Ударникы Пресс-Кампании Газеты “Карпатска Русь” 1951 Року

ОТДІЛ ЛЕМКО-СОЮЗА Ч. 6 В КЛИВЛАНД, ОГАЙО

В прошлой кампании на Пресс-Фонд “Карпатской Руси” и наш отділ ч. 6 Лемко-Союза в городі Кливланді выбился меже первых ударников. Так хочу тут вспомнути коротко за початкы нашой роботы в Кливланді и теперішны діла.

Початкы были дуже трудны. Отділ ч. 6 мы основали ище в 1929 року, коли редакция газеты “Лемко” находилась в Филадельфии. Трудности ище увеличились, коли редакция газеты была перенесена из Филадельфии до Кливланду, бо треба было старатися о типографию, машины и робочых, штобы обеспечити издание “Лемка”. Но тогдашний редактор Д. Вислоцкий натрафил нарешті на такых добрых, запеченых лемков, што не отступили от свого. То были: Баволяк, Ткач, Ардан, Співак, Дзвончик, Венгрин, Варна и другы. Они не опустили майже ани одного дня, штобы ся не зыйти и не порадити о ділах организации и типографии. А по боках другы сміялися и митингы робили по гавзах, штобы убити начату роботу.

На типографию треба было грошей, и то не мало. Своих организацийных не было, лем треба было пожичити. Но кто пожичит, коли неє жадного обеспечения, або як американцы говорят — неє “секюрити”? Але ся отважил один и пожичил грошы на машины. Честь тому человіку.

Што было, то перешло, але наш Лемко-Союз ся росширил. Сегодня каждый лемко знає за другого. Коли приде газета, и посмотрю на Пресс-Фонд, то все можна видіти новы міста и стейты, где жиют нашы люде. Никто за них перше не чул.

Один раз на початках было уж круто. Не было чым рент заплатити и рату на машины. Приходит А. Ардан до мене и повідат: “Уже не даме рады”. Я повідам, жебы зробити даяку гостину на редактора Висдоцкого, то го познакомиме с людьми. “Кто же ся побере до такой роботы?” махат головом Ардан. А я говорю: “Поможте, а я сколлектую грошы при помощи другых”.

И так ся стало. За тыждень я собрала $360.00. Зарентували мы галю и зробили добру гостину. Редактор Д. Вислоцкий мал случайность встрітити больше народа и розъяснити справу организации. Мы тоже запросили прот. Капанадзе из православной парафин. Он так само призвал людей подтримувати свою народну организацию. Так всьо вышло на добрый хосен.

И был ище при парафии священник Шамбура. Он зашол по домах и поширял газету. А йому никто не отказал, бо то был батюшка, духовна особа. Свящ. Шамбура в тых часах хвалил Гунянку. Он николи не споминал Вислоцкого, так люде ани не знали, кто єсть Вислоцкий. Коли был съізд в Питтсбургу и выбрали Д. Вислоцкого за редактора, то нашлися в Кливланді и такы люде, котры ся погнівали, же чом не выбрали Гунянку, лем якогоси украинца. Они не знали, же то тот самый человік.


Lemko Picnic
На пикнику отділа Лемко-Союза ч. 6 в Кливланд, Огайо, в 1933 р.

Потом много из тых початковых членов отступило, коли духовенство обернулось против нашей организации. Но мы собі с того нич не робили: один выступил, другого сме достали.

Так помаленьки мы окріпли и начали оглядатися, штобы набыти свое поміщение. Поскладалися, кто скилько мог, и купили сме акурат таке, як и нашы лемкы достали на Д. Шлезку — без дверей и окон, и діры на даху. Але мы и тым ся тішили, же то наше: никто не запре нам воду або газ, як с нами робили на ренті. Нашы члены забралися до роботы и поправили безплатно.

Не вшиткы так помагали — поєдны ся сміяли. Тым, котры робили бесплатно, належится честь и слава. А котры ся сміяли тогди, сміются и теперь. Заплатит 50ц, членского и приде на митинг раз в року, а хоче знати доходы.

Я не говорю о тых, котры робили за грошы.

По 10 роках нам удалось продати старе поміщение и купити новый Народный Дом Л.С., котрым мы славимеся перед всіми краянами в Америкі. Нашы члены учатся все лучше управляти своим народным маєтком и пильнуют, штобы был порядок.

