Ваньо Хвальницкий — И. Ящишак

Часто в житью встрітите человіка, што любит за дуже хвалитися, який он моцный, який мудрый, што он зробил и што може зробити. Хвалится, аж неприятно слухати. Для такых людей я хочу подати тут историю про Ваня Хвальницкого.

То стара история и то было в Полянах. Жил там один газда, што любил дуже хвалитися, то люде дали му прозвиско: Хвальницкий.

Был там панский ліс. Раз в неділю пришла така велика буря на тот ліс, што дерева сперевертало и цілый ліс поламало. А Ваньо вродился як раз в понеділок послі той заверухы. Потом, як вырос, повідал, же он памятат тоту бурю, што панский ліс поламала.

Раз взял собі стрільбу и пошол на полюванья. Але ся му нич таке не трафило, лем дикы качкы. То як котру застрілил, привязувал єй на мотузок до пояса. И так тых качок настрілял, што доокола себе напривязувал. Як уж стилько того мал, то повіл собі, же дост, и выбрался додому. Але вовк сидит близко стежкы в лісі и позерат на качкы Ваня Хвальницкого. Што ту с ним робити? Не мал кулькы, жебы го застрілити, то пришол близко, вділ до него руку, вывернул волка на рубы, як рукавицу, и так го лишил.

Иде дальше и видит лишку, як переходила коло ялицы. Вштурил руку до кишени и нашол гвоздь, то пильно набил го до стрільбы и стрілил так, же трафил лишкі до хвоста и прибил го до ялицы. Так лишил лишку и пішол дальше.

Як вышол на голе поле, то качкы начали оживлятися одна за другом и як зачали вшиткы порхати крылами, то го вынесли высоко под небеса. Як мотузкы поурывалися, то качкы в свою сторону полетіли, а Ваньо полетіл в долину просто на ногы и влетіл аж по пояс до землі. Што теперь робити? Озератся, же може дакто приде му на помощь, але не было никого. Мусіл сам идти до дому по пику и шуфлю, што ся выкопал.

Як пришол до дому, то жена рыхтувала ся на велику гостину — на сім мисок давала, на три порожни, и на штыри нич, бо хлоп был на полюванню, а не принюс мяса нич, ледво сам пришол.


И. Ящишак.



[BACK]