Вакации во Флориді — Анна Чачо

Ище коли я была маленьком дівчином, я чула много за Флориду — чула добре и зле. Родина мойой теты мала счастье, а може несчастье, достатися до Флориды ище в 1929 року. Потом, як вернулись назад, то тетины діти хвалили Флориду под небеса як благодатну землю солнечного світла, где роснут оранчы и грейпфруты. Але моя тета проклинала Флориду, бо там они стратили всі свои грошы — понад 15 тысяч долларов. Вышло так, што якийсь хитрый спекулянт продал мойому недосвідченному в такых ділах уйкови громадный сад, росхваливши йому наперед, што там можна засадити тысячы овочевых дерев, а кажде таке деревце даст соткы оранчов. Мой уйко рахувал наперед, скилько то принесе йому доходу. Выходило, што такий сад може принести великы тысячы. Так уйко не думал много, лем купил.

Florida1
Нашы во Флориді. — Первый ряд (с ліва на право): Мария Костик, Анастасия Гардый, Мария Запоточна. Другий ряд: Дм. Костик, П. Гардый, В. Запоточный. (Снято перед домом Костиков в Опалака)

Коли они приіхали до Флориды, то нашли цілком иншу картину. Земля была там, и точно стилько акров, скилько уйко купил, но то всьо лежало под водом, просто непроходимы мочары, из котрых лем крокодилы выставляли головы и грілися на солнці в том чудесном, теплом климаті. А где была суха земля, то там вылігувалися ядовиты зміи, гады.

Не было и мысли, што бы там можна было розводити оранчевы сады. Но горше было то, што и продати тоту землю не было кому. Никто не хотіл єй ани за половину ціны, ани за четверту часть, ани задармо. Так моя родина оставила там всьо и вернулась назад до Юнкерс в рваных лахах и подертых черевиках.

Таку историю я чула дома. А потом в школі мене все интересовало довідатися, кто то жил во Флориді перед тым, як мои козены попали туда.


КОРОТКА ИСТОРИЯ ФЛОРИДЫ

Из учебников американской истории я узнала, што перед 1492 роком, коли Колумбус плавал недалеко от Флориды, то был край заселеный индиянами. Там жили племена Майя и Кариб. Потом пришли испанцы и владіли тым крайом за 300 літ. В 1513 року Понсе де Леон назвал тот край земльом цвітов — Флоридом. То был тот самый человік, котрый глядал за мифичным жерелом “вічной молодости”. Люде вірили, што єсть така вода, котра буде тримати человіка вічно молодым, лем треба раз напитися єй. И глядаючи за тым жерелом, он нашол Флориду.

На початках испанскы колонисты мали великы трудности во Флориді. В иншых испанскых колониях в Новом Світі, як в Мексикі и Перу, было золото, а тут во Флориді його не было, то колонистам треба было посылати все помощь из Испании. Они розвели оранчевы и лимонны сады на подобие такых садов в Севиллі, но и так выжити из того было трудно.

В 1763 року послі англо-испанской войны Флорида была уступлена Англии. Обі тоты державы не означили точно западну границу Флориды, то Франция выступила с претенсиями, што Западна Флорида составляє часть Луизианы, яку Франция получила так само от Испании. Спор был законченый в 1821 року, коли США перебрали Флориду от Испании, бо Луизиана уж попередно была откуплена Америком от Франции. По причині тых постоянных змін в политичном управлении иммиграция во Флориду была на низком уровні и мало постоянных поселенцев приходило в тот край. В 1845 року Флорида стала 27-ым штатом Соєдиненных Штатов. Всьо єй население составляло тогды лем 58,000 человік.


КРАЙ ВАКАЦИИНОГО ОТДЫХА

Ныні для большинства американцев из сіверных штатов Флорида означат “Золоте побереже” от Палм Бич до Майами, бо люде ідут туда проводити свои вакации. Так им Флорида представляєся як край благодатного солнца, край широкых пісчаных, коралловых берегов коло моря с величавыми пальмовыми деревами и чистыми синими водами моря. Таке представление о Флориді створило головну индустрию того краю — туристов. И в самом ділі то єсть дуже добре місце прожити вашы грошы так наскоро, єсли у вас суть готовы. Туристы оставляют во Флориді один биллион долларов рочно.

Майами єсть головным місцем зимового отдыха и забавы для туристов с сівера. В зимі там теплійше, а в літі холоднійше, як в остальных частях Флориды, бо там к самым берегам подходит Гольфштром, южне морске течение с постоянном температуром. А Майами Бич представляє собом красивый тропикальный остров, от Майами лем в 10 минутах ізды автомобилем через чудесный по красоті залив Бискейн. С восточной стороны тот остров омывают синіи воды Атлантического океана, отепленны Гольфштромом. Ище 22 рокы тому назад тут были непроходимы тропикальны джунгли, а теперь тут єсть найбольший в світі зимовый курорт с фронтом на широкий океан.


