Славянска Выставка в Гамильтоні — Василий Чепа

В первой половині апріля місяца 1953 года в городі Гамильтоні, Онт., Канада, состоялась славянска выставка рукодільной роботы (народного кроя, вышивок, глиняной посуды, ляльок в народных строях, печива, писанок), а также старой и новой славянской литературы. В выставкі приняли участие 6 прогрессивных славянскых организаций Гамильтона, в том числі и отділ Карпаторусского Общества.

То была перва такого рода славянска выставка в Гамильтоні. Выставку удалось организовати головно завдяки существованию у нас Славянского Комитета.

Выставка продолжалась три дни. Первого дня состоялась выставка славянской старой и новой прогрессивной литературы — книг, газет, журналов, брошюр, рисунков, картин, отражающых культурне розвитие славянскых народных групп тут в емиграции и социалистичне строительство в Совітском Союзі и краинах народной демократии, включаючи и Закарпатску область (бывшу Подкарпатску Русь). Так меже фотографиями и картинами, относящимися специально к Закарпатью, мы виділи на выставкі будинок Державного Университета в Ужгороді, ряд експонатов виноградного колхоза в Винницах (Севлюш), механизованного лісопильного коллектива в околиці Рахова, Нарюдный Закарпатский Хор, котрый выступал с великим успіхом в Москві и другых большых городах Совітского Союза, вид села, где родился Алексей Борканюк, вождь закарпатскых партизан в минувшой войні, захваченный потом и замученный гитлеровцами, и много другых картин, котрыми посітители выставкы не могли налюбуватися.


GajdoshTeljavska
Николай Гайдош и Анна Телявска в лемковском народном крою — на Славянской выставкі 10-12 апріля 1953 года в Гамильтон, Онт.

Другого и третього дня была выставка рукодільной роботы. Кажда организация на призначенных для ней столах розложила свои продукты. И дійствительно было на што посмотріти, бо кажда народна группа старалась принести на выставку, што найлучше могла приготовити или достати. И то придало большого разнообразия выставкі и выявило многосторонность культурных достижений славянскых народов. Люде переходили от стола до стола, оглядали, оцінювали експоната, а у каждого в очах была замітна гордость и радость за богату славянску культуру.

Хотя с техничной стороны были гдеякы недостаткы, но в общем выставка прошла с великым успіхом и принесла славу славянскым народным группам в Гамильтоні. Подобны выставкы нам славянам слідовало бы устроювати почаще в каждом большом городі.

При той нагоді я хочу сказати несколько слов о нас лемках-карпаторуссах. Будучи на протяжении многых столітий подданными другых народов, неславянскых и славянскых, к нам неблагожелательных, мы не были воспитаны в любви к свойой народной культурі и не научились цінити єй. Постепенно, крок за кроком, незамітно всякыми хитрыми способами нам прививали чужу культуру и учили нас ганьбитися свого родного. В великой мірі наш народ так и принял сию фальшиву науку, што у нас ніт свойой народной культуры, и што мы не способны к самостоятельной культурной діятельности — словом, што у нас ніт своих народных талантов. Особенно проявляєся то у нашых людей, котры суть слабы характером або малосознательны. Длятого и не дивно, што при организации всякой культурно-просвітительной роботы на ширшу скалю нам приходится труднійше зробити дашто, як другым народам, бо у нашых людей ніт достаточной самоувіренности в своих народных творчых силах. Я говорю о нашом народі тут в Америкі и Канаді. О том я переконался и при подготовкі нашого участия в вышеупомянутой славянской выставкі в Гамильтоні.

При обсуждении вопроса о нашом участии в выставкі можна было почути и такы мніния, што нам лучше бы не принимати участия в выставкі, бо у нас ніт што дати на выставку — ніт цінных рукоділий карпаторусского характера, котры можна бы поставити рядом с рукоділиями другых славянскых народов, и мы выставиме себе на сміх перед світом, єсли примеме участие в выставкі. Не взираючи на таку слабодушность и недовірие к свойой народной культурі у гдекотрых нашых людей, нашлось всетаки несколько активных членов, котры взялись щиро за роботу, и завдяки их упорному труду нам удалось организовати карпаторусске отділение на упомянутой славянской выставкі.

Часть рукодільной роботы, як вышивок, настольных обрусов, мужского и женского народного убранья, писанок и пару другых річей, мы нашли у себе дома. Дві лялькы в лемковском народном крою, а также два народны костюмы, мужский и женский, мы получили от отділа Л.С. в Кливланді, Огайо.


Dolls
Лемковскы лялькы в народном крою — получили 2-й прайз на Славянской выставкі в Гамильтон, Онт.

Хотя на нашом столі не было так много експонатов, як на столах другых славянскых народностей, то и так мы не были послідными. Выставочна комиссия, котра старательно, оглянула всі рукодільны роботы на выставкі, признала лемковскым лялькам в нашом народном крою 2-ий прайз.

Отже из сего видно, што и у нас єсть своя народна культура, котру цінят и другы народы, культура, котром нам не треба встыдатися, а наоборот, гордитися и розвивати єй дальше. Нам треба старатися идти в сліды нашых братьев в родном краю, котры показали ділом, што у нас суть свои народны таланты и єсть свое культурне наследство, котре занимат почетне місто в богатой славянской культурі.


Василий Вас. Чепа.



[BACK]