Лем біда с тым, што брак молодых людей. На войну их забрали, а котры ся вернули, то уже не тоты, што были.

Теперішны урядникы ведут свою роботу честно. Я не хочу хвалити никого по имени, але оно само ся вказує. Коли бы у нас был такий уряд за давнійшы рокы, як теперь, штобы так дозерал всього, то у нас были бы уж два такы народны до мы.


Мария Телех.


ОСИФ ДЗЯМБА ИЗ КЛИВЛАНД, ОГАЙО

Осиф Дзямба родился 10 октября 1903 року в селі Вышевадка, Ясельского повіта, на Лемковині, от родичов Ивана Дзямбы и Розалии, из роду Ванько.

Дідо Осифа со стороны матери, Осиф Ванько походил из села Долге, а отец Иван Дзямба — из села Липне. Отец Иван Дзямба был вітом в Вышевадкі на три заводы, то и Осиф с молодых літ выховался при сельском уряді. В 1926 року он с группом молодых лемков выемигрувал до Аргентины, в Южной Америкі. Там перебывал головно в Буенос Айрес и працувал на ріжных роботах, переважно при будові желізных дорог и мостов.

Dzjamba
Осиф Иванович Дзямба.

С газетом “Лемко” познакомился в 1937 року. Односельчанка Текля Балаш, теперішня його жена, из Кливланду, предплатила газету для него. С початку йому было трудно ятися читанья свойой народной газеты, бо за 11 літ житья в Аргентині он привык к испанскому языку. Но до читанья притягали го дописи о предприятиях и забавах, якы устроювались при отділах Л.С. в Америкі.

В 1939 року Текля Балаш поіхала к нему в Аргентину. Там они повінчались. В 1941 року они планували переселитися в США, но тому помішала война. Жені удалось вернути аеропланом в США, но Осиф мусіл остатися в Аргентині. Аж в декабрі 1943 року на ладунковом пароході, оминаючи німецкы мины, он достался в США.

О три дни послі прибытия до Кливланду, Осиф Дзямба был присутный на членском собрании місцевого отділа Л.С. ч. 6, где записался в члены нашой народной организации. Он показал себе дуже примірным и активным членом, и в 1945 року был избраный кассиром отділа, а о рок позднійше — фин. секретарем.

Коли в 1945 року отділы Л.С. в Кливланді купили новый Народный Дом, Осиф Дзямба положил много жертв и труда, штобы дом привести до порядку и росширити свой отділ. Коли он зауважил, што в отділі завелось недбальство и беспорядкы в финансовой господаркы, то поднял рішительну борьбу против того и разом с другыми передовыми членами постарался вывести роботу в отділі на чисту дорогу. Устав Л.С. являєся для Осифа священном книгом в организацийной роботі.

Во всіх кампаниях Л.С., як в часі войны, так и послі войны, Осиф находился в рядах первых ударников. В кампании на Пресс-Фонд “К. Руси” в 1950 року Осиф собрал около $150.00 и был причисленый к передовым ударникам, за што получил надгороду — золотый перстень с емблемом Л.С. В послідньой пресс-кампании он знова выбился на перве місце меже всіми ударниками нашой организации, собравши $136.80. За то и удостоился чести войти в список найлучшых тружеников нашой зимовой пресс-кампании 1950-1951 годов.



СТЕФАН ГЕРЕНЧАК ИЗ ДЖЕРЗИ СИТИ, Н. ДЖ.

Harenchak
Стефан Д. Геренчак.

Стефан Д. Геренчак, проживающий ныні в Джерзи Сити, Н. Дж., родился 22 мая 1901 року в том же місті, в Америкі, но малым хлопцем был вывезеный до краю, и молоды свои рокы он провел в селі Тыляві, Кроснянского повіта, на Лемковщині. Оттуда родиче послали його до школы в Сяноку, где он окончил 3 классы гимназии. Дальшу науку прервала йому світова война 1914 року.

В той войні село Тылява было спалене, а жители — вывезены. Часть людей была переселена в Россию, а друга часть до табору в Гмунді, в Австрии. Стефан Геренчак попал меже тых, котры были в Гмунді. Он пережил счастливо войну и в 1923 року вернулся в Америку — в родне місто Джерзи Сити. В слідующом року оженился с односельчанком Марией Губик, котра войну так само переживала в старом краю, но она была вывезена в Россию, и там, в місті Воронежі, училась в русской гимназии.

