Встріча с Первыми Пионерами Л.С. — Николай Цисляк

Вступаючи в 20-літний юбилейный для Лемко-Союза рок, мні припала велика честь встрітити первых урядников Главного Правления Лемко-Союза, а именно Михаила Баволяка, Предсідателя, и Стефана Ткача, Секретаря, поговорити с ними и послухати их воспоминаний о початках Лемко-Союза тут в Соєдиненных Штатах Америкы.

Михаил Баволяк родился 6 мая 1884 року в селі Котань, Ясельского повіта на Лемковині. В Америку, в город Кливланд, прибыл в 1902 року, и с того дня до днеска працує для желізнодорожных компаний. В общественном, народно-церковном житью он все провадил руководячу активность.

— Ци Вы припоминате собі, як подійствовала на Вас новость о организации Лемко-Союза в Канаді?

— То была дуже велика и радостна для нас новость. Єсли бы газета “Правда” не опозднила нам тым разом, то у нас в Кливланді был бы первый отділ до Л.С., а не шестый. Хоц мы с числом припозднили, но коли почали организоватися, то мы тут собрали так много членов и такий великий грошевый фонд, што Вислоцкий без намыслу заявил: “Кливланд буде центром Лемко-Союза”. Сейчас он переселился до Кливланду и тут мы начали издавати газету “Лемко”.

— Якы найбольшы трудности Вы мали в початках при организации Лемко-Союза?

— Финансовы. Для лемков, котры николи не мали свойой народной организации, удержати редактора, покрывати издание газеты и администрацию приходило с великыми трудностями. В самых початках то выдавалося дост легко, бо на нашой стороні мы мали настоятеля о. Капанадзе, при парафин котрого группувалися головно лемкы. Он даже помагал нам организовати наш отділ, але коли порозуміл, што Лемко-Союз єсть народна организация и служит народу, он выступил против Лемко-Союза, и для нас стало тяжше. Но мы не падали духом. Меже нашыми лемками находилися добры патриоты, што помимо затяжной кризы приходили Лемко-Союзу на помощь с поважными жертвами, и так помалы мы довели издание газеты до того часу, аж лемкы с цілой Америкы и Канады открыли “другий фронт”.

— Ци теперь по 20 роках, Вы все ище той самой мысли, што лемкам был потребный Лемко-Союз?

— Нас лемков все тримали на послідном щабли. Лемко-Союз был, єсть и буде нам потребный, штобы другы не посміхувалися над нами, бо лемкы мают свою славну историю, вытревалый характер и суть способны вести сами своє общественне житье.

— Може были даколи такы моменты в Ватном житью, што Вы захвіялися в отношению до Лемко-Союза?

— Николи! Я с цілым натиском был и буду за Лемко-Союзом и за тоты принципы, на котрых он основаный. Мене никто не купил, ани не купит ани почестями, ани грошами, ани политичными маневрами. Я против зміны Лемко-Союза и стою за тым, штобы наша газета несла свое первоначальне имя “Лемко”. “Кому церковь не мати — тому Бог не отец”, говорит пословица. Кто не любит “Лемка”, от того ниякой пользы в нашой организации. Я єсть тот самый Михаил Баволяк, якым я был сорок літ тому назад и при основании Лемко-Союза, котрому и теперь в двадцетилітие от сердця и мого сознания желаю дальшого успіха. Я вполні задоволеный с тым, што наше народне майно в Кливланді забеспечено за Лемко-Союзом, и теперь никто с тых, што того недостойны, не положат на нем свою руку. Честь тым, котры тото так завели.




Tkach Stefan
Стефан Ткач
— первый Фин. Секретарь Л. С.

Стефан Ткач, первый секретарь централизованного Лемко-Союза, родился 28 ноября 1881 року в Устью Русском, Горлицкого повіта на Лемковині. До Америкы прибыл в 1905 року. В краю он окончил три рокы промысловой школы в Горлицях. В Америкі не мог установитися на отповідной роботі, вслідствие чого побывал в разных штатах и попробувал робот во всякых индустриях. В 1922 року остался в Кливланді на стало, где и застала його новина о основании Лемко-Союза.

— Ци для Вас была несподіванном новина о основании Лемко-Союза?

— Потреба лемкам народной организации была так натуральном, што новость о основании Лемко-Союза ударила не так несподіванно, як с великом радостном. Меже лемками поднялося таке велике заинтересование, што на первом лемковском кермеші, устроєнном в Кливланді, згромадилося поверх 200 лемковскых семейств. Слідуючий лемковский пикник замінился на невиданный народный сдвиг. Єсли бы таке заинтересование народном организациом продолжалося дольше, то из лемков лем одиницы осталися бы поза организацию, а всі лемкы были бы объєдинены в Лемко-Союзі.

— Што перешкодило дальшому росту Лемко-Союза?

— Слабе розуміние народной организации самым народом, и брак руководителей народном организациом. Лемками руководили найбольше священникы. Єсли бы лемкы мали священников зо свого народа, то и так Лемко-Союз мог бы при них розвиватися, бо они все суть больше демократичны. Но лемкы держали на своих парафиях чужых священников, а тоты не дбали за интересы нашого народа.

— Ци Вы все шце той мысли, што лемкам потребный Лемко-Союз?

— Так як всім другым народностям потребны их народны организации, так нам лемкам потребна наша народна организация. В сознании того я ище днеска исполням в отділі Л.С. уряд рек. секретаря. Я рад служити народу, хоц для мене уже труднійше то приходит.

— Што мате сказати по поводу 20-ых роковин Лемко-Союза?

— Штобы Лемко-Союз дальше стоял на свойой дорогі и не дался свести ани открытым врагам ани затаєным “приятелям”. Штобы Л.С. старался очистити такы отділы, где передовы люде зноровилися корыстати из народного цента. Там, где отділы очистилися от такых руководителей, там всяди замічатся прогресс. Я чудуюся такым урядникам, што тот марный цент в организации им такий лакомый, коли человік може своими руками заробити собі честный кусок хліба и не марати свою честь. Наконец желаю Лемко-Союзу добитися свойой ціли, для котрой был основаный. Вічна честь най останеся для тых людей, котры совістно працували и працуют для Лемко-Союза.


Николай Цисляк.
(Кливланд, О.)



[BACK]