Культурне житье в Лемковском Домі в Кливланд, Огайо

Найтруднійшом проблемом в культурной діятельности каждой организации,| то брак свого поміщения. Тота трудна проблема существовала во всіх меньшых и большых отділах Лемко-Союза от самого основания. Культурне розвитие, для якого найбольше была основана наша организация, занепадало, а сами отділы роспадалися через брак свого поміщения для культурной роботы. И длятого в мысли и чувствах передовых людей нашой организации все тліло стремление набыти для свойой организации, для свого отділа дом, где мож бы было розвивати наше культурне богатство, передавати славны народны традиции нашому молодому поколінню и ознакомляти с ними нашых сусідо в чужых народностей, котры стыкаются с нами в штоденном емигрантском житью.


Children
Народный Дом Лемко-Союза в Кливланді. Сцена в головном залі: Выступают с танцом Андрей Н. Цисляк и Тини-Джин,
пригравают Александр Співак и Рослин Тролика.


За старанием передовых людей-пионеров и жертвенных патриотов, членов Лемко-Союза, в городі Кливланді был набытый прекрасный двоповерховый будинок, отповідный для ведения широкой культурно-народной роботы. Тут под одным дахом поміщатся клубовый зал, канцелярия уряда містного отділа, комната на членены собрания, квартиры для двох семейств, вынаймлене поміщение под друкарню и гарадж на дві машины. В подвалі поміщатся столова комната на двасто особ, кухня, варстат, огрівальня воздуха и воды и ряд другых поміщений для домового ужитку. На вышньом поверху находится головна галя и балкон, где помістится поверх 600 людей, бочны комнаты для кухни и почестунку и комