получити чартер на свою роботу от штатных властей. Но штобы получити чартер, организация должна предложити призначенне число членов и отділов. Так одным из важных постановлений того съізда было рішение организовати женскы отділы до Лемко-Союза, котре предложила Мария Телех. Рішение было успішне, бо до сего часу не было в моді женам ставати членкинями клубов враз с мужчинами. Мария Телех не лем дала предложение на съізді, але сейчас послі съізда организовала первый женский отділ до Лемко-Союза. Она и стала первом предсідательком отділа, Ева Штельма — секретарком и Варвара Крестинич — кассирком. Основание женскых отділов причинилося до то го, што скоро послі того Лемко-Союзу удалося получити чартер огайского Штата на организованна отділов на всі Соєдиненны Штаты и Канаду.


Ceremony
Церемония паления моргичу на новом Народном Домі Лемко-Союза в Кливланді: Урядникы отділов Л. С. палят выплаченны долговы документы в присутности Головного Предсідателя Л. С. Василия Вархоляка, на торжестві 25-літнього юбилею Л. С. 4 сентября 1954 года

Другий Лемковский Съізд, котрый отбылся через год в городі Питтсбургу, уж был названый первым организацийным съіздом, бо был проведеній по всім правилам организации, и на нем явилися законны делегаты от отділов из многых штатов — Огайо, Мичиген, Пеннсильвании, Нью Джерзи, Нью Йорку и Коннектикот. На том съізді организация стала на свои ногы. Съізд рішил перебрати типографию и издательство газеты на организацию, и делегат Антон Цисляк, из Стемфорд, Конн., был избраный менажером типографии Лемко-Союза, послі чого он переселился до Кливланду.

За весь тот час члены кливландскых отділов працували для организации тяжко и вытревало. Собрания своих отділов и забавы в пользу свойой газеты и организации устроювали по домах своих членов, потом в рентованом тісном поміщении на 11 улиці и Джефферсон евню. Аж в 1935 року отділы купили старый сусідский театр под ч. 1205 Старкведер, где устроили свое клубове приміщение и мали больше містця на собрания и на пробы представлений. Тым часом организация кріпла и показалася велика потреба приняти другого редактора, не лем для издательской роботы, но и для лекций по отділах Лемко-Союза. В редакцию был добраный д-р С. Пыж. В Кливланді выдавалася не лем газета “Лемко”, але и настольны календари што-рочно, поучны и театральны книжечкы, а в маю 1933 року начал выходити и місячный журнал для молодежи “Лемко-Журнал” на английском языку.

Послі нескольколітной издательской и организацийной роботы показалося, што на Востокі, в околиці Нью Йорка, организовалося велике множество новых отділов, котры потребували барже штоденной помочы и опікы Главного Правления Л.С., котру с Кливланду трудно было подавати. Так по рішенню Олифантского Съізда, на початку 1936 року, перенесено до Нью Йорку типографию Л.С. Кливландскы отділы остали осамотнены от діятельности, котру они навыкли вести. Они остали осамотнены, але не загублены. Своими силами и своим знанием вели свои діла и выполняли всі потребы народны, на котры съізды звертали увагу. Тиха и вытревала робота кливландскых отділов увінчалася наконец успіхом. О десять літ послі покупкы першого и тісного приміщения на Старкведер, им удалося купити величавый и красивый дом под ч. 2337 Вест — 11 улиця, с отповідным клубовым поміщением, комнатом на собрания, с великом гальом на концерты и предприятия, с обідным залом, кухньом и комнатами на дві семьи. Официальне открытие народной будовы отбылося 29 января, 1949 року, в присутности Гл. Секретаркы Л.С. Анны Чачо и членов Гл. Правл. Ярослава Кобана и Анны Конончук. Кливланд наново засіял славом на всю Америку.


Anna Chacho
Торжественне открытие нового Народного Дома Лемко-Союза в Кливланді 29 января 1949 года: Головна Секретарка Л. С. Анна Чачо произносит головну бесіду в присутности членов Головного Правления Ярослава Кобана и Анны Конончук и другых гостей.

Но в самых отділах не было счастливого житья. За старый клуб, котрый продано американскым ветеранам, немож было выплатити ани половину новопокупленной будовы, а впереди были ище большы выдаткы на поправкы. Члены дали пожичкы, кто сколько мог, одны больше, другы меньше. С того заводилися часты непорозуміния меже членами, якы заходят меже шерголдерами. Котры не успіли дати пожичку на час, уважали себе страченными и от будовы и от организации, За зміну ситуации взялся тогды Ф. Секретарь Йосиф Дзямба. Он предложил членам зворот пожичок на счет общой пожичкы из кассы Гл. Правления Л.С. Предложение было розумне, но провести його в житье потягло за собом много труда, непорозуміний и неприятностей. Предложение было завершено, члены згодилися, и делегаты кливландскых отділов на 14-ом Гол. Съізді в Ансонии, в сентябрі 1948 року, просили Гл. Правление о пожичку $8,000.00, што им было признано и дано.

