Коротка История Нашого Отділа и Клуба в Бриджпорт, Конн.

Наш отділ ч. 49 в Лемко-Союзі был заложеный в февралі 1934 года. Найвеце потрудился в том ділі, ныні покойный уже, Макарий Геряк из Стемфорд. Записалися первыми членами отділа Петр Гардый, О. Дзямба, Теодор Порянда, Григорий Дутканич, П. Вайда, Н. Врона, и так мы утримовали тот отділ.

Як было потом рішено на головном съізді заложити Народну Будову в Юнкерс, то наш отділ также помагал пожичками и жертвами.

Коли Гитлер напал с войном на Россию и Америку, то наш отділ потрудился много в несении помощи грошами и одеждом, абы побідити того ворога цілого світа.


Bridgeport1
Урядникы отділа Л. С. ч. 49 и Карпаторусского Гражданского Клуба в Бриджпорт: (сліва направо) С. Годьо — рек-секретарь, Адам Сидор — кассир, Теодор Порянда — предс., Сим. Федорко — фин. секретарь, Сим. Бойко — містопредс. (Стоят) Й. Пекар — заст. секр., М. Пилецкий — контролер, И. Гандзя — контр., В. Собчак — контр. 

Послі войны наш отділ ослаб в роботі, бо Г. Дутканич захворіл и пошол до шпыталя, а П. Вайда переіхал до Бостону на роботу. Гдекотры добры члены померли, а поедны сказали: “Та уж сме войну выграли, то нашто нам отділа при Л.С. Но нас осталось ище активных членов 7, то в 1947 году мы реорганизовали наш отділ и заложили клуб и так достали больше членов. Теперь, в 1953 году, у нас есть 72 члены. Зарентовали сме стор, достали лайснис на пиво и другы напиткы и дуже красно устроили поміщение клуба. Бизнес иде добри, то притом выполняме нашу квоту.


Bridgeport2
В Карпаторусском Ам. Гражданском Клубі в Бриджпорт. За баром (сліва направо) бартендры С. Федорко, С. Годьо и Адам Сидор.

Митингы маеме што місяца. Теперішный уряд на 1953 есть такий: Теодор Порянда — предсідатель, Симеон Бойко — містопредсідатель, Стефан Ф. Годьо — рекордовый секретарь, Симеон Федорко — фин. секретарь, Адам Сидор — кассир, Иван Пекар — заст. секретаря. Контролеры: Иван Гандзя, Михаил Пилецкий, Мих. Гавриляк и Василий Собчак. Менаджер Клуба Ст. Годьо.

До нас до клубу може придти каждый — лемко, ци не лемко. Мы приймем го як нашого гостя, ци он сблизка ци далека, бо мы всі братья славяне. Коли кто приізжат до Бриджпорт, из другых місцевостей, то просиме зайти до нашого клуба там довідатеся за вашых знакомых.

Адрес нашого Клуба:


712 Hallett St.
Bridgeport 8, Conn.



[BACK]