К Истории Нашой Емиграции в Соединенных Штатах Америкы

ВСЕНАРОДНЕ ВІЧЕ В ЮНКЕРС, Н. Й.
50 ЛІТ ТОМУ НАЗАД

Сего 1953 року мине як раз 50 літ от того часу, як молоды украинскы униатскы попикы из Восточной Галичины скликали в Юнкерс, Н. Й., велике народне віче для свойой пропаганды меже нашом лемковском емиграциом в Америкі. Віче отбылося 26 ноября 1903 року. Як видно, тому вічу придавали велике значение в тых часах, бо о нем была выдана специальна книжочка под такым заголовком:


“О чѣмъ радили на Всенародномъ вѣчу д. 26 Новембра 1903 въ Юнкерсъ, Н. І.”

Книжочка была выдана “накладом Американского Русского Народного Фонду” в типографии “Свободы” в Скрентон, Па.

Ныні по 50 роках, нам американскым лемкам интересно вникнути в то, як тоты украинскы пропагандисты пробовали подойти к нашым емигрантам, штобы злапати их до свойой кліткы и выкорыстати для свойой политикы.

Из бесіды тых попиков на вічу видиме, што они выступали як защитникы всього того, што было миле нашому народу. Обороняли права “руской церкви” перед латинскыми епископами. Писали старым русскым письмом, не фонетиком. За Украину дуже мало вспоминали, лем постоянно называли всьо русскым именем. Правда, они писали слово “русский” с одным “с”, но то діло правописания. Даже не писали “руській”, лем “рускій” Они стояли за права роботника и призывали поддержувати робочы юнии. И сами признали, што тот народ, котрый собрался там на вічу, был в огромном большинстві из Лемковщины; но коли пришло выберати их Народный Комитет, то взяли сами руководство в свои рукы, а тых пару лемков включили лем для парады. Постановили створити Народный Фонд и помагати старому краю, но Галичині, а не Лемковщині, а штобы то контролювати, то взяли заряд тым фондом в свои руки. Один бесідник из Тарнопольщины даже прямо предложил, штобы лемкы перестали интересоватися Лемковщином, а обороняли Подолье перед мазурском колонизациом. Но притом тоты попикы обіцували боронити лемков перед “москалями”. Выходило так: вы лемкы помагайте нам обороняти Подолье перед мазурами, а мы будеме обороняти вас перед москалями.

Майже за цілый час віча не споминали за Украину, лем говорили все за Русь, но при конці казали співати: “Не пора” и “Ще не вмерла Украина”.

В тот самый час друга часть нащой емиграции в Америкі боролась за православие. Одны спроваджали униатскых попов из Восточной Галичины, а другы православных попов из царской России и так навыбігы будували им церкви, парафиальны домы, купували мебли, ризы, образы для попов, давали им всі выгоды. На то ишли миллионы долларов от нашых емигрантов с Лемковщины. А о том, штобы помочи свому народу в родном краю поднятися культурно и економично, штобы обороняти свой родный край, — никто не подумал.

Мы хочеме Спомнути тут подробно за того юнкерске народне віче 50 літ тому назад, бо оно припомне нам найбольшу помылку, яку зробила наша лемковска эмиграция в Америкі в своих народных справах.




Присутных было над 300 народа, телеграмм 60, писем 30. Со всіх сторон, навіт с Канады и Бразилии надослано письма и телеграммы.

По 8-ой год. отслужили в церкви св. Арх. Михаила Службу Божу о.о. Ив. Констанкевич, Н. Підгорецкий и К. Струтиньский. Панахиду за покойных о.о. Бончевского и Вол. Нижанковского, окрем трех выше спомянутых, служили оо. Добротвір, Улицкий, Велигорский, Тимкевич и Дмитрів.

О год. 10 згромадилось споре число народа, свыше 300 человік, в просторной галі. Місцевый душпастырь о. Павло Тимкевич, голова вічевого комитета, отворил віче короткыми важными словами. На його предложение выбрано предсідателем віча о. Ив. Констанкевича из Шамокин, Па., містопредсідателями — Гавриила Дзядика из Дерби, Конн., и Йосифа Даниловича (родом из Львова). На секретарей покликал предсідатель о. Ив. Велигорского из Сиракюз, Н. Й., и Дмитра Ванька из Джерзи Сити, Н. Дж.

