смех и правда — 1952

НА ЄДНО ВЫЙДЕ
(Подслухано в Лемко-Клубі в Кливланді)

Переміщена особа до старого емигранта: Вы, діду, в Америкі поверх 50 літ, а не мате ничого, ани грошей, ани машины, ани свого дому. А я, видите, тут ище лем полтора рока, а у мене и грошы в банку, и машина в гараджу, и новый дом. И по якому то выходит?

Старый емигрант: Яке диво? И у мене были грошы, была машина и был свой дом, як я побыл пару роков в Америкі. Але як ты побудешь в Америкі 50 літ, то ся так доробишь, што будешь такий богатый, як и я днеска. Подай руку, бо нам обом на єдно выйде.


Николай Цисляк.


ДОКТОР И ПАЦИЕНТ

Пациент заплатил доктору за лічение чеком. Минуло пару дней, и доктор кличе по телефону пациента и говорит:

— Як вы мні заплатили? Чек вернулся!

— И моя хворота вернулась, — отвітил пациент.




ЧЕТВЕРТА ЖЕНА

ИВАН: Ци то правда, Василю, што тобі панбіг уж третью жену забрал?

ВАСИЛЬ: Правда, тамтого місяца были похороны. Але я взял собі уж четверту... Бере панбіг — беру и я!




СЛУГА У ПАНА ДІДИЧА

СЛУГА: Прошу пана, што прикажете мені днеска робити? Ци поіхати с паньом до міста, ци гній возити на поле, бо мені неробит ріжниці.




ДВА ПАНЫ И ДВА СЛУГЫ

Селянин везе до міста свого пана-дідича. С противного боку надъіхал другий кучер так само с якимсь паном. Дорога узка, то не можут оминутись.

— Вступься с дорогы, кажу тобі, бо я пана везу! — кричит один.

— А се што, свинья? — крикнул селянин, показуючи батогом на свого дідича.




ГЛУПЫЙ КОТИК

НЯНЬО (до сына):— Не тягай ты, сынку, котика за хвост, бо видишь, што котик кричит.

СЫНОК: — Та я, няню, його не тягну, лем тримам за хвост, а он глупый сам себе тягне.




Поіхал бы на гостину, та люде не кличут.




Йому того так потрібно, як лысому гребеня.




Не дивно, што кобыла здохла, але дивно, кто собакам дал о том знати.




НАЙБОЛЬШИЙ ГРІШНИК

В одной баптистской парафии на Югі негритянский священник-пастор не мог дати собі рады с парафиянами, бо му дуже грішили. На церковь мало давали, але за то пили, крали, билися, ошукували, а до вины никто не хотіл признатись, лем все складали вину один на другого.

Застараный тым пастор начал думати, як тут навернути свое духовне стадо. А же то был хитрый духовник, котрый знал добре своих людей, то придумал таку штуку.

Раз объявил, што в парафии буде устроєна миссия на цілый тыждень. Рано и в вечер будут проповіди. В середу на вечерньой проповіди оголосил, што на слідующий день рано не буде звычайной миссийной проповіди, бо будут похороны — будут хоронити найбольшого грішника на світі.

Таке объявление заинтересовало дуже цілу парафию. “Кто то такий?” допытувалися парафияне одны другых. Приходили и до пастора пытатися, кто умер, але он всім отвічал, што завтра сами увидят, бо трумна буде отворена. Цілу ночь люде не мали спокою, бо каждый был цікавый дознатися за того найбольшого грішника на землі.

На другий день собралось в церкви множество народа, бо вість о похоронах найбольшого грішника рознеслась скоро по цілой околиці. Пришли люде навет из сусідных парафий. Около 9-ой годины рано пастор отворил двери, и погребник с помочниками принюс трумну. Послі отслужения похоронной молитвы и короткой проповіди пастор казал открыти трумну и объявил, што теперь присутны можут подходити один за другым видіти того найбольшого грішника.

Цікавшы забігали дорогу тым, котры перше перешли коло трумны, и пыталися их, кто то такий лежит в трумні. Но никто не хотіл сказати.

В трумні не было ниякого покойника, лем было велике зеркало, так уміщене, што каждый, кто подошол заглянути на того найбольшого грішника, увиділ самого себе.

Тота штука подійствовала на парафиянов того пастора больше, чым всі його проповіди.




ИЗ АМЕРИКАНСКОГО ЖИТЬЯ

МАМА: А ты, дівко моя, тамтой ночы зас пришла єс дуже пізно додому. Може тобі здаєся, же я старомодна, але все-ж хотіла бы-м знати, где-с была.

ДОЧКА: Правда, правда, мамусь. .. Зараз с вечера была-м с одным бойсом, але вы го не познате; потом мы были в пару місцях... Не буду вам повідати, в якых, бо вы там николи певно не были, то не будете знати. А скончили сме в таком чудном веселом ночном клубі — не знам, як ся называт, але то єсть ту в місті, в якойсь пивниці. Вот и всьо. Правда, теперь вам ясно?

МАМА: Добре, добре, моя дівко, бо я лем хотіла знати, где ты была.




[BACK]