Историчне Событие — Симеон Галькович
ПРАЗДНОВАНИЕ 25-ЛІТНОЙ ГОДОВЩИНЫ
ЛЕМКО-СОЮЗА В ПАССАЙКУ

В воскресенье 27 сентября 1953 года члены Лемко-Союза в Пассайку, Н. Дж., устроили юбилейный банкет в честь 25-літия существования своих отділов — муж. ч. 16 и жен. ч. 5.

Первый отділ нашой организации в Пассайкской околиці был основаный в місяці июлі 1928 года в Клифтон, Н. Дж. Организаторами того отділа были Стефан Федорчак и Симеон Галькойвич. Стефана Федорчака хочу вспомнути тут добрым словом, бо он уже покойный. Он был щирый и ревный народный и церковный труженик и горячий русский патриот, так и при организации отділа Л.С. он помагал цілом силом, штобы наш народ мог мати свою народну организацию, бо тилько с организованным народом считаєся ныні світ и тилько такий народ може поднятися культурно и економично.


25thAnniver
Члены и гости на юбилейном банкеті Пассайкскых отділов 27 сентября 1953 года

Як всі початкы приходят трудно, так и тому нашому отділу было трудно на початках, бо до того часу нашы люде не мали народных организаций и не розуміли, што значит народна организация и кому она нужна. Но при большых усилиях далося собрати народ и створити сильну организацию, котра и финансово стояла добре и жертвовала на всякы народны ціли, особенно на поддержку народной газеты “Лемка”. Можна сказати, што во всіх отношениях тот первый отділ Л.С. в Клифтоні стоял на первом місци в народной и организацийной роботі.

В отділ объєдинились передовы и активны нашы народны труженикы из Пассайкской околицы. Я тут упомяну по имени тых из них, котры уже не суть с нами, бо предвчасна смерть вырвала их из нашых рядов. Один за другым сошли в могилу: Стефан Федорчак, П. Федорчак, Касенчак, И. Горощак, Мих. Дужий, Левко, Георгий Шуфлат, Дион. Ляш и А. Лещинский. Всі они были ревны труженикы в нашом отділі, а брат Георгий Шуфлат и Иван Горощак занимали потом и головны уряды в Лемко-Союзі и Карпаторусском Американском Центрі.

Хотя мы утратили много активных членов, всетаки мы старамеся поддерживати свою организацию, бо то наша народна повинность.

Потом в 1933 году начался отділ Л.С. в Пассайку, и тогды Клифтонский отділ перешол до Пассайку. Оба отділы объєдинились в сильну организацию с центром в Пассайку. Позже был организованый и женский отділ Л.С. Оба отділы мают своих урядников, но разом сходятся на всі засідания и проводят совмістно организацийну и народну роботу.

Найбольше активну участь в нашых отділах берут теперь слідуюшы члены и членкини: Николай Гойдич, Захарий Мерена, Михаил Бак, Иван Сервин, А. Карый, Григорий Кузмич и Василий Йезуско. Юстина Халопий, Мария Брунда, Параска Ярош, Анна Капец, Анна Скат. Я то розумію так, што мы на них возлагаме головну роботу. Як треба дашто зробити в отділах, то мы найперше кличемеся на них, бо они не откажутся, лем идут и робят. И другы члены по своим силам стараются помагати в каждой роботі.

Попередно участвовали дуже активно в ділах нашых отділов: Мария Костик, котра потом переселилась до Флориды на постоянне жительство, Елена Мончак и Варвара Касенчак, котры в послідных часах отсунулись от активной діятельности, бо здоровье не позволяє.

Треба спомнути и то, што нашы місцевы бизнесмены Михаил Маслей, Й. Мончак, 3. Мерена, П. Терек, Сим. Лабовский, Гр. Кузмич и Сим. Басалыга много помагали и помагают товарами и своим трудом для добра нашой организации.

Мы гордимеся тым, што у нас в Пассайку выросла сильна народна организация. На нашом юбилейном банкеті были присутны передовы лидеры нашого народа из разных частей Америкы и они привітствовали нашы отділы и нашу Пассайкску колонию, што мы все в народной роботі были впереди. Так мы желали бы, штобы всюда по русских колониях нашы люде старались кріпити свою народну организацию, бо лем так мы можеме оборонити успішно права свого народа.

На 1953 год уряд в нашых отділах был в таком составі: муж. отділ ч. 16 — предсідатель Сим. Галькович, секретарь Мих. Бак, кассир Захарий Мерена, а женский отділ ч. 5 — предс. Параска Ярош, секр. Анна Капец и кассир Анна Скат.


Симеон Галькович.

[BACK]