Предсідатель віча о. Ив. Констанкевич, привитавши собравшихся короткими словами, пояснил ціли віча в Юнкерс: борьба за права нашой церкви, поднесенье нашого народного прапору русско-украинского за морем, способы, якими-б найлучше подвигнути наш народ економично — то суть причины, якы собрали людей с далекых сторон до Юнкерс.

По программмі слідовал реферат (доклад) справ церковных. Реферант о. Ал. Улицкий из Ансонии, Конн., говорил так:


ДОКЛАД В СПРАВАХ ЦЕРКОВНЫХ

Читаме в найновшых газетах таку вістку:

“Теперішнйй папа Пий Х позволил монахиням ходити на выклады и складати испыты на публичных университетах, чого не хотіл допустити ниякым чином його попередник”.

Уважайте! Чого не хотіл допустати ниякым чином попередник — на то позволил наслідник.

И зновь читаме, што в серпню сего року станули перед тым наслідником св. Римского престола пап ом Пием Х два делегаты американскых поляков и вручили йому мемориал с домаганьем установления для Соединенных Штатов Америкы осьмох польскых епископов. Папа принял их ласкаво, на знак свойой прихильности вручил им свои фотографии и приобіцял взяти справу под розвагу. И хотя не выполнено зараз их домаганье, то всетаки поручено американскым епископам увзгляднити желание поляков и по можности именувати польскых викариев. Полякы дуже тым вдоволены, бо в именовании польскых викариев видят перву ступень до успішного рішения справы польскых епископов в Америкі.

Читаючи то, мы задумуємеся: ану як бы так и русины американскы станули перед сим новым папом со своими справами, то кто знає, ци не осягнули бы того, чого не годны были достати за попередника. А потребуют они богато! Тоты потребы церковны ам. русинов были предложены попередникови теперішнього папы в особном меморандумі, но на жаль — надармо. Тогды то (в осени минувшого року) стануло перед святійшым престолом не два, але понад 150 русскых депутатов-паломников из Галичины, меже ними было больше як 40 священников, 1 посол, 1 епископ (из Перемышля) и галицкий митрополит. Пришли поклонитись старенькому папі с нагоды 25-літнього юбилея його понтификата, а притом и вступитесь за братьями за морем, за американскыми русинами. Ну и што? Хотя и як солодко усміхался папа, а на знак великой ласкы позволял каждому приступити до себе и поцілувати його и в руку и в пантофель на ногі, а декого навет и по лицу погладил, то и так отпустил их от себе с порожными руками, а на свой “меморандум” русины до сих пор навет отповіди не достали... Умер папа — дал бы Бог, штобы с ним умерла и тота “прихильность” Рима, якой зазнала за його житья Американска Русь. За його “славного” — а для нас сумного понтификата вышли из Рима такы роспоряжения, котры подоптали цілком найслушнійшы права русской объединенной Церкви в Америкі. Та най йому Господь сего не памятат... Може Бог даст, што хотя за його наслідника ліпшы часы настанут.

Та взявши на увагу требования, означены в упомянутом меморандумі, они для русинов в США, на мою гадку, суть за скупы и слабо объяснены. Требуєся в нем именно для США лем одного епископа. То єсть за мало. Русины в США повинны домагатися не одного, але двох владык. Німецкы католикы тут, числом 3,000,000, мают 13 епископов и 2 архиепископов, отже разом 15 владык, так што на каждого припадає 200,000 душ. Русинов в США єсть до 400,000 — отже повинны мати 2 владык и стилько домагатися. Но находятся добры опікуны, котры вынаходят разны аргументы на доказ, што русинам в Америкі епископов власных не потребно, бо ту уж суть латинскы епископы, котры можут рядити и русинами. Ба, навет хотят доказати, што именованию русскых греко-католицкых епископов противится выразно церковне право, и покликуются на канон ІХ Латеранского Собора ІѴ, в котором сказано:

“Забороняме цілковито, штобы тота сама диецезия мала разных настоятелей так, як одно и то саме тіло разны головы, подобно до чудовища”.