МОЯ ПОІЗДКА ВО ФЛОРИДУ

В февралі 1953 року мні посчастливилось провести два тыждни во Флориді. И то были дуже приятны вакации, бо я мала нагоду встрітити там много добрых знакомых и друзей. Во Флориді можна теперь встрітити нашых людей, котры переіхали туда на постоянне жительство ради свого здоровья, штобы мати много солнца и теплый климат. Иншы приізжают лем на вакации, штобы захватити зимовом пором трохи флоридского солнца и вернутись потом на сівер.

Анастасия и Петр Гардый из Бриджпорт, Конн., проводят каждого року несколько місяцев в Майами Бич, то там они чувствуют себе як дома. Одного дня мы разом с Гардыми робили закупкы в магазині “Фуд Фер” на Коллинс евню, в Майами Бич, а тут подходит Мария Запоточна, из Микис-Ракс, Пенн., ляпкат весело Миссис Гардый по рамени и кричит:

— Галов!

Так мы довідались, што Мария и Василь Запоточны так само приіхали на вакации до Флориды и остановились жити в домі нашых добрых знакомых Марии и Дмитрия Костиков в Опалака, котры давнійше жили в Клифтон, Н. Дж. Так потом мы с Гардыми выбрали день и поіхали отвидіти Костиков. Як мы іхали автомобилем, то брат Гардый говорил, што дом Костиков легко найти, бо то єсть найкрасший дом в той околиці, обсадженый цвітами наоколо. Там у Костиков мы провели приятно ціле пополудни. Дмитрий Костик говорил, што лем теплый южный климат тримат го при житью, бо єсли бы остался на сівері, то напевно давно уж треба бы было йому переселятися к Св. Петру. И мы сами могли то видіти. Обое Костикы, выгріты на солнці, выглядали направду здоровыми и полными житьовой енергии. Но Миссис Костик призналася, што там єй дуже цнеся за своими людьми. Одну отраду приносит єй наша газета “Карпатска Русь”, в котрой она находит все новости о житью нашого народа. Кромі того, через нашу газету люде по цілой Америкі довідалися за Костиков во Флориді, и теперь, кто приізжат туда на вакации, то часто заходит к ним.

Во Флориді я встрітила и другых нашых людей, котры нашли там полегчение для свого здоровья. Напримір, в Корал Гейбелс, недалеко от Майами, живут уже много літ супругы Кишілы и С. Захарків из Нью Йорка, котры переселились до Флориды лем ради свого здоровья и теперь чувствуют себе далеко лучше.

В неділю мы разом с Гардыми пошли до церкви и встрітили там много нашых людей. Русска церковь в Майами отбыват свои отправы в авдитории американской средньой школы. Михаил Янчик, американец карпаторусского роду, из Питтсбурга, єсть директором той школы, то он головно постарался, што нашы люде получили тото школьне поміщение на богослужения в кажду неділю. Там я встрітила Губяков из Мейфильд, Пенн. Брат Губяк переіхал до Флориды так само ради здоровья. От миссис Губяк я узнала, што єй племянница Джон Крайняк была тота дівчина, котра за свою красоту была выбрана “Мисс Нью Йорк” в 1953 року, но в контесті она выступала под именем Джон Крейн. И нашы добры знакомы Онуфрий и Мария Юнакы из Нью Йорка были там. Они запросили мене на визит до себе, што я охотно приняла и выполнила. Дальше мы встрітили миссис Йоанну Рейнс и єй отца Юлия Дулину из Джерзи Сити. Йоанна Рейнс має там готель, новый, модерный будинок под названием “Рейнс Лодж”. Коли потом я пошла на визит к ним, то встрітила их тету Т. Криницку из Бикон, Конн. В готелю Йоанны Рейнс вы чувствуєте себе як дома, и тому можна сказати, што то єсть якбы “дом далеко от дому”. Находится тот готель на Тамиами Трейл, 3463 Саут Вест 8 улица, Майами. В неділю коло церкви я встрітила и брата Гавриляка из Джерзи Сити — он приіхал на вакации.

Florida2
Нашы во Флориді. — Сидят: М. Запоточна, Настасия Гардый, Мария Костик. Стоят: В. Запоточный, Дм. Костик. (Снято перед домом Костиков в Опалака).

