В давных часах было так: пес іл рыбы, а кот губы, и оба были великыми приятелями. Але псиску завсе хвіст ся мачал, як за рыбами ходил по воді. А котови было далеко до ліса за губами ходити. Так одного разу пес собі надумал змінити тот порядок и гварит до кота: — Знаєшь, товаришу, ци ты пристал бы на таку зміну, абы я іл губы, а ты рыбы? Мні до ліса легче перелетіти, а ты любишь все коло хижы и рікы лежати. Кот подумал, подумал над предложением и отповідат: — Я пристану, але мусиме зробити то по закону и записати нашу угоду до протоколу, абы раз на все осталося так. Зробили угоду и подписали. Пес говорит: Але где тото папірья сховаме, жебы не згубити? — Я мам добры пазуры, — гварит кот, — то выдраплюся на бант и сховам за кріков на даху, то никто там не достане. — Добре слово, коте, — гварит пес. — Ты так зроб. Кот положил документы за кріков и там оставалися долгы рокы в спокою. Але одного разу пришло штоси на думку псови и гварит котови: — Ноле, посмот там за кріков, ци нашы документы там суть, ци дакто не вкрал их. Я бы хотіл их видіти. Може пес не довірял котови, же он их там положил, а може аккуратно боялся, же дакто мог их вкрасти. Кот выдрапался на тото місце и вытяг папірья, але смотрит, а мышы поперегрызали так, што немож было прочитати. Сходит назад и говорит до пса: Пропали документы, мышы зъіли. Пес завырчал зо злости и скопил до кота, а кот плюнул му в очы. От того часу пес злый на кота, а кот на мышы.
Н. Майчак,
Плейнвилл, Конн. |