В Америкі Стефан Геренчак перепробовал ріжны занятия. Мал свой бизнес бучерню, салону. А от 1937 року он працує шофером на автобусах.

Стефан Геренчак, принимал все дуже активне участие в нашых народных ділах и в американской политикі и проявил всюду организаторскы способности.

В Лемко-Союзі он працувал от самых початков. Он помог заложити отділ Л.С. в Джерзи Сити и разом со Ст. Шкимбом, из Бруклина, организовал в 1933 року первый лемковский “Бюти контест” для выбора “Мисс Лемко”.

Стефан Геренчак организовал также односельчанский клуб “Тылява”, котрый в 1945 року получил свой чартер и объєдинят выходцев из села Тылявы и их дітей.

Стефан и Мария Геренчак выховали трое дітей, котрым дали высше образование. Найстарший сын Александр окончил инженерску школу и ныні працує як инженер-будовничий при будові дорог. Молодший сын Владимир окончил калледж и сего року продолжає науку в Йейльском университеті в Нью Гейвен, Конн., на высшу учену степень в области економичных наук. Нина, наймолодша из дітей, працує секретарком мейора міста Джерзи Сити в його приватном бизнесі.

В минувшой кампании на Пресс-Фонд “К. Руси” Стефан Геренчак показал себе передовым ударником.



ДАНИИЛ ГУМЕЦКИЙ ИЗ ФИЛАДЕЛЬФИИ, ПА.

Humetzsky
Д. А. Гумецкий.

Даниил Антонович Гумецкий належит уж до старшой емиграции, так як в Америку приіхал 42 рокы тому назад — ище перед первом світовом войном.

Родился в селі Устью Русском, повіт Горлицы, 1 января 1894 року. Окончил 3-ий и 4-ый классы нормальной школы в Новом Санчі и два классы гимназии в Горлицах, як воспитанник нашых русскы бурс в тых містах.

В Америку приіхал 15-рочным хлопцем в 1909 року. Уж в 1910 року он стал одним из инициаторов запрмоговой организации Русского Православного Общества в Питтсбургу. Но общество существовало лем пару літ, бо зараз на первом засідании было рішено не принимати в члены ниякых священников, а духовенство в тых часах мало великий вплыв меже нашом карпаторусском емиграциом и потрафило отстрашити членов от организации. Одно братство за другым роспадалось, так што осталось лем одно братство в Монессен, Па., котре дало початок до организованья теперішнього Православного Соєдинения, но уж при участии православного духовенства.

За старанием Д. А. Гумецкого братство О.Р.Б. в Питтсбургу выросло в одно из найбольшых в той организации. Так само он организовал при том братстві Русский Клуб, котрый має сегодня свою власну прекрасну будову на Савт Сайд в Питтсбургу.

Сам Д. А. Гумецкий перепробовал ріжны занятия. 11 літ працувад для ассекурацийной компании “Пруденшел”, 5 літ в питтсбурском суді, в 1933 року переіхал в Филадельфию за менажера газеты “Правда” и на той должности пробыл 4 рокы, а, наконец, открыл свой власный бизнес — ресторан-салон в Филадельфии, котрый веде успішно до сих пор.

В минувшу войну он разом с другыми членами Л.С. принимал активне участие в роботі “Рошен Вор Релиф”, выступал на банкетах, вічах и другых предприятиях и от себе жертвовал на помощь русскому народу.

В послідньой кампании на Пресс-Фонд “К. Руси” он от себе пожертвовал $50.00 на поддержку газеты.



ОТДІЛ Л.С. Ч. 13 В СТЕМФОРД, КОНН.

Наш отділ был Заложеный 2 марта 1930 року на собрании передовых, сознательных выходцев из Лемковщины под руководством Макария Геряка. Зараз на первом собрании вписалось 18 членов.

На том же собрании было рішено, што каждый член отділа должен быти предплатником газеты “Лемко”, официального органа Лемко-Союза.

Наш отділ от самого початку звернул велику увагу на поддержку нашой народной газеты. Так уж 28 августа 1930 року мы устроили пикник на фармі Макария Геряка, предсідателя отділа. Из чистого дохода с того пикника выслано $50.00 на Пресс-Фонд “Лемка” до Кливланду. В слідующом року были устроєны два пикникы на поддержку газеты. И так ишло с рока на рок. Кромі доходов с пикников, отдільны члены жертвовали щедро от себе на тоту ціль.

