То было дуже давно, коли ище люде и звірята могли розговоритися меже собом. Один газда мал пса, но тот пес мал хвост кудлатый от конца до конца, то господарь не любил свого пса, не давал му істи, так пес не мал силы брехати. За то господарь отогнал го от хижы.

Так пес пошол глядати живности по лісі. Ходит там и ходит, але не нашол нич и вышол змученый на поляну. На той поляні сидит волк и роззератся, ци бы ся му дашто не трафило зъісти, бо был голоден, та и пришол к тому псу и му повідат:

— Я тя зъім, бо-м барз голоден.

А пес повідат:

— Та што с мя добудешь, кедь лем сами кости?

Волк попризерался на него, тай повідат:

— То правда, же-с барз худый, але як хочешь, то будешь тлустый.

— Та я хочу быти тлустый, — повідат пес.

— А як так, то добри. Твой газда має овцы, то я там приду сей ночы по овцу, а ты будешь барз брехал, и мя отженешь.

И так ся стало. Пес волка отогнал. Газда вышол надвір, што таке, бо пес так давно не брехал. Вышол за стодолу, а волк втіче. Вернулся газда до хижы и повідат жені:

— Бабо, та мы маме доброго пса, лем треба го добри годувати, бо бы овца нам пропала.

Тай зачали му давати хліба с молоком, и пес зачал тлустнути. О пару місяцев пес стал гардый и моцный, тай зас пошол до ліса на тоту саму поляну. И самый тот волк там сидит.

— Ну та тераз я тя зъім, — повідат волк, — бо вижу, же-с тлустый и выпасеный.

А пес повідат:

— Кебы я ся ти дал?

Волк голоден был, тай до пса, а пес выскочил волкови на хирбет и го пожер моцно. Волк отступил и повідат:

— То за то, што я тя добри дорадил, ты мя так пожер. За то теперь будеме мати войну.

И волк оповіл псови, где ся будут бити, в котром лісі и в який день. Так ся розышли и начали приготовлятися до войны. Волк взял собі до помочы медведя, а пес си взял когута, и кота, и качку. И так идут на тоту войну.

Волк каже медведьови выйти на найвысшого дуба, жебы виділ с далека, яке войско пес веде. Медвідь пошол на дуба и позерат. А там уж иде тото войско: пес наперед, когут за ним, за когутом кот, а за котом качка. Волк звідуєся, ци уж идут.

— Идут, идут, — повідат медвідь.

— Та як выглядат тото войско? — пытатся волк.

— Дуже страшне войско, — повідат. медвідь. — Пса познам, а другых не можу ани познали. То пес иде наперед, а за ним якаси чударна створа, котра має велику копию зозаду и барз весела. А дальше иде такий зграбный, цєкавый и тыж копию за собом тягне. Нарешті иде якесь таке горбате, все пыском чогось по земли глядат и камінья зберат.

Волк настрашился и повідат, же ся скрыє, бо ся боит, а медвідь най с дуба смотрит, што буде. Так волк загрюбся до листья, лем му конец хвоста было видно. Як войско пришло под того дуба, то волк хотіл собі поправити лежанье, и хвост ся му порушал, а кот хап за кончик хвоста пазурами и вкусил. Волк зрычал и втюк, а кот ся встрашил волка, тай на того дуба, на котром был медвідь. И медвідь ся встрашил, же го вкусит, як и волка, то скочил с дуба просто на землю, аж бріх му пукнул, и там медвідь остался на все.

Так пес войну выграл.