Федеральна Ассекурация Старых Робочих в США

При Президенті Франклині Рузвельті было установлено в США социальне обеспечение для робочых на их стары рокы. То єсть державна ассекурация, на котру платят по ровной части сам робочий и роботодатель (компания або приватный предприниматель, для котрого робочий працує).

Тота ассекурация вступила в силу 1 января 1937 року. Тогди каждый робочий, котрый робил на роботі, подпадаючой под закон о той федеральной ассекурации, получил свой номер социального обеспечения (“сошиал секюрити номбер”), и Компания начала стягати йому с зароботной платы 1% и посылати до державного уряду социального обеспечения на тот його номер. Компания от себе додавала так само 1%. В уряді социального обеспечения тримают рекорд всіх робочых по их номерам, и записуют каждому на його номер то, што приде от компании.

Компания стягала робочому 1% с каждой його “пейды”, но она посылала то до федерального уряду социального обеспечения не по каждой пейді, а квартально, т. є. кажды три місяцы. Штыри раз до рока кажда компания або отдільный роботодатель, котры мают наємных робочых, мусят приготовити список всіх робочых, якы у них працували за попередны три місяцы, подати “сошиал секюрити номбер” каждого из них и сумму його зароботной платы за тоты три місяцы. Разом с тым они мусят дослати и чека на тоту сумму, яку стягли робочым с “пейды” на социальне обеспечение. Получивши такий рекорд, уряд социального обеспечения записує каждому робочому на його номер, скилько он выробил и скилько было прислано на його ассекурацию.

На початках стягалося робочому 1% с зар. платы и компания додавала 1%. Теперь стягают робочому 1% и компания доплачує такий самый процент. Так буде аж до конца 1953 року. Єсли робочий заробит на тыждень $100.00, то йому стягнут на социальне обеспечение $1.50 и компания додаст $1.50, так разом $3.00 запишеся с той одной пейды на його социальне обеспечение.

Ныні робочому стягают с пейды и “инком-текс”, а в гдеякых штатах ище додатковы платы на запомогу в случаю каліцтва, набытого не в місци роботы. Процент на социальне обеспечение стягатся с полной суммы зар. платы, а не с суммы, яку робочий получит послі того, як йому оттягнут “инком-текс”. И на социальне обеспечение стягают одинаковый процент всім робочым без огляду на то яка у них фамелия.

Кто из робочых робил постоянно от 1937 року до теперь на такой роботі, где стягают на социальне обеспечение, то йому наскладалась дост гарна сумма на його имя и номер социального обеспечения.

Теперь посмотме, што дає робочому социальне обеспечение.

1. Коли такий робочий дожиє до 65 літ, то он має право на місячну пенсию аж до свойой смерти. Высота той пенсии залежит от того, скилько он пересічно выраблял на місяц и як долго он робил на роботі, где йому стягали процент на социальне обеспечение. Но штобы такий робочий мог получати тоту пенсию, то он мусит лишити свою роботу. Маєток тут не має нич до діла, бо то єсть ассекурация, на котру робочий платит. То значит, што робочий може мати грошы в банку, може мати гавзы и другий маєток, но он и так буде получати тоту пенсию місячно.

Но єсли робочий по осягнению 65 літ житья продолжає дальше робити и зараблят больше як $50.00 місячно, то он не має права получати пенсию на основі закона о социальном обеспечении. Єсли його місячный заробок єсть лем $50.00 або меньше, то по новому закону, поправленному в 1950 року, має право получати старческу пенсию. В такых выпадках, коли человік в віку выше 65 літ получає пенсию на основі социального обеспечения, а потом начал робити пару місяцев и заробил поверх $50.00 місячно, то он должен повідомити о том уряд социального обеспечения и за тоты місяцы, в котрых його заробок был поверх $50.00, он не получит пенсии.

Но коли такий робочий осягне 75 літ, то он буде получати старческу пенсию без огляду на його роботу и заробок. Хоц бы он заробил и $100.00 місячно або и больше, то и так має право на свою місячну пенсию.