Лемковскы Русаля. — В 1932 року, 13-го июня, за старанием нашого отділа были устроєны в первый раз Лемковскы Русаля в Стемфорд — на фармі Макария Геряка.

Предприятие было дуже успішне, и то зараз подняло славу Стамфордскых Русаль по цілой околиці. На тоты первы Русаля в Стемфорд приіхали члены Л.С. из Ансонии на одном автобусі, з Юнкерс на трьох автобусах и члены из Бруклина и Джерзи Сити — на одном. Загального дохода пришло $504.39, а чистого дохода осталось $263.91, из чого половину послано сейчас до Кливланду на Пресс-Фонд нашой газеты.

В том часі у нас дійствовал уж и женский отділ, котрый был заложеный 18 февраля 1932 року при 22 членкинях. Женский отділ оказал велику помощь в нашой народной роботі.

Совмістно оба отділы проводили широку народну роботу. Устроювались каждого року Лемковскы Русаля, а в осени Кермешы и другы меньшы забавы. Отділы наняли поміщение и открыли в нем свой клуб. В нашом Лемко-Клубі в Стемфорд отбылось много лекций, котры читали як редакторы нашой газеты, так и лидеры украинскых, русскых и другых робочых организаций.

Коли в Юнкерс началась будова Карпаторусского Центра, нашы отділы пожертвовали або дали в виді пожичкы майже всі свои средства на финансование того дома. И большинство нашых членово стало членами Карпаторусского Центра и дали от себе приватны пожичкы. Правда, всі тоты пожичкы, як отдільным членам, так и отділам были вернены.

В воєнном часі нашы отділы звернули головну увагу на поддержку воєнных усилий нашой краины и єй союзников для обеспечения побіды над фашистскыми агрессорами. Єжегодно мы жертвовали значны суммы на Американский Красный Крест и принимали участие во всіх кампаниях “Рошен Вор Релиф”. Мы участвовали также в роботі Американского Славянского Конгресса. В Стемфорд мы мали свой місцевый комитет Ам. Славянского Конгресса, в котром члены нашых отділов выполняли найбольшу роботу.


Stamford
Группа членов и членкинь Л.С. в Стемфорд, Конн.
(Снимок 1951 года).


В минувшой кампании Пресс-Фонда “К. Руси” мы старались, як и всегда попередно, выполнити свою обязанность, як найлучше можна было. И нам всім приятно, што нашы отділы были зачислены меже передовых ударников той кампании.


Член Л.С. ч. 13.


ОТДІЛ Л.С. Ч. 16 В ПАССАЙКУ, Н. ДЖ.

В 1930—1933 роках у нас были два отділы один в Пассайку, а другий в Клифтон. Но на полрочном митингу Клифтонского отділа 1-го июля 1934 року предсідатель Адам Ліщинский предложил, штобы оба тоты отділы злучити разом, то буде ліпше идти у нас народна робота. На то пристали охотно всі члены.

В Пассайку предсідателем был в том часі Георгий Шуфлат. Первый спольный митинг объдиненных отділов отбылся 21 июля 1934 року. На том митингу был присутный организатор І Округа Л.С., котрый сказал интересны слова до членов, як треба вести роботу в организации. Потом, 21 августа, на наше собрание приіхал головный секретарь Л.С. д-р С. Пыж. Он прочитал лекцию, а по лекции мы мали митинг, на котром головный секретарь розъяснил справу, в якой было непорозуміние меже членами, а именно, як розділити грошы, што были придбанні попередно. Тых грошей было на сумму $698.49. Рішено было розділити их на три части: перва часть до Народного Дому на 4-ой улиці, друга часть — на Желізный Фонд Л.С., а третья часть — молодежи, яка была при отділі.

Послі того робота пошла у нас в згоді и добром порядку.

В том часі был организованый также женский отділ ч. 5. Они мали свой уряд и робили митингы особно от мужчин. Так само мают свою кассу. Но як треба было робити предприятия, то оба отділы мали спольны митингы и устроювали разом предприятия. Однако доходами ділилися и ділятся до сего часу.

