Наш Обычай
Повідали в старом краю
Нашы старшы люде,
Што человік обычайов
Своих не забуде.

То єсть правда, не думайте,
Правда справедлива.
Бо и я тых обычайов
До гнес не забыла.

Бо лем взяти си, напримір,
Великодны свята,
Як чекали, тішилися
Всі нашы дівчата.

Не лем за то, што зберутся
До стужок, корали,
А и за то, же си будут
Писанкы писали.

Ой были то обычаи
Найкрасшы на світі
И за то их не можеме
Николи забыти.

В каждый тыждень Великодный
Писанкы пишеме
И за край рідный, милый,
Си бесідуеме.

Же юш мы там не будеме
Писанкы писати,
Лем бы треба тот обычай
Тут не занехати.

Написати тут писанок,
Тай их роспродати,
Тоты грошы, якы придут,
На Пресс-Фонд выслати.

И мы обі зо сусідов
Добри роздумали,
Написали сме писанок
И всі роспродали.

Приходили по писанкы
Всі знайому жены,
Помагали продавати
Нашы бизнесмены.

Помогла нам продавати
И Вовчко Гелена,
Не жалувал свого часу
И мистер Мерена.

Іздил с нами свойов каров,
Де лем мы кликали,
Лем жебы сме як найбільше
Писанок продали.

Ту мы обі всім им за то
Красно дякуєме,
На другий раз, як дождеме,
То не забудеме,
Же писанкы барз хотіли,
Більше напишеме.




[BACK]