Штобы обрахувати як высоку пенсию буде получати заассекурованный робочий, то найперше треба найти його “середню місячну зароботну плату”. Напримір, робочий робил на роботі, где йому стягали на соц. обеспечение от января 1937 року до января 1950 року, коли йому минуло 65 літ, и он подал заявление о пенсии. Значит, он робил 13 літ, або 156 місяцев. Первых 6 літ он получал по $200 місячно, но 6 місяцев был хворый и не ходил до роботы, потом 6 місяцев робил для фармера, где йому не стягали на социальне обеспечение, а остальны 7 літ робил в фабрикі и зараблял по 250 долл. місячно. За первых 6 літ он заробил $12,000, а за 7 літ $21,000, то разом $33,000. Штобы найти середню місячну платню, треба поділити весь його заробок, с котрого стягали процент на социальне обеспечение, через число всіх місяцев, т. є. через 156. Получится $211.54. То єсть “середня місячна платня”. До змінні закона в 1950 року місячна пенсия того робочого выглядала бы так: 40% с первых 50 долл. середньой місячной платни — 20.00, 10% с остальной суммы середньой місячной платни (161.54) — 16.15. Разом 36.15. То была т. зв. основна пенсия. Дальше 1% с основной суммы пенсии за каждый рок (13) — 4.68, так всего разом $40.83. То была бы місячна пенсия того робочого до зміні закона о социальном обеспечении в 1950. Но закон 1950 року увеличил пенсию всім пенсионерам, котры уж получали пенсию, так што тот старый робочий от октября 1950 р. получал бы около $64.00 місячно.

По новому закону при обрахунку місячной пенсии новым пенсионерам так само будут брати за подставу “середню місячну платню”, но будут рахувати 50% от первых $100.00 той середньой місячной платни и 15% от остальной части. В приведенном выше примірі рахунок был бы такий: 50% от первых $100.00 — $50.00, от 111.54 — 16.73, то разом $66.73 Число літ теперь уж не вплыват на высоту місячной пенсии.

Из того видиме, што найвысшу пенсию получит тот робочий, котрый робит постоянно, без перервы, на роботі, обнятой социальным обеспечением, бо тогди його “середня місячна платня” не снижатся. Єсли он часто лишат роботу по причині слабости, або тратит роботу и получає ассекурацию по безроботью, то його “середня місячна платня” понижатся.

По старому закону робочому стягали процент на социальне обеспечение лем с зароботной платни до 3,000 долларов рочно. Єсли робочий заробил больше, як $3,000.00 на рок, то заробок поверх $3,000.00 не рахувался до социального обеспечения. По новому закону 1950 року до соц. обеспечения рахуют платню до $3,600.00 рочно. Так ныні найвысша пенсия, яку робочий може выробити, єсть $80.00 місячно. Таку пенсию он получит, єсли його “середня місячна платня” буде $300.00. Тогди по новому закону от первых $100.00 рахуєся 50% — $50.00, а от $200.00 15% — $30.00, разом $80.00.

Штобы быти “полно обеспеченным” и мати право на таку пенсию, робочий мусит выробити означенный час на роботі, обнятой социальным обеспечением. По старому закону треба было мати по крайньой мірі половину такых календарных кварталов, в котрых робочий заробил 50 долл. або больше на роботі, обнятой социальным обеспечением, но не меньше як 6, рахуючи от дня вступления в силу закона (1 января 1937) до часу, коли робочий досяг 65 літ житья. Но робочий, котрый выробил 40 такых кварталов, был “полно обеспеченым” на ціле житья, хоц бы больше николи не робил на роботі, обнятой социальным обеспечением. 40 кварталов означат 10 літ, так робочы, котры робили постоянно от 1937 до 1947 року на роботі, обнятой социальным обеспечением, мают “полне обеспечение” на ціле житье, хоц бы потом перешли на таку роботу, где не стягают с пейды на социальне обеспечение, або перестали цілком робити. Коли такий робочий дойде до 65 року житья, то он має право домагатися свойой пенсии. А як он умре перед 65 роком, то його найблизша родина, указанна в законі, має право домагатися пенсии або выплаты одноразовой суммы ассекурации.

Новый закон облегчил то настилько, што начинаючи с сентября 1950 року кажда особа в віку 65 літ и старша може получити пенсию, єсли має по крайньой мірі 6 календарных кварталов роботы, обнятой социальным обеспечением, на котрой плата не была меньше, як 50 долларов в каждом из тых кварталов.

2. Коли муж по осягнении 65 літ житья получил пенсию на основі закона о социальном обеспечении, то и його жена, єсли єй минуло 65 літ, так само має право на додаткову пенсию, хоц она не робила николи на роботі, обнятой социальным обеспечением. А и на діти неженаты в віку ниже 18 літ они получат додаток до пенсии. Жена получає половину пенсии мужа и нежената дітина в віку ниже 18 літ так само половину.

