Новый Год 1954
Так Новый Год перед нами,
То дружно всі ставайте,
Забудьте свои невзгоды
И гостя привитайте.

Не знаме, што нам принесе,
Не знаме його плана,
То можна всім веселитись
От змерку аж до рана.

И в первый день новорочный
Можеме праздновати,
А потом дост буде часу
До біды привыкати.

Бо придут звычайны тыждни
И в каждый день робота,
Приватна налетит біда
И чужа ще турбота.

Бо каждый має старунок,
Што теперь буде с нами,
Як світ подпалят с двох сторон
Атомными бомбами.

Бо нашы діды, отцове
Старунков тых не мали,
Сиділи си за лісами
И землю управляли.

А теперь новый порядок
На світі люде мают, —
В холодной войні до смерти
Народы ся змагают.

Так ныні наше желанье
К Новому Року буде, —
Най спокой в світі настане,
Най в мирі жиют люде.



[BACK]