Поминувши то, што “каноны” не суть жадны догматы и можут змінятися, можна указати на то, што єсли бы взяти сей канон так, як його толкуют теперь ворогы нашой церкви, то пришлось бы скасувати и Галицкого митрополита и епископов перемышльского, станиславского, мукачевского, пряшевского, крижовацкого и т. д., бо-ж там суть также латинскы епископы и там тоже не повинно мати “то саме тіло разны головы”. А може коли и до того приде? В таком разі нашто русины принимали унию? Ци на То, штобы канон ІХ Латеранского Собора заспівал их епископам “вічная память”?

(Дальше докладчик покликался на условия, на якых русины приняли церковну унию, и старался доказати, што униаты подчинены одному только папі в Римі, а не жадным “бискупам латинскым”, так русины-униаты в Америкі мают право на своих власных епископов).

С початку емиграции русинов до США так было, што прибывшы сюда русины оставались в справах церковных и дальше под властью своих старокрайовых русскых епископов, взглядно Галицкого митрополита, и оттуда доставали своих священников, котры так само належали до своих епископов в старом краю. Однако то не любилося тым, што дуже покликуются на “каноны”, а ище в додатку гдеякы русскы женаты священникы, приізжаючи в Америку, не потопили своих жінок в морі, ино привезли их с собов аж сюда, так тоты сторожы церковного права постаралися, што уж о якых 5 літ, в 1890 року, выдала св. Конгрегация для поширения віры, або так званна коротко “Пропаганда”, роспоряжение нашым епископам, в котром приказала: 1) откликати из Америкы женатых священников и в будучности посылати в Америку тилько неженатых и 2) от того часу русскы священникы в Америкі должны подчинятися также и місцевым латинскым епископам.

Тото роспоряжение подтвердила потом Пропаганда новым роспоряжением в 1892 року, пересылаючи його на рукы кардинала Гиббонса, латинского архиепископа в Балтимор, Мд. Стало отже быть, што русскым женатым священникам в США не можна быти, и надто русскы священникы в США достали ище нового настоятеля, так што от теперь мали належати и под свого крайового и под латинского американского епископа.

Два рокы позднійше за старанием латинского американского епископата выдала тота “свята” Пропаганда для американскых русинов ище “файнійше право”. Роспоряжением от 12 апріля 1894 установлено што: 1) в будущности не вольно прибыти до Америкы жадному русскому священнику, доки не достане на то позволения через Пропаганду от того латинского американского епископа, в которого диецезии хоче быти; 2) тот священник, а с ним и його вірникы не можут належати также и под свого старокрайового єпископа русского, лем мают цілком належати тилько под американского єпископа латинского, и такий священник при выізді из старого краю в Америку должен взяти с собов от свого русского епископа письмо, што под него больше не належит; 3) русским священникам в Америкі не вольно собирати ниякых складок даже от своих людей и даже на церковь, єсли латинский епископ не даст на то позволения.

Тыми роспоряжениями подоптано цілком права нашой русской церкви, хотя тоты права были гарантованы нам при принятии церковной унии. По нашому церковному праву вольно русинам мати женатых священников и подлягати своим священникам и своим епископам, а не чужым, латинским.

Но посмотьме, чому американский епископат постарался о такы права для нас. Ци може направду для того, што таке єсть право католицкой церкви? Ніт, бо мы уже говорили, якы права признал Рим нашой церкви при принятии унии. Ци може из великой печаливости о нас и для нашого добра? Так само ніт, и то ясно каждому. Он зробил то: 1) для свого егоизму, для низкого бизнесу; 2) для латинизацийных проб.

На то маме ясны доказы. Зачнеме от пункту 2.

