20 Літ в Американской Армии
Pirch Stefan
1-ый Сержант Армии США Стефан Пырч.

10 июня 1950 року умер в г. Одеса, Тексас, на удар сердца выслуженный 1-ый сержант Американской Армии краян Стефан Пырч.

Стефан Пырч родился в 1904 року в Питтсбургу, Пенн., но был выхованый в селі Климковка, повіт Горлицы, на Лемковщині. Родиче Иван и Александра Пырч вернулися в 1913 року до старого краю и забрали с собом дітей, котрых было у них в тот час четверо — три хлопці и одна дівчина. Стефан был найстарший.

О том, як склалось дальше житье родины и самого Стефана, описує молодший брат Павел Пырч, находящийся в Ембридж, Пенн.

“Як вышли сме до краю, то скоро началась перва світова война. В 1915 року нашого няня забрали на войну, с котрой он веце ся не вернул — был забитый на итальянском фронті. Осталось нас штырьох братов и одна сестра: Три браты роджены в Америкі, а один в старом краю. Набідувались мы дост, бо кажда сирота без отца бідує. Наша дорога мама, котра от 1940 року жиє в России, казала все нам: “Діти мои любы, як дороснете, старайтесь выіхати назад туда, где вы родились”. Так мы того трималися и думали, як выіхати в Америку.

В 1923 року наша тета по няню, Мария Костишак, спровадила брата Стефана до Америкы. Было йому в тот час 19 літ. Приіхал до Фейрокс, Пенн., а роботу достал в Ембридж. Но робота по фабриках йому не злюбилась. Поробил до 1926 року, а потом записался добровольно до Американской Армии, в котрой прослужил 20 літ. В 1946 року выйшол из армии с пенсиом 107 долларов на місяц.

Он был женатый с американском дівчином, родом из Тексас, но дітей не мали. По выході до цивильного житья брат Стефан мал пару літ гостиницу в Одеса, Тексас, а потом продал тот бизнес и занимался малярском роботом. Но тут чекала уж на него смерть, и не дала йому пожити дальше в цивильном стані. 10 июля 1950 року он встал рано, позберался до роботы и вытяг трока из гараджу, но ище вернулся за чымси до свого дому, котрый лем два рокы тому выставил, и тут упал на подлогу и веце не встал.

Брат Стефан перешол цілу остатню світову войну от Перл Гарбор до Германии. Похорон отбылся 12 июля с воєнными почестями и на воєнном кладбищі в місті Ель Пасо.

Оплакуют покойного його жена Мертель Пырч, и нас двох братов Павел и Петро в Ембридж, и наша дорога мама Александра и брат Василь, котры жиют в Советском Союзі, и наша сестра Єва, по мужу Ренчковска, котра осталася на Лемковщині, в родном селі Климковка.

Дорогий наш брат, най буде тота земля, за котру ты отдал 20 літ найкрасшого житья, пером тобі, а память о тобі останеся в нашых сердцах навсегда.”




[BACK]