Родне Село — Юстина Гоць
Горы нашы родны,
Зелены Карпаты,
Я вас не забуду,
Докля жити буду.
Горы нашы милы,
А и родне село,
Отколи-м с тя пішла
То мі не весело.
Кукала зозуля,
Уж єй не чувати,
Де я ся родила,
Уж там не бывати.
Де я ся родила
И де єм выросла,
Уж там теперь росне
Зелененька сосна.
Уж ся тота сосна
Там зазеленіла,
А я в Америці
Уж ся постаріла.
Уж ся постаріла,
Глава посивіла,
Уж я там не буду,
Де єм ся родила.
Як мя моя мати
С краю выправляла,
Горько она собі
За мнов поплакала.
Такыми словами
До мня говорила,
Жебы ты ся, дівко,
До краю вернула.
А я свойой мамі
Так отповідала:
Як зароблю грошы,
Буду ся вертала.
Но я тоты слова
До днесь не сполнила
Бо я ся до краю
Назад не вратила.
Рада бы я рада
Родный край видіти,
Але велька вода,
То не можна піти.
Кобы тота вода
Не была глубока,
Не была широка,
Пошла бы-м до краю,
Хоц лем раз до рока.
Але шкода, вера,
О том споминати,
Де я ся родила,
Уж там не бывати.
Мое родне село,
Тяжко тя забыти,
Де мі за молоду
Мило было жити,
Разом с дівчатами
Ягоды сбирати
И красны голосы
По дебрях пущати.
То уж треба вшитко
Навсегда забыти,
Уж лем в Америці
Аж до смерти жити.
В богатой краині
Свой вік доживати
И ту в чужой землі
Вовік спочивати.


Юстина Гоць.
Из Габуры, Межилаборцы,



[BACK]