В пятницу 20 февраля мы с Гардыми пошли попрощатися с одным помершым членом нашой колонии в Майами — Максимовичом. Тіло покойного было в похоронном заведении Филбрика. Службы за покойным отправлял православный священник Савчук из Филадельфии. Там было много нашых людей. Меже иншыми, я встрітила там одного из найстаршых пионеров нашой лемковской емиграции брата Петра Басалыгу, його жену и сына. То была дуже приятна встріча и знакомство.

П. Басалыга пережил уже 87 літ, но и при таком патриархальном віку он полный енергии и интересуєся живо нашыми народными делами. Он росповіл мні историю свого житья во Флориді. До Флориды пришол первый раз ище в 1925 року из Пеннсильвании и купил тут пару сот акров земли. В 1929 року стратили понад 60,000 долларов и вернулись назад до Джессоп, Пенн. Но их потягло знова до Флориды, так пришли другий раз и начали открывати маленькы торговы магазины-сторы. Тут счастье повезло, бо сегодня у них 7 большых департмент сторов в разных частях Майами и свои будинкы, в котрых и другы люде рентуют поміщения на иншы сторы. Діла пошли так удачно, што Басалыгы ныні вартости поверх миллиона долларов.

Florida3
Нашы во Флориді. — С ліва на право: Юлий Дулина, Анна Чачо, Йоанна (Дулина) Рейнс, Мария Юнак, Анастасия Гардый, краянка из Мт. Кармел и Онуфрий Юнак.

П. Басалыга єсть читателем нашой газеты “Карпатска Русь”. Я зауважила, што и он чекат нетерпеливо на газету, як и многы другы читатели. То было в пятницу, а он уже пытался, ци не пришла газета. До Майами наша газета приходит часом в пятницу, а часом аж в субботу. Он сказал мні, што “Карпатска Русь” єсть найлучша русска газета в Америкі, хотя он выписує и читат также много другых газет. В иншых газетах передовы статьи суть попутаны, покручены, же трудно выйти, што редактор хоче сказати, а в “Карпатской Руси” написано всьо ясно, точно, до пункту и оперто на фактах.

С П. Басалыгом дуже интересно поговорити, бо он знає историю нашой емиграции от самых початков из найлучшых жерел — он сам в ней участвовал и переживал.


РОЗГОВОРЫ О РУССКОМ ЦЕНТРІ

Шведы, евреи и другы народности мают во Флориді свои народны центры. Так и нашы люде там во Флориді споминали часто, што было бы дуже добре мати дагде там в Майами или по сосідству свой Русский Центр.

Теперь нашы люде, котры мусят іхати до Флориды для поправления свого здоровья, не мают где остановитися и встрітити своих краянов и знакомых.


ЗАКЛЮЧИТЕЛЬНЫ ПРИМІЧАНИЯ

Я можу сказати, што тоты два тыждни вакаций во Флориді я провела дуже приятно, и коли треба было вертатися на сівер, то я увозила с собой найприємнійшы воспоминания.

Но всі люде, с котрими я там говорила, годилися лем в одном факті дотычно Флориды: солнце во Флориді єсть чудесне. И єсть много людей, котры не находят во Флориді ничого иншого, што можна бы было похвалити. Але зато иншы люде суть так залюблены до Флориды, што не находят там ничого достойного критикы.

Во Флориді увидите чудесны, богаты будинкы, красивы готели, увидите велику роскошь, но рядом с тым, и то недалеко от той красоты, вы встрітите и прогнилы буды, в котрых так само жиют люде. В американских газетах были напечатаны недавно фотографии бідных кварталов на окраинах Москвы и в другых містах Совітского Союза. Тоты фотографии собрала и привезла богата американска дипломатка Перл Места в часі єй поіздкы до Совітского Союза. Но тоты бідны хатины из Совітского Союза выглядают ище дуже прилично в поровнании с том мизеротом и брудотом, в якой жиют индейцы, негры и біла біднота во Флориді.

Так до Флориды добре іхати лем тому, у кого єсть достаточно готовых грошей. Тогды Флорида покажеся вам с доброй стороны и вы будете хвалити Флориду. Но єсли бы вам треба было робити там на житье, то вы не будете задоволены и будете проклинати Флориду, бо платня и условия на роботі суть далеко горшы, як на сівері. А до того и роботу легко найти лем в зимовом туристичном сезоні.

Коротко можна сказати так, што до Флориды добре идти на отпочинок, но не на роботу. И также, у кого суть готовы грошы, што може вложити их до бизнесу або купити готель, то може прожити легко и мати задармо флоридске солнце в додатку. Мні особисто Флорида показалась с найлучшой стороны, бо я была там на вакации и встрітила много нашых добрых людей. Я дякую всім за добре товариство и гостеприимство, а в первой мірі Анастасии и Петру Гардым из Бриджпорт.


Анна Чачо.



[BACK]