Наш Родный Край — Варвара Касинчар

Я ту хочу написати дашто о селі Ростока Велика, повіт Новый Санч.

Тото село називалося Ростока Велика, але оно было дост мале, бо числило лем около 85 нумеров домов. Дост дуже было коморников, як и по другых селах, то по два нумеры можна было рахувати на одном грунті, а то не рахували, лем брали один нумер.

В Ростокі была церковь и школа. А так само до Ростокы належало друге село — Крижівка. С той Крижівкы люде приходили до церкви, а діти приходили до школы в Ростокі.

То так было от давных часов. А теперь по 2-ой світовой войні то ся вшитко перемінило. Як пришло переселение, то одна часть людей поіхала до России, а друга была примусово выгнана на Дольный Шлезк, и в селі остался лем Грица Вовка сын Дмитро.

Што мене споводовало написати дашто о свойом родном селі єсть то, же теперь уж там никого неє, и нема ся от кого дашто довідати, а тут так само старшы емигранты вымерают, и тоже нема от кого ся довідати о нашых пионерах, котры ту поприходили на початку. Я лем маленьку часть опишу о тых, котры ту приходили около 60 роков тому назад.

В селі оповідали, же найперше поіхали до Америкы Павел Прокопчак, Кирилл Буранич и Семан Копыстянский. Тот Копыстянский был зо Злоцкого, и як пришол до Ростокы, то был за профессора и ся оженил с Текльом Домбровском. Он не был долго в Америкі, бо он лем напред того ся оженил, то ся му цло за женом и неодолга пришол назад.

А ту суть имена тых, котры выіхали позднійше до Америкы:

Мария Тарасевич — она приіхала до Нью Йорку в 1882 року.

Сестра єй Ружа Тарасевич — она приіхала до Елизабет, Н. Дж., в 1885 року.

Ваньо Ворона приіхал до Маунт Кармел, Па., в 1886 року.

Потом Ружа Тарасевич поіхала до краю и припровадила свою дівчину Кляру и свойой сестры Марины сына Гаврилу Тарасевича. То было в 1889 року.

Втовди приіхали Александра Головяк Цегиник, Анна Ворона Рущак. А Михаил Даньчак уж ту был давнійше, бо Анна Ворона пошла до него служити, як пришла с краю в 1889 року до Маунт Кармел. Там жили Варвара Даньчак и Фецьо Даньчак, Осиф Репела, Лешко Богач, Ваньо Буранич, Димитрий Домбровский, Дионисий Тарасевич. То они приіхали в 1892 року. А Глафира Ворона Репелла пришла в 1893 року.

Ваньо Шафран, Адам Чупак, Адам Ящишак приіхали в 1894 року; Катрена Богач, Анастасия Дмитерчик, Александра Дмитерчик, Кулина, Мария Дмитерчик Тарасевич — в 1896; Адам Коспирда, Панько Мерена, Филипп Репелла, Поликарп Шафран, Григорий Головяк, Осейф Домбровский, Єва Домбровска (в Маунт Кармел); на Симпсон, Па., были Панько Тарас, Ваньо и Павел Тарас и сестра Анна Тарас Рак и Васко Даньчак. А Петро Тарас жил на фармі в Гилман, Вис.

Я ту вспомнула лем о пару дівках. Веце молодых хлопов втовди приходило и робили они коло майн. Позднійше зачали зас веце дівкы приходити. Приходили найвеце до Пассайку и до Нью Йорку — приходили так аж до первой світовой войны. Остатня с нашого села приіхала перед том войном Ольга Тарасевич Сеньо. Она приіхала до свого брата Семана Тарасевича, до Плимаут, Па., в 1914 року.

Я сама приіхала до Пассайку, Н. Дж., в маю 1902 року до Анны Рущак. Товди был страйк при майнах, то майнеры, котры мали грошы, выізжали до старого краю, а котры были без гроша, и не мали до кого іхати, то приходили до Пассайку або Нью Йорку женитися. Товди в каждом гавзі чути было співу.

