Нашы Горы — А. Белоглав
Достал “Карпатску Русь”, —
Читам, як читанку:
На одной стороні
Находжу співанку,
На иншой стороні
Один описує,
Як на стары рокы
В чужині бідує.
Иншому на мысли
Стародавны страхы,
Другых с родной земли
Звыганяли ляхы.

Тай и дива неє, —
Газета лемкова,
И он до ней пише,
Не жалує слова.
Як смуток перейде,
То пише пісеньку,
Так и я напишу,
Хоц лем коротеньку.
Хоц она и буде
Мало романтична,
Но але лемковска,
Народно-типична,

Горы мои, горы,
То мои коморы;
Бучкы и яличкы,
То мои світличкы.
Сховам до коморы,
Што на завтра треба,
Оно ся так придаст,
Як бы впало с неба.
И большы коморы
Дам сой пристроити,
Бо на случай біды
Я можу в них жити.

Най сой дує вітер,
Най буря бушує,
Кто в доброй коморі,
Тот біды не чує.
Але до коморы
Дам всьо позносити,
А як свого не мам,
Мушу докупити.
Бо стереженого
И Бог захранює,
А марнотравному
Біда в очы клює.

Роскішникы страшні
Біды сой глядают,
И она их чекат,
Но они не знают.
Все што в руках мают,
Хотят змарнувати,
Не знают и дітей
Своих шанувати.
И пышны співанкы
Они выспівуют
И в царскых палатах
Жиют и ночуют.

Но але даколи
Бракне той доброты,
Не буде богатства,
Навет и роботы.
То они не видят,
Бо заперли очы,
Они так блукают,
Як бы в темной ночи.
А стереженому
Біда все на мысли,
Бо от старых плачов
Очы му не высхли.

Тай за то он ховат
Вшитко до коморы
И комору ховат
Под великы горы.
А горы покрыты
Древнима лісами,
И коло них ходит
Отец зо сынами.
Гора моя, гора,
Ты велика мати,
Ты мене родила,
Ты будешь спасати.


А. Белоглав,
Шелтон, Конн.



[BACK]