Корыстаючи с того права, што русины належат под них — под латинскых епископов, та што русскым священникам не вольно сюда приходити без их дозволу, и може придти аж сего зажадає через Пропаганду, латинский епископ, тоты латинскы епископы в США до сего часу не спровадили сами ани одного русского священника для своих русскых вірников. Котрый наш священник сюда приіхал, то сам на свою руку, а и к тым, што сами пришли, латинскы священникы относятся неприхильно, часто прямо ворожо. Наведеме пару приміров.

В року 1901 запросили русины из Вунсокет, Р. Ай., о. Підгорецкого в Джерзи Сити, Н. Дж., штобы приіхал их высповідати, бо уж кілька літ не сповідалися. В марті того же року о. Підгорецкий приіхал до Вунсокет и просил місцевого пароха французского, штобы позволил йому в його костелі выслухати св. сповіди тамошных русинов и отправити службу Божу, Парох заявил, што позволит, єсли згодится на то його епископ из Бостону. Так о. Підгорецкий поіхал сам до Бостону и просил о позволение. И што думаєте? Бостонский епископ сказал, што йому жадных русскых попов не потребно в його діецезии, бо он уж має в свойой катедрі польского попа. Як русины хотят сповідатися, то можут сповідатися у того польского попа. Но русины не хотіли сповідатися у латинского священника, и о. Підгорецкий мусіл сповідати сих людей и мати для них службу в приватном домі.

2) На просьбу русинов из Юнкерс, Н. Й., о. Підгорецкий съорганизовал там русску парафию в 1899 року, бо загрозили, што єсли ся ними не займе, то перейдут на православие. Коли тоту парафию отважился обняти о. Тимкевич, то ньюйоркский епископ выклял його, што было оголошено по латинскых церквах.

Но ище яснійше видно латинизацийны замыслы латинскых епископов из роспоряжения Пропаганды от 1 мая 1897 року. Там сказано: “Позволяєся вірным восточным народам, живущым в Сіверной Америкі, держатися латинского обряда, однако они можут вернутися до свого обряду, коли поідут назад до свого родного краю”.

То значит, што и русинам в Америкі “позволяеся” держатися латинского обряда, а коли вернутся до краю, то вольно им (но не мусят) вернутися назад до свого греко-католицкого обряда.

А теперь приглянемеся справі, ци латинскы епископы в Америкі принимают всі тоты старания для нашого добра, ци лем для свого бизнесу.

В 1901 году просил тот самый о. Підгорецкий свойого нібы епископа в Ньюарку, штобы помог йому выстаратися о пожичку на будову русской церкви в Джерзи Сити, Н. Дж. Отвіт получил такий, што епископ поможе, але лем так, єсли церковь буде на него записана. Дивне діло, што в старом краю єсть богато такых самых епископов католицкых, латинскых и русскых, но ани один не домагатся, штобы люде записували свои церкви на них, аж тут в Америкі латинский епископ не може спокойно спати, єсли яка церковь не єсть на него записана! Ци може и на то мают який “канон”? Такого канона нигде ніт. Так певно достали таке роспоряжение от той самой Пропаганды в Римі.

В 1895 року пришли русины из Ансонии, Конн., до епископа в Гартфорд просити, штобы позволил русскым священникам прибыти до них и посвятити угольный камень под церковь в Ансонии. Епископ заявил, што позволит, але єсли церковь запишут на него. Русины на то не сгодилися, и церковь в Ансонии станула и без позволения латинского епископа.

Теперь же сего року о. Констанкевич в Шамокин, Па., получил воззвание, што должен на знак свойой залежности платити епископу 400 долларов рочно, а о. Макар в Мт.-Кармел достал такий самый билль на 300 долл.

Ци мы маме дивитися на то и молчати? Народ русский на свободной землі Вашингтона повинен протестовати рішительно против такого бесправства, бо то выходит лем на шкоду нашого обряда и народа. Русскы священникы, притеснены распоряжениями Пропаганды, не можут сюда приходити, хибаль лем где-кто отважится на власну руку, и того числа, яке теперь тут єсть, не выстарчає на заспокоение духовных потреб нашого народа. Чужого не розуміют, а свого не мают, тому не дивно, што российске православие собирає меже американскыми русинами такы богаты жнива.