Діла финансовы приходили к порядку, но культурна робота в отділах была совсім занедбана майже от часу ухода редакции из Кливланду. За поправку ситуации принялся тот же Йосиф Дзямба. Увидівши, што ніт под руками человіка, котрый мог бы повести культурну роботу, он начал розглядатися за ним в околиці Нью Йорка. Літом 1949 року он упросил менажера К.Р.А. Центра в Юнкерс Ярослава Кобана переселитися до Кливланду на пост Менажера Л. Клуба. Ярослав Кобан согласился, но по трехмісячной роботі оставил Кливланд и вернулся на свою роботу в Юнкерс. Он наклонил знаного с народной діятельности Николая Цисляка из Нью Йорка обняти менажерство Народного Дома в Кливланді, котрый переселился тут в осени 1949 року.


AmLegion
Продажа старого Народного Дома Лемко-Союза в Кливланді:
Кассир отд. Л. С. ч. 6 Илья Владыка передає легальны паперы коменданту Американского Легиона, стан. 577, Биллу Мураду и аДъютанту Вильяму Паноскому, в ноябрі 1946 года. На торжестві 25-літия Лемко-Союза в Кливланді 4 сентября 1954 года: Члены комитета мужского отділа Л. С. ч. 6 и женского отділа ч. 1 с Головным Предсідателем Лемко-Союза Василием Вархоляком.


Стычка Николая Цисляка с членами кливландекых отділов и другыми лемками привела к великым змінам в народном житью. За послідных пять літ в Кливланді поставлено цілый ряд славных представлений из обычайов и штоденного житья нашого народа. Представления ставилися не лем в свойом народном Домі, но и в другых містностях, включаючи Питтсбург, а в остатны два рокы Лемковский Драм-Кружок уж был запрошеный до участия в междунациональных фестивалях в Поблик Аудиториум, где нашы выступления принесли Лемко-Союзу и лемковскому народу велику славу. Кромі того, и финансова сторона выгладилася. Дом перешол великы поправкы, запроваджена модернизация, долг не лем выплаченый, але в кассі отділа уж єсть красна сумма, ускладана на початок покупкы новой институции для организации. Так што коли в осени минувшого року 1954 отділы Лемко-Союза в Кливланді праздновали 25-літный юбилей в присутности Гл. Предсідателя Л.С. Василя Вархоляка, то разом с тым была завершена церемония паления “моргичу” на Народном Домі. 25-літный юбилей был найрадостнійшым праздником за всю историю нашых отділов в Кливланді, а заразом и дуже важным дньом народных достижений.


ComMem
На торжестві 25-літия Лемко-Союза в Кливланді 4 сентября 1954 года: Члены комитета мужского отділа Л. С. ч. 6 и женского отділа ч. 1 с Головным Предсідателем Лемко-Союза Василием Вархоляком.

По поводу того радостного для нас события на містци буде упомянути имена тых членов, котры занимали уряды в отділах за послідных 25 літ.

Предсідателями были: Михаил Баволяк, Иван Кацань, Андрей Лабик (на пару заводов), Петро Волошинович, Афтанасий Ардан, Дмитро Фаль, Николай Кобеляк, Дерофтей Ковальчик, Йосиф Дзямба.

Місто-Председателями: Тимофтей Гамбаль, П. Волошинович, Теодор Калина, Петро Дзвончик, Игнатий Барна, Сидор Співак, Григорий Крестинич.

Рек. Секретарями: Прокоп Русиник. Стефан Ткач (на пару заводов), Михаил Сосенко, Михаил Сипляк, Йосиф Дзямба.

Кассирами: Афтанасий Ардан, Дмитро Дмитрии, Петро Дзвончик, Илья Владыка и Василь Рогач.

Фин. Секретарями: Игнатий Барна, Николай Кобеляк, Нестор Кліщ и Йосиф Дзямба.

В Контрольных Комитетах: Василий Квочка, Илья Владыка, Михаил Сипляк, Михаил Сосенко, Петро Хомик, Игнатий Барна, Николай Кобеляк, Петро Цига, Андрей Борик, Андрей Майхрич, Митро Барна, мол., Петро Ткач, Анна Скуба, Иван Владыка, Григорий Крестинич, Иван Шпрох и Стефан Мориляк.

В женском отділі ч. 1 Предсідательками были:

Мария Телех, Розалия Барна, Анна Циркот, Анастасия Томащик, Акиля Барна. Гдекотры из них занимали уряды на пару заводов, другы урядували ряд літ.

Секретарками были: Ева Штельма, Йоанна Скуба, Пелягия Сипляк, Йоанна Стачук.

Кассирками: Варвара Крестинич, Юлия Дмитрик, Мария Штельма, Анна Венгрин, Мария Барна и Мария Телех.

Жены в Лемко-Клубі сограли громадну роль. В мужском отділі заходили непорозуміния, або показувалася недбалость, то жены в тот час тримали три угла свойой организации и упоминали членов мужского отділа, указуючи им их недостаток.

Найвысшыми ділами в послідных роках в истории нашых отділов на все останутся слідуючы: покупка Народного Дома под предсідательством Андрея Лабика; позванье Николая Цисляка на пост менажера, под предсідательством Николая Кобеляка; сплата долгу на Народном Домі, под предсідательством Дерофтея Ковальчика. Йосифу Дзямба, яко предсідателю мужского отділа припала велика честь палити моргич на Домі, бо он был як бы правом руком всім трьом председателям в завершении тых историчных дат. Так с концом 1954 рока мы закончили перве наше 25-літие народной діятельности и теперь с новым 1955 роком начинаме историю нового 25-літия.


Член Л.С.


[BACK]