На Новый Год 1952
Ище один год проминул,
В тяжкой біді світ покинул,
Теперь новый ся голосит.
Всі радостно го встрічают
И надію нову мают,
Што поправу им приносит.

Світ широкий поділеный,
В два таборы росщепленый,
И змагаются дві силы:
Одна несе мир народу,
Нове житье, братску згоду,
Друга різню — сон могилы.

Стилько труда положено,
Для прогресса затрачено,
Штобы житье улучшити,
Новы открыти дорогы
Для научной перемогы,
И культуру поширити.

И чудесны суть машины,
Облегченый труд людины;
Можна лучший світ створити,
Штоб всі люде и народы
Мали права и свободы
И заможно могли жити.

Но захланность и злобивость,
Самолюбство, пожадливость
Стоят тому на заваді,
Войну людям накидуют,
Свою личну власть будуют
На темноті и на зраді.

Но побідят честны люде,
Войну зломят и мир буде.
Их клич чуют всі стороны,
И мир люде подписуют,
Несвідомых пробуджуют —
Против войны миллионы!



[BACK]