Так дальше оставатися не може. Мы повинны не тилько протестовав против всіх тых несправедливых и шкодливых для нашой церкви и нашого народа в Америкі роспоряжений Пропаганды, але и всіми силами и можливыми способами старатися о зміну в том отношении. Для того я предлагаю нынішньому собранию рубинов, собранных со всіх концев США, принята слідующы резолюции:

1. Русины в США протестуют против всіх роспоряжений Пропаганды, выданным в их некорысть, а именно против роспоряжений 1) от 1 октября 1890 р. до русскых епископов в старом краю и подобного йому от 10 мая 1892, пересланного на рукы кардинала Гиббонса, архиепископа в Балтимор; 2) против распоряжения от 12 апріля 1894 и 3) против роспоряжения от 1 мая 1897 и требуют як найскоршого откликанья тых же роспоряжений.

2. Домагаются именования для русинов в США двох русскых епископов, але такых, якых выбере собі сам народ через своих делегатов разом со священниками. Русины американскы будут удержовати своих епископов. Штобы тоты требования были выполнены, с тактичных взглядов, предлагаю, штобы выбрати комиссию из 3-х членов, котра должна: а) составити и оголосити отповідный манифест до загалу русинов в старом краю, штобы они разом со своим епископатом поддержали нашы требования и 2) штобы знова отдільно звернулася сейчас до нашого старокрайового епископата и просила предложити нашы церковны потребы св. Престолу и вставитися за успішне их удовлетворение.

Над тыми резолюциями была проведена дисскусия, в котрой, заберали слово присутны священникы и из цивильных делегатов Игнатий Щелецкий, Андрей Корпан и Данилович. Свящ. Струганский домагался, штобы Рим вынял нас из-под опікы Пропаганды, бо мы не ниякы поганы, штобы нас треба было на віру Христову навертати-

Резолюции были приняты и комиссия выбрана.


РЕФЕРАТ ШКОЛЬНЫЙ

Реферат школьный выголосил священник П. Тимкевич. Он говорил:

Перед нами стоит вопрос: што робити с русскыми дітьми в Америкі?

Ци позволити им выховуватися самостійно, навет самовольно, ци взяти воспитание цілого русского діточого світа в свои руки и не дати им ани вынародовитися ани звихнутися?

Нашом великом хибом в минувшині было то, што мы позволили нашым дітям рости так, як они хотіли. Наслідок сего нашого пассивного отношения до так важной спраы был тот, што діти отчужувалися от всего свого родного, и уж теперь маме такы діти, што о много красше потрафлят думати и говорити по-английски, як по-русски.

Але не тилько мы в том хибили, што позволили дітям рости так, як они хотіли, але и в том, што позволяли родичам выключно старатися о выхованье всіх их дітей. Мы давали каждому робити в той справі так, як йому подобалося, а мы сами тилько приглядалися обоятно всему и не старалися навет вытягнути помічну руку до нашого найдорожшого скарбу, до нашых дітей.

Але вы скажете: нас не можна винувата, бо мы так само робили в краю, и не тилько мы, але и нашы дідове и прадідове. И они и мы жили собі спокойно, не знали сме о ниякых школах, а и так были мы счастливы.

Што люде нашы в краю жили без наукы, то правда, але штобы тилько через брак наукы были спокойны и счастливы — тому николи не повірю. Напротив, брак наукы отбивался и там в краю надзвычай шкодливо.

Я вам покажу кілька цифр, котры показуют на освіту той околицы, из котрой найбольше нашых людей в Америкі. Выслухавши уважно, сами увидите, што старого краю мы не можеме ставити собі за примір освіты. Я беру села в деканаті Біцком.

1. Боднарка — школы нема, братства, читальни, шпыхліров, склепов нема.

2. Бортне — школа державна, но братства, читальни, шпыхліров и склепов нема.

3. Высова — школа 1-классова, а читальни, братства, шпыхліра и склепов нема.

4. Ганчова — школа 1-классова, читальни нема. Шпыхлір єсть в Ганчові и склепы христианскы в обох селах той парафии.

