Религия и Житье

В отношении до житья єсть глубока розлука меже кальвинистами и католиками.

Джон Кальвин, один из головных религийных реформаторов в Западной Европі 16-го столітня и один из основателей протестантской религии, был антикатолицкым проповідником в Парижі, где позыскал собі велику популярность. Выгнанный из Парижа, он переселился в Швейцарию, в Женеву, где продолжал проповідь религийного протеста против римско-католицкой церкви и римского папы.

Протестантство, основание на учении Кальвина, было названо кальвинизмом, в отличие от лютеранства, основанного на учении другого религийного реформатора — Мартина Лютера, дійствовавшого в німецкых краях. На кальвинизмі оперты пресвитерианскы церкви в Америкі, основанны выходцами из Шотландии (“скачмены”), и конгрегациональны церкви в штатах Новой Англии (английскы пуританы).

Сам Кальвин любил добре поісти, выпити, повеселитися. Он говорил, што то не противится Богу. Вірующий человік повинен трудитися, набывати богатство и добре жити, бо богатство єсть от Бога. Бог любит трудолюбивого человіка и помагат му стати богатым.

Католицка религия не єсть против богатства, но она каже отдавати богатство Богу, то-єсть церкви. Бог дал богатство человіку, то треба отдати його назад Богу, а не уживати на житьовы выгоды. За то в католицкых краинах было и єсть полно богатых церквей, монастырей, а просты вірующы люде суть бідны. При кальвинизмі вірующы люде получали заохоту братися до индустрии, будувати фабрикы и заводы и добиватися богатства и лучшого житья тут на землі.




[BACK]