Перечислити всіх, котры с нашого села выіхали до Америкы, я не можу тут, бо их было дуже много. Я тут хочу описати лем одну рілю в нашом селі, т. є. пару хиж, кілько людей выіхало до Америкы. То были мои сусіде с Реваківкы. Там первый газда был Ревак, но он помер. Потом ся оженил там Падухович. Они мали одну дітину, и он поіхал до Америкы. О пару роков он спровадил жену Євку и двое дітей. Одно было його, а друге по Реваку, бо по Реваку осталося пятеро дітей: 4 хлопці и 1 дівча. Потом взяло кілька роков, поки они ся спровадили вшиткы. Они мешкали в околиці Шамокин и Маунт Кармел. Дома в старом краю никто не зостал. А теперь спомяну, яке счестья они нашли тут в Америкі Микита Ревак был женатый с Ксандрой Богач; Фецьо Ревак был женатый с Устянком Єдинак. Другы два братья, Юрко и Васко были также женаты, а их сестра Параска Ревак отдана — и мали всі дост велику фамелию. Юрко и Васко Ревакы были забиты в майнах, а Фецьо был попаленый в майнах. Микита и Параска жиют в околиці Ньюарка, Н. Дж.

Друга хижа на той ріли Реваківкі была, як звали — до Бартка. Там перше газдом был Горощак, а як он помер, то ся там оженил Бартко Тарасевич. По Горощаку осталися дві дівчата — Фимия и Зиновия, а с Бартком мали одно дівча Ольгу. И так само там мешкала Ганка Тарасевич, то она мала дві дівчата — Ксандру и Ольгу. Потом майже вшиткы поіхали до Америкы: найперше Бартко, потом тота Ганка и она спровадила свои дівчата. Из них Ксандра была выдана за Стефана Мицавку, а Ольга за Тифана Хомяка. Они вшиткы мешкали в Маунт Кармел. А Ольга Барткова отдалася за Павла Гаврана, тыж в Маунт Кармел. Зиновия Горощак тыж приіхала до Америкы и она ся отдала за Григория Головяк в Гарфильд, Н. Дж. А ище из той самой хижы поіхали до Америкы Стефан и Таця Шафран. Они были діти по Кундраті Шафран, але их уйко Михаил Гамбаль был там женатый с Фимиом Горощак. Таця и Стефан Шафран мешкают тепер в Олифанті, Па.

Так то суть лем с двох хиж люде. Дальше была хижа Антония Гурского. От Гурского лем один был в Америкі — он ся оженил с Крестином Кузяк и жили в Клифтоні.

По Улиані Губа поіхали до Америкы Анастасия и Евфросина Губа-Бищакы и Тимко Губа. Их мама Орина Губа потом ся выдала за Максима Амброж. Тот Амброж был давно в Монессен, Па. Они мешкали на Гуті в Крижівкі.

От Ваня Чупака поіхали до Америкы: брат Адам Чупак и трое дітей — Варвара Чупак Касинчар, Михаил Чупак и Мария Чупак Костик. А так само мешкала на том грунті Глафира Репелла и она мала трое дітей: Васка, Крестину Репелла Дроздяк и Варвару Репелла Кузний. От Губы, Чупака и Репеллы мешкают в Клифтон, Н. Дж.

А теперь от Семана Копыстянского, котрый был перше в Америкі, то пятеро дітей Зиновий, Петро, Фецьо, Владимир и Таця Копыстянскы приіхали также до Америкы. Они мешкают в Индиан Орчард, Масс. А и Матрона, по мужови Андраш, была в той хижі выхована при Терескі. Она жиє в Маунт Кармел.

Потом от Вицка Ящишака, або от Осифа Губы приіхали: Адам Ящишак, Наталка Ящишак Поливка и Магдалена Губа Падухович.

Так то суть люде лем с одной рілі в нашом селі, котры выіхали в Америку.

Кто из нашых Росточанов буде читати тых пару слов о свойом селі и буде видіти, же може ліпше и докладнійше описати, то я бы просила, жебы написал до газеты або до Календаря на следующий год. Из того можна бы написати аж и книжку не лем о самих нас, емигрантах, але и о нашых дітях.

В місяці июлі сего року, 1950, я мала лист зо старого краю, с Дольного Шлезку, то мі писали, же іздила оттамале одна жена до села Ростока и хотіла достати ментрику для свойой сестры тут в Америкі, то як вернулася назад, мала смутну историю за наше родне село. Оповідала, же была в селі, але ментрику в селі не достала, лем мусіла іхати до Санча и там достала ментрику для сестры. И повідала, же в селі сами полякы мешкают — гурале. Она их так называла. Там в нашом селі єсть их около 20 фамелий. И в Крижівкі так само гурале мешкают, и єсть их там 11 фамелий.

То за такий несправедливый поступок с нашым народом каждого сердце болит. Я сама николи ся не рыхтую там вертати, бо єм не мала там родины, але все перед очами мні было тото село. И то тяжко забыти.


Варвара Касинчар.



[BACK]