5. Гладышов — школа 1-классова, читальни, шпыхліра нема. Но єсть в Гладышові склеп христианский.

6. Долины — нема ни школы, ни читальни, ни шпыхліра, ни склепов.

7. Ждыня — школа 1-классова, але без учителя. Склеп христианский обок жидовскых. Читальни и шпыхліров нема.

8. Климківка и Лосье — школы 1-класеовы. Читальня єсть в Лосью, а склепы в обох селах. Шпыхліра нема.

9. Школа в Кривой замкнена, а в Волівци єсть 1-классова. Читальни и шпыхліров нема.

10. Ліщины — читальни, шпыхліра, склепов нема. В Білянкі школа замкнена.

11. Маластов, Ропиця русска и Панкна — 1-классовы школы.

12. Мацина Велика и Розділье — школы замкнены, читальня єсть в Розділью, шпыхліров нема. Касса читальняна, склепов 3, а жидовскых 4.

13. Новиця и Прислоп — нема ни школы, ни читальни, ни склепов.

14. Регетов — школы нема, ни читальни ни склепов.

15. Рыхвалд — школа 1-классова, но читальни ни склепов нема.

16. Святкова — школа єсть и склеп. В Свіржові нема школы, но склеп єсть.

17. Смерековец — школы нема, ни склепу ни шпыхліра, а читальня єсть.

18. Устье Русске школы суть в Устью и Квятони, читальня в Устью, шпыхлір и склеп в Устью, єсть и братство в Устью.

Всіх людей 23,373.

Ци можеме мы брати собі то за примір? Ци хочеме, штобы школы у нас в Америкі стояли лем так, як полякы позволили русинам урядити в старом краю?

Панове полякы успіли так русский народ обгородити темнотом, што он навет в той темноті чувствуєся счастливым.

В Америкі отношения совсім иншы. Нигде на цілом світі не дбают так о народне школьництво, як тут в Америкі, и хотя американска народна школа має также свои хибы, то всетаки она може рок в рок беспрерывно выдавати в світ соткы тысяч интеллигентных дітей, котры можут дійстно быти гордостьом американского народа.

Америка не має великого сталого войска, як мают майже всі европейскы державы, але за то має армию школьных дітей, котрых число досягає 16 миллионов человік.

Коли в Галичині всі майже силы общественны спряглися, штобы не пустити ясного світла в ночну темряву, то в Америкі всьо общество найбольший старунок має про школы. Тут суть всілякы школы от “киндергартен” аж до университета, публичны и приватны, віроисповідны и загальны школы для всіх без разницы. Дійстно каждому єсть дана нагода образуватися, навет найдикшому.

Американцы вірят, што в теперішном світі нема місця для неученого. Каждый мусит знати свой фах, своє ремесло.

Якже-ж инакше дивлятся нашы люде на школу и выхованье! Правда, они знают и отчувают то на каждом кроку в Америкі, што наука такой штоси вартат, але што найважнійше — в школьной справі робится дуже мало. На якых 300 тысяч американскых русинов мы напевно маме 20% самых дітей, то значит, около 60 тысяч, Коли из того отняти маленьких дітей, то останеся нам якых 20 тысяч русскых дітей, котры повинны бы побирати школьну науку. Але што видиме? Из тых 20 тысяч ходит якых 2 тысячи до русскых парафиальных школ.

В галицко-американскых парафиальных школах нема больше як 600 дітей. Выходило бы, што в угрорусско-американскых школах повинно быти 1,400. Но мы дуже сомнівамеся, што их єсть стилько. А также на подставі певных данных можеме припустити, што число русскых дітей, котры ходят до английскых школ и Америкі, не перевышає 6,000.

Так коли навет поровнаме процент русскых дітей из Біцкого деканату в старом краю с процентом нашых дітей, котры ходят до парафиальных русскых школ, то наше поровнание выйде в корысть майже Богом забытого Біцкого деканату.

