Из Лемковскых Народных Співанок
Горы нашы милы,
Горы нашы славны,
Где вы ся поділи
Мои часы давны?

Як воды до моря
С нашых гор поплыли,
Так ся мои часы
Скоренько минули.

Горы положисты,
Поляны зелены,
Выглядате, як бы
Плюшом выстелены.

Добре ся на горах
Поляночкы косят,
Кед ладны дівчатка
Добре істи носят.

Заросли мі травом
Уж давны стежечкы,
Кади я преганял
С мом милом увечкы.

Теперь уж не зайду
Ку тому бучкови,

Где єм косу клепал
Свому сыночкови.

Яничку златовлас,
Чом не ходишь до нас,
Ци ся мамы боишь,
Ци о мня не стоишь?

Мамы ся не бою,
И о тебе стою,
Лем ся преокрутні
Злых языков бою.

Бо тоты языкы
Горшы нежли мечы,
Порубле, посече,
А кровь не потече.

Тогды, мой миленький,
Тогды буду твоя,
Як на нашом столі
Выросне тополя.

Тополя выросне,
Маеран заквитне,
Тогды мое сердце
До твого прилипне.


[BACK]