NewYear51
Чорны хмары небо вкрыли,
Блискавиці пролітают,
Громы світом потрясают,
Люде в страху мовь застыли.

А тут новый год приходит,
И як ся отдавна водит,
Треба дашто пожелати,
Своих, чужых привитати,
Людску журбу розогнати,
То никому не пошкодит.

Най же буде, як бывало,
Коли А-бомб зло не мало, —
Так на счестья с Новым Годом,
Штоб скріпленне добром згодом
С каждым крайом и народом
Братство всяди процвитало.

Люде войны не желают,
В войні зыску не глядают,
Зато треба ся єднати,
Фронт Народный будувати,
Врагов мира обуздати, —
Най до войны нас не пхают.

Кривды не мож перенести,
Но не маме жажды мести,
То най приде тота днина,
Коли наша Лемковина
В Польші стане як родина
И до любви буде вести.

А тут сами меже собом
С той нагоды, с Новым Годом,
Дружно рукы си подайме,
До роботы всі ставайме,
Приятельство укріпляйме
Не особно, а с народом.

Може пройдут чорны хмары,
Засіяє світ солнечный,
И веселый и беспечный
Нам принесе мира дары.




[BACK]