Но и с английскыми школами у нашых дітей єсть тот недостаток, што нашы діти ходят до нашых школ за коротко — звычайно 3—4 рокы. По коротенькой той наукі родиче выправляют свои діти або на “бреху” або до фабрикы. Але не знают, што дієся в сердці дітины. Може дітина має охоту дальше ходити до школы, або меже она має який особливый талант? Но родиче не пытаются, а выправляют робити. Она иде на “бреху” сидіти в корыті и выберати камінья и инше смітья из угля. Дробны пальчикы скоро тверднут, пообиванны, пазнокти позгинаются скоро, а коли зимний вітер подує, то с грудей выходит с кашльом чорный уголь. Не одна дитина набере сухот, не одна захворіє на анемию, а за што? За тых 58 центов, котры зволит ласкаво платити мистер Бауер, або котрый другий.

Тамтого року в новембрі місяці отбылася в скрентонском суді потрясаюча сцена. Перед судью Грея приходили и отходили, сказавши што знают о свойом житью, малы навет дуже маленькы діти. Их забрали от майн и с фабрик. Судья роспытувался за их житье. Пришла мала дівчина Олена Сысак, што чистила шпулькы. Маленька, выхудла, збідувана. Судья пытаєся: што ты робишь? Я чищу шпулькы — говорит она. Скилько годин и в який час? От 6:30 вечером аж до 6:30 рано, а потом иду далеко додому, бо няньо бывают далеко. И в зимі так ходишь? Все, и в зимі.

Судья не мог вздержатися и крикнул: “Вот тут наглядно видиме, як из тіла и крови людской роблятся грошы!”

Не боймеся дати науку нашым дітям. Не старайтеся так дуже за себе, як за свои діти. Мы уже такыми ортанемеся, якыми сме, но из дітей може быти дашто ліпше. Роздумайте собі то: на 100 русскых людей припадат один сальон. Так на 1,000 буде 10 сальонов, а на 300,000 — 3,000. Ци не ганьба нам, што мы можеме утримати столько сальонов, а не маме ни одной свойой народной школы?

Або, ради поровнания, роздумайте собі таку ситуацию:

В пересічном американском місті с 40,000 жителей єсть звычайно якых 15 школ, понад 100 учителей и якых 15,000 школьных дітей. Коли бы мы хотіли доровнати американцам, то нам бы треба было мати около 1000 учителей и понад 100 своих власных школ.

Мені неможливо на нынішньом вічу обговорювати справы самого воспитания в школах, бо о том выпадат лучше говорити с самыми учителями, но скажу тилько, што в парафиальных школах воспитанье мусит быти майже выключно присвячене духовной жизни нашой дітворы. А коли бы хотіли с часом мати свою русску школу с правом публичности, яка бы могла заступити американску школу, то мусиме наперед воспитати в английскых школах цілый ряд учителей-русинов. Штобы до того дойти, прошу собрание приняти слідующы предложения:

1) Всенародне Віче в Юнкерс, Н. Й., взыває родичей-русинов, штобы свои діти перед часом означенным правами не заберали из школ, але штобы всіми силами старались посылати их до школы до того часу, доки бодай не покончат початковой школы — “коммон скул”.

2) Всенародне Віче в Юнкерс, Н. Й., — с причины загальной бідности русскых поселенцев в Америкі — взыває заряд Школьного Фонда, штобы он уділювал запомогы и нагороды не только тым, котры уже ходят на университеты, але также и школярам в народных английскых школах, почавши от 5-ой классы т. зв. “коммон скул”.

3) Всенародне Віче поручає зарядови Школьного Фонда отворити Русску Бурсу в одном из большых міст Америкы, и то уж с початком нового школьного року 1904—5.


НАРОДНО-ОРГАНИЗАЦИЙНЫЙ РЕФЕРАТ

Третий доклад На тему народно-политичной организации выголосил свящ. Н. Підгорецкий. Он говорил:

Русины в Америкі стоят дуже низко; хотя всіх єсть тут около 400.000 человік, то не мают ани одной спільной народной институции, ани высшой школы, ани одного будинку, а навет ани одной пяди земли не мают, лем за-для браку народной организации и грошей.

Мы маме много братств, парафий, организаций, трохи парафиальных школ, але кажда за себе только дбає, а для цілого народа русского в Америкі не маме ничого.