Теперь уж пару літ митингы отбываются разом мужского и женского отділа, но каждый отділ має свой уряд.

На год 1951 уряд мужского отділа состоит из слідующых членов: предсідатель Михаил Бак, кассир Захар Мерена, фин. секретарь Николай Гойдич, рек. секретар Илько Шуфлат.

А в женском отділі: предсідателька Мария Костик, кассирка Варвара Касенчар, секретарка Емилия Капец. В другой половині року предсідателька Мария Костик выіхала из Пассайку до Флориды, то на єй місце выбрано за предсідательку Параску Ярош.

За старанием обох нашых отділов в Пассайку было устроєно много народных предприятий — представлений, концертов, віч и т. д. на поддержку культурно-просвітительной роботы меже нашым народом и на всякы другы ціли прогрессивных организаций.

Як в минувшы рокы, так и в 1951 року мы старались провести кампанию Пресс-Фонда “К. Руси” як найлучше можна было. Наша робота увінчалась добрым успіхом, бо мы вышли на передове місце меже всіми отділами Л.С. Так мы приносиме щиру благодарность всім членам, котры трудились и котры дали жертву в той кампании на поддержку нашой народной газеты “К. Руси”.


Михаил Бак.


ИВАН МАЛЮТИЧ ИЗ ЮНКЕРС, Н. Й.

Иван Малютич родился в селі Ріпкы, Гоглицкого повіта, на Лемковщині. В Америку приіхал молодым хлопцем — на 17-ом року житья. Найперше жил в Шенандоа, Пенн., а потом переселился до Майнерсвилл, в том самом штаті. Оба тоты місточка лежат в районі твердого угля.

Подобно другым нашым краянам, И. Малютич нашол роботу при майнах твердого угля. Робил коло майн и в майнах под земльом около 8 літ. В 1919 переіхал до Юнкерс, Н. Й. Тут. познакомился с дівчином Варваром Микуляк, родом из сусідного села Ганчовы, Горлицкого повіта, котра приіхала в Америку в 1913 року и робила в шапі, а и служила, як то говорят, “у панов”. В 1920 року поженилися. За якийсь час послі того обоє робили в шапі, прискладали троха грошей, и купили штор-гросерню, котру ведут до сего часу.

Мают одного сына, літ 12, котрый ходит в школу.


Malutich
Малютич с женом Варваром
и сыном Симеоном.


Иван-Малютич от первых літ свого житья в Америкі любил интересоватися общественными и народными ділами, як в церкви, так в братствах, клубах и другых организациях. Любил спів и в молодшых роках все належал до церковного хору — в Пеннсильвании и Юнкерс, а так само принимал участие в театральных кружках.

При Лемко-Союзі трудятся разом с женом от самого початку. За його старанием был основаный отділ Л.С. в Юнкерс, а потом под його руководством велась будова Карпаторусского Ам. Центра. Цілый ряд літ он занимал уряд Председателя К. А. Центра.

Можна сміло сказати, што нашу Народну Будову в Юнкерс — наш Карпаторусский Американский Центр, наша организация завдячує в найбольшой мірі стараниям, трудам и поддержкі И. Малютича. Он разом с покойным ныні Владимиром Гончариком вынесли на своих плечах початковы найтяжшы рокы той Народной Будовы, коли треба было старатися не лем о финансы для покрытия росходов по будові и устройству К. Р. Центра, но и ходити за всякыми пермитами, лайснисами и полагоджати ріжны легальны формальности, связанны с новом будовом и открытием бизнеса.

В Памятной Книжкі 10-літия Л.С. и открытия К. Р. Центра, изданной в 1939 року, тота діятельность И. Малютича при нашой Народной Будові обрисована такыми словами:

“Меже членами К. Р. Ам. Центра находятся такы люде, што коли бы мы не мали их в организаци, то мы не могли бы ище братися до народной будовы. Первый из них, то предсідатель Центра Иван Малютич. Тот наш член положил много бескорыстного труда до той будовы. Не всі з нас порозуміют тот його огромный труд для нашого народа и признают, што єсли бы не тот человік, то тота будова бы нас о много больше стояла, а може бы єй совсім не было... Сколько мог, помагал му кассир Центра Владимир Гончарик”.

В минувшой кампании Пресс-Фонда “Карпатской Руси” И. Малютич выбился меже передовых ударников.


[BACK]