То значит, што робочий на пенсии социального обеспечения, котрый жиє с женом в віку выше 65 літ и с одном неженатом дітином в віку ниже 18 літ, буде получати свою пенсию и друге стилько разом на жену и дітину. Єсли його лична пенсия выходит, напримір, на 64 долл. місячно, то разом с женом и одном дітином он буде получати $128.00 місячно.

3. Єсли жена має свое особисте право на пенсию, бо она сама робила в роботі, обнятой социальным обеспечением, и єй стягали с пейды на социальне обеспечение так, што она єсть по закону “полнообеспечена”, то она по осягнении 65 літ житья може выбрати собі, яку пенсию хоче получати: або на основі свого власного обеспечения або на основі обеспечения мужа. Звычайно, єй будут платити тоту пенсию, котра приносит больше.

По новому закону 1950 року и муж, котрый не был обеспеченый и не получає пенсии, може домагатися пенсии на основании социального обеспечения свойой жены, єсли жена получає пенсию. Но такий муж мусит доказати, што он не має средств до житья и залежит от поддержкы свойой жены, котра робила на социальне обеспечение.

Тото ограничение не стосуєся до жены, котра получат пенсию на основании социального обеспечения свого мужа, ани до малолітных дітей. Они можут мати свои маєткы и доходы, но пенсию на основании обеспечения мужа або отца можут получати.

4. Єсли полнообеспеченый робочий помре, безрозлично коли, ци перед осягнением 65 літ житья, ци послі, як уж сам начал получати пенсию, то вдова по ньом и малолітны діти получают посмертну місячну запомогу.

Вдова без малолітной дітины получит місячну запомогу послі осягнения 65 літ житья и буде получати три четверти той пенсии, яку получал бы єй муж.

Вдова с малолітными дітьми получит вдовью пенсию без огляду на свой вік и буде получати єй так долго, доки наймолодшой дітині не исполнится 18 літ. Єсли в тот час, як всі діти выросли, вдова ище не має 65 літ, то місячна пенсия по умершому мужу буде єй прервана. Но послі осягнения 65 літ житья она має право получати наново тоту пенсию.

Єсли вдова выйде замуж, то тратит зараз право на вдовью пенсию по первом мужу.

Діти умершого отца, котрый был полнообеспеченным на основании закона о социальном обеспечении, получают місячну пенсию — по половині той пенсии, на яку мал право их отец, аж до 18-го року житья.

Но як вдова, так дітина не получит пенсию, єсли они пойдут до роботы, заробляючи поверх 50 долларов місячно. Но єсли вдова зараблят поверх 50 долларов місячно, то она тратит лем право на свою вдовью пенсию, а малолітны діти под єй опіком мают дальше право получати пенсию по свому отцу.

Дітина може получити місячну пенсию так само послі матери, єсли мати была полнообеспечена.

5. Єсли полнообеспеченный робочий не оставил ни жены ни дітей, оправненных до запомогы на основании його социального обеспечения, то його стары родиче, в віку выше 65 літ, можут получити місячну запомогу, о скилько буде доказано, што в момент свойой смерти он давал им головне утриманье.

6. В гдеякых случаях може быти выплачена послі смерти обеспеченного робочого посмертна запомога в одной суммі, єсли не осталось послі него особ, оправненных сейчас до місячных запомог, напримір молодой бездітной вдові, родичам, або на покрытье коштов похорону.

О всі тоты запомогы, пенсии и выплаты треба робити поданья до уряду социального обеспечения, бо сам уряд не начне выплачати их, доки не получит прошения. Уряд социального обеспечения не може знати, коли тот або другий обеспеченный робочий помре, або перестане робити.

Єсли вы робили пару літ на такой роботі, где стягают с пейды на социальне обеспечение, то вы мате право на місячну пенсию по осягнении 65 літ житья. В случаю, єсли вы перестаєте робити по 65-ом року, або не выробляте веце як 50 долл. місячно, то подайтеся зараз о тоту пенсию, бо можете стратити то, што вам належится по закону. Уряды социального обеспечения выплачуют пенсию лем за три місяцы назад от даты внесения поданья. Так само в случаю смерти обеспеченного робочого посмертны запомогы и пенсии його наслідникам начинают выплачати лем за три місяцы назад от даты поданья. Значит, єсли родина внесла поданье 6 місяцев послі смерти отца, то запомогы за три місяцы вдова и діти уж стратили, бо уряд социального обеспечения с выплатом не цофнеся дальше, як три місяцы от дня получения прошения.

