Обороняли Польского Пана — Юстин Балун

В “Нашой Книжкі”, изданной Лемко-Союзом (1945), споминатся о лемковскых писателях. Меже ними я нашол и Василия Чернецкого, родом из Воли Цеклинской, повіт Ясло. Он написал “Згадкы с 1846 року”, в котрых описал різню польской шляхты польскыми хлопами на чолі с Шельом.

Мні приятно было встрітити в “Нашой Книжкі” тоту упоминку о Волі Цеклинской, бо то єсть мое родне село. Я не знаю, што писал Василий Чернецкий в своих “Згадках с 1846 року”, бо я не читал його книжки, но в моих молодых роках я чул в свойом родном селі, як стары люде оповідали за тоту різню польской шляхты в 1846 року. Так из тых оповіданий старых людей хочу тут передати, яку роль грало в событиях 1846 року мое родне село, и яку заплату потом получило от свого пана-дідича.


—————o—————

До села Воли Цеклинской пришла відомость, штобы всіх панов выбити. Но кто принюс до села тоту відомость, то и стары люде не могли объяснити.

Наше село належало под Цеклинского пана, котрый мал под собом 7 сел: Цеклин, Ділец, Пагорок, Добрыню, Радіст, Волю Цеклинску и Фолюш. В том числі были лем два нашы русскы села — Воля и Фолюш, а остальны были польскы села.

В том часі, як розышлася відомость о різні польской шляхты, Цеклинский пан закликал до себе війта из нашого села, по имени Дзяму, и сказал йому так:

— Ту пришло письмо, жебы вшиткы хлопы ту пришли до мойого двора, и каждый жебы взял зо собом, што має — косу або вилы... Най ся не боят, бо ту будут мати дост істи и пити.

Війт Дзяма не знал читати, то не розуміл, чому пан скликує людей до свого двору. Але вернулся до села, казал зогнати громаду и росповіл селянаам, што хоче от них пан. Так наше село забрало косы, вилы и друге оружие и под проводом дьяка Пеляка пошло боронити польского пана в Цеклині перед польскыми хлопами.

Я не знам точно, котры села были за паном, а котры против пана. Но за паном было веце, бо як тоты пришли, што хотіли пана бити, то посмотріли на велику толпу пьяных хлопов коло панского двора и отступили. А пан гостил щиро тых, котрых покликал на свою оборону. Повытігал бочкы с пиятиком на обору, и каждый пил, скилько хотіл.

Але недалеко от нас, в Дубовецкой Волі пан не мал такой обороны. Коли пришли хлопы пана бити, то он виділ, же біда, и дал ногам знати. Втікал до ліса, бо думал, же там го не найдут. Але на Спалюнках (так зовут поле) поимали пана и там го пилом зарізали.

До той истории треба додати ище другу историю. Наше село боронило Цеклинского пана перед польскыми хлопами, а теперь послухайте дальше, як тот пан отвдячился за то нашым селянам.

В нашом селі єсть громадский ліс — зовеся “За Кичирком”. Красота ліс — ялиці и букы. Одного разу, як уж успокоилося, тот Цеклинский пан запросил собі на полювачку другых панов. Панове ходили по лісах, а потом вышли на Ксьенжну поляну иі там посідали отпочивати. Другы панове звідуются Цеклинского пана, чий тот ліс, через котрый проходили. Повідат он, же то хлопский ліс. А Тоты другы панове сміются: “Нашто хлопу такого ліса? Забер тот ліс от хлопа!”

Цеклинский пан закликал нашого війта до себе и гварит му так:

— Війте, я тот ліс За Кичирком заберам от вашой громады — вам такого ліса не треба.

Війт скликал громаду и росповіл, што му пан сказал. Хлопы урадили так, же кто якы волы, або кони, або инше быдля має, най иде ціле село до ліса и рубат, што лем може, абы пану не лишити нич.

И так ціле село ялося до роботы. Ночами вывозили кто што лем мог. И дуже товды худобы пропало от роботы.

Як пан выпровадил комиссию міряти и отберати ліс, то там вшитко было знищене. И пан повіл, же он такого ліса не хоче. Так зостал Волянский ліс и надальше при громаді.

Такых историй было много по нашых селах, бо народ переживал ріжны біды при польскых панах. Но никто того не зберал, не записувал и не печатал. Так вшитко пошло в забытье. И наш народ не освободился от той панской неволи, бо коли был час боротися за свободу, то нашы війтове и другы предводители ишли боронити того, кто их тримал в неволі, як и мои односельчане в 1846 року боронили Цеклинского пана перед польскыми хлопами. И то продолжаєся до сих пор. Даже ту в Америкі нашы люде подтримуют тых, кто их затемнят, понижат и вызыскує, а свое народне діло не боронят.


Юстин Балун
Сингек, Н. Дж.


[BACK]