Для того час нам съорганизоватися в одну велику народну силу. Тут на вічу была бесіда, што треба нам конечно мати свого русского епископа, а тым самым и фонд миссийный, треба вспомагати біднійшы церкви в Америкі, треба конечно, в слідующом року утворити “Институт Выховуючий” (бурсу) для высшого образования американской русской молодежы; треба нам чым скорше отворити Р. Н. Дом Емиграцийный, окрем того с краю (Галичины и Угорщины) вічно просят нас о жертвы на бурсы, церкви и на другы народны ціли.

До теперь собиралось нараз на разны ціли без жадного порядку, а густо-часто діялися злоупотребления. С другой стороны для нашого роботника было то часто занадто утяжливым.

В старом краю, як заплатил податок, то мал спокой на якийсь час, а и тут треба бы уж раз так установити, абы собирати жертвы на один “Фонд Народный” при помощи т. зв. американско-русскых народных марок, котры приліпляти мож на пепері листовом, на конвертах и посткартках с другой стороны, а не с фронту, на биллях, книжках, тикетах и т.д.:

В той ціли вношу, абы днесь выбрано “Головный Народный Комитет”, котрого первом задачом буде собирати жертвы на “Фонд Народный”, и буде розділяти собранны жертвы на разны ціли, а именно:


25% на фонд миссийный;
25% на школьный фонд в Америкі;
25% на Емиграцийный Дом;
10% на другы ціли в Америкі;
15% на церковно-народны, ціли в старом краю
(в Галичині и Угорщині).

Послі дольшой дисскисии над тым докладом выбрано на предложение о. Дмитрова и Теодосия Лабовского, из Олифанту, слідующий дочасный Народный Комитет: пресідатель о. Н. Стефанович, секретарь о. Н. Підгорецкий, кассир Иван Глова; члены: — о. Н. Струтинский, о. А. Улицкий, Трембач и Гавр. Дзядик.

Был ище доклад економичный, котрый выголосил о. Н. Струтинский. Он говорил за тяжке житья роботника в Америкі в радикальном духі и предложил такы резолюции:

1) Віче русинов в Юнкерс призыват всіх русскых роботников, штобы вступили до робочых юний и тоты юнии поддержували. Не будеме уважати за русина того человіка, котрый бы выступал против робочых организаций, а притом выражаме полну признательность проводникам робочых товариществ.

2) Віче взыває екзекутивный комитет партии, штобы як найскорше впровадил в житья Русский Емиграцийный Дом.

3) Віче взыває екзекутивный комитет Русской Народной Партии, штобы приготовил як найскорше план организации русско-американского Банку в США.

4) Віче предлагає екзекутивному комитету партии о б судити, ци не дало бы ся заложили институт для русскых роботниц, пребывающих в великых містах, штобы охоронити русскы дівчата перед вызыском и деморализациом.

5) В виду ворожого услособленья против великого наплыву иммигрантов и заострения иммиграцийного права, як также в виду разных острых законов против не-ситизенов, віче в Юнкерс вносит, чтобы подати петицию до Конгресса в Вашингтоні, абы была назначена комиссия для россліду славянской иммиграции, о скилько мы славяне стаєме пожиточными або шкодливыми гражданами для новой отчизны.

В дискуссии над економичным докладом один из бесідников, Тимко Пиндус, родом з Настасова, Тернопольского повіта, промовлял за тым, штобы американскы русины “заміст купувати пусты земли на Лемковщині, старалися колонизовати богате Поділье и тым способом перешкодити мазурской колонизации”. Не треба допустити, говорил Т. Пиндус, штобы на нашом родном Подолью осілися богаты полякы з Америкы, за котрыми минувшого року приізжал ту посол Стапинский, и котрым держава має дати великы улегченья.

Віче закончил о. П. Тимкевич словами: “Не пора, не пора, не пора москалеви, ляхови служить”. Всі присутны, поверх 500 человік, с хором Юнкерскым на чолі отспівали тоту пісню. Заспівали ище “Ще не вмерла”, и так розышлись.


[BACK]