Наш Заклик до Всіх Краянов в Америкі — Йосиф Ст. Фрицкий

Мы члены Аматорского Кружка в Линден, Н. Дж., звертамеся со своим призывом до всіх нашых братов и сестер, лемков и всіх карпатороссов в США и Канаді.

Дорогы братья и сестры, всі мы без вынятку маме повинность шанувати и подпорувати нашу культурно-просвітительну организацию Лемко-Союз и нашу народну газету “Карпатску Русь”. Як бы не тота организация и наша газета “Карпатска Русь”, мы были бы страчены люде, и никто за нас бы не знал. Но завдяки роботі Лемко-Союза и газеты “К. Русь” сегодня за нас знают не тилько всі карпатороссы тут в Америкі, но и нашы братья и сестры в старом краю и в каждом закутку світа, куда лем закинула судьба нашых людей.

В такых критичных и переломовых часах, якы мы теперь переживаме, дуже трудно дознатися о житью нашого народа, потому што приватны листы от нашых родных все меньше и меньше приходят по причині той шаленой “холодной войны”. Но завдяки нашой газеті “Карпатска Русь” мы маме ище возможность получати гдеякы відомости. В нашой газеті поміщаются корреспонденции из старого краю и приватны письма. Хоц такий лист был писаный лем одним человіком до його родных, но коли он поміщеный в нашой газеті, то мы всі читаме його, и он розвеселят або смутит нашы сердца, в зависимости от того, якы відомости приносит. Мы то сами читаме и другым передаєме, котры не читали.

Або взяти и наше положение тут в емиграции. Ци мы могли бы так один другого познати и организовати такы театральны кружкы, якы мы тут маме? Розумієся, што ніт, бо мы розметаны по цілой Америкі. А и театральны кружкы были бы непотребны, бо не было бы свойой народной литературы, то такы аматорскы группы не мали бы што поставити на сцені.

Но завдяки свойой культурно-просветительной организации Л.С. и газеты “К. Русь” мы маме тоту литературу. Мы познаєме одны другых, сходимеся на предприятиях и читаме о том, што робится меже нашым народом. Так люде из ріжных околиц можут познатися меже собом и разом вести народну роботу. Взяти, напримір, и наш театральный кружок в Линден, Н. Дж. В том кружку участвуют выходцы из слідующых сел Лемковщины и Пряшевщины: Избы, Ріпкы, Брунары, Рыхвалд, Тылява, Барвінок, Дальова и Орлик.

Так тут маєме найлучший примір, што значит наша народна культурно-просвітительна организация, и яку прекрасну роботу зробил Лемко-Союз за 20 літ свого существования. Меже нашым народом нашлося пару передовых людей с высшым образованием котры не встыдалися свого народа, свого материнского языка и своих лемковскых-карпаторусскых народных традиций, и они рушили тоту роботу при помощи всіх активных борцов за народны права и свободу.

Честь и слава належится вам, первые пионеры той нашой народной организации Л.С., єй основатели и труженикы! А мы всі должны поддержати и розвивати начату роботу. Мы должны цідыми силами будувати свою народну организацию и роспространяти нашу газету и другу литературу.

Пословица каже: И Бог ся тым брыдит, што ся свого стыдит. Отже шануйме свое!


Йосиф Ст. Фрицкий,
Ровей, Н. Дж.



[BACK]