Паробок и Дівчина — 'Читателька К.Р.'
Калина зелена
Над водов схилена,
Сидит под ньов дівка
Красна, премилена.

У холодку сидит,
Тай собі співає,
Гадвабну хусточку
Она вышиває.

Она єй вышила
И порыхтувала,
И свому милому
Жебы єй подала,

Пришол к ней паробок
Тай ся єй звідає:
— Дівчино молода,
Повічь мі, где вода,

Рад бы-м ся напити,
А не знам, где идти.
— Там вода студена,
Где верба зелена.

Лем идь до потока,
Там верба высока,
Студенька глубока,
Што єй выкопала

Дівчина роботна.
Она єй копала,
А я помагала,
Жебы зимна вода

Там ся стримувала.
— Подь же ту, дівчино,
Вербу показати.
То я буду годен

К воді ся достати.
— Не піду я тобі
Вербу показати,
Бо я ще молода,

То мні ще за скоро
С хлопцями гуляти.

— Кобы ты, дівчино,
Мое сердце знала,
Ты бы мні охотно
Воду показала.

За то я ту пришол
О воду просити,
Бо я бы ся любил
И с тобов женити.

Бо ты дуже красна,
Як веснов ружичка,
То ачей мні будешь,
Дівчино, женичка.

— Тодыль я, шугаю,
Тодыль буду своя,
Як на нашой хижі
Выросне тополя.

Як она выросне
И шумні заквитне,
Тодыль мое личко
Ку твому прилипне.

А и тодыль буду
Я твоя женичка,
Як мні на долони
Выросне ружичка.

Як она выросне,
Буде ся біліти,
Тодыль я тя буду,
Шугаю любити.

— Дуже ты мні мудры
Слова отповіла,
Но ты мене с нима
Вельо засмутила.

Я собі так думал
С тобов ся женити,
А теперь мні треба
Цілком то забыти.

— Та кедь ты, шугаю,
Хочешь ся женити,
То я можу тобі
Дівку пораити:

Идь ты там за воду
До лемка старого,
Они мают дівку
До выбору твого.

Хоц уж не молода,
А и кус кулява,
Але на роботу
Она мат охоту.

Кедь ся с ньов оженишь,
Будешь газдувати,
Што лем єй роскажешь,
Може выконати, —

Орати, копати,
Газдынити, жати,
С таков женов будешь
Добрі газдувати.

— Не мусишь, дівчино,
Жену мні раити,
Кедь за мя не підешь,
То буду сам жити.

— Чом тобі, паробче,
Так самому жити,
Коли єсть дост дівок,
Можешь ся женити.


Читателька “К.Р.”
Единборо, Па.
(из Пряшевщины).


(Editor's comment: Author is likely Justina Hotch/Gotch (Юстина Гоч/Гоць), in Edinboro, Pennsylvania, and originally from village Habura in Prešov Region)


[BACK]