Принятый Конгрессом в 1950 року новый закон Социального Обеспечения росширил тоту систему социального обеспечения на 10 миллионов новых особ, котры по старому закону не подпадали под тото обеспечение. От 1951 року в США социальным обеспечением буде охвачено до 45 миллионов людей.

По старому закону социальным обеспечением были охвачены лем роботникы, котры працуют для другых и получают зароботну платню. А и роботникы не на всіх роботах были так обеспечены. Теперь от 1 января 1951 року в систему социального обеспечения будут втягнены и особы, котры працуют сами для себе в свойом власном бизнесі або в партнеркі. Єсли человік має свой бизнес и заробит чистого доходу рочно поверх 400 долларов, то он подпадат под новый закон о социальном обеспечении. Роботнику в фабрикі стягают на социальне обеспечение с його платни, а люде, котры працуют сами для себе, будут платити на социальне обеспечение процент от свого доходу разом со своим доходовым податком (“инком-текс”). Первый взнос на социальне обеспечение они уплатят в 1952 року, коли будут платити “инком-текс” за 1951 рок. На бланках, котры выполняются для уплаты “инком-тексу”, буде специальна табличка для обрахунку социального обеспечения. Податковый коллектор, як получит выполненный бланк доходового податку, то оторве тоту табличку и перешле до уряду социального обеспечения, где будут тримати рекорд доходов тых людей, подобно як ныні тримают рекорд платни, получаємой робочым.

Тоты люде будут платити на социальне обеспечение за 1951-1953 рокы 2½% от свого доходу, а потом от 1954 до 1959 року 3%. Кто буде мати доходу больше, як $3,600.00 рочно, то до соц. обеспечения буде рахуватися лем 3,600 долл., и от той суммы буде платити процент.

Но не всі люде, котры працуют для себе, были включены в систему социального обеспечения. Напримір, докторы, адвокаты, архитекторы, профессиональны инженеры, погребникы (“ундертейкерс”) и т. п. не включены. Так само фармеры на своих власных фармах не включены. Но фармерскы роботникы, котры працуют для фармера и заробляют грошевой пейды по 50 долларов або больше квартально, будут обняты социальным обеспечением. Так само домашня прислуга включена в социальне обеспечение.

Всі тоты новы категории обнятых социальным обеспечением людей будут мати тоты самы права до пенсии на стары рокы, а их родина до посмертной запомогы и пенсии, як и робочы, котрым обтягают с платни на социальне обеспечение.

Бизнесмены и профессиональны люде, охваченны новым законом о социальном обеспечении, будут мати свои карткы и номеры социального обеспечения, як и робочы по фабриках. Бизнесмен або профессионал, котрый не робил николи для другого за платню и не має ище карткы с номером социального обеспечения, должен достати таку картку в найблизшом офисі социального обеспечения перед тым, як буде выполняти свой “инком текс” бланк в 1952 року.

Кто из обеспеченных робочых получал уж в сентябрі 1950 року місячну пенсию по старому закону, то в октябрі того же року он получил подвышку без всякого старания або прошения с його стороны, бо новый закон установил розміры подвышкы для тогдашных пенсионеров. Из приведенной табличны можна видіти розмір той подвышкы:


Сентябрь 1950 Октябрь 1950
$10.00 $20.00
$15.00 $30.00
$20.00 $37.00
$25.00 $46.50
$30.00 $54.00
$35.00 $59.20
$40.00 $64.00
$45.00 $68.50

Подвышку місячной пенсии получили и члены фамелии обеспеченного робочого (жена, вдова, діти, родиче), котры получали уж пенсию в момент, як новый закон вошол в силу. Но так як высота пенсии членов фамелии робочого зависит от розміра пенсии самого робочого, то специальной табличны для членов фамелии не треба подавати. Кто из них получал половину місячной пенсии самого робочого по старому закону, то получил половину новой подвышенной пенсии.

В каждом большом місті, а в фармерскых районах в каждом окружном місті (каунти) суть федеральны офисы социального обеспечения и бюро ассекурации старости и посмертной запомогы. За всякыми информациями в ділах социального обеспечения можна звертатися в тоты установы, и там треба подавати заявления о пенсии и запомогы на основі закона о социальном обеспечении. Не забывайте, што на тоту запомогу вы платите, як и на всяку иншу ассекурацию, бо вам стягают с вашой платни, то запомога вам и членам вашой фамелии належится правно, коли вы исполнили условия, предписанны законом. Єсли вам дашто неясно, то вы можете в каждый час зайти до того федерального офису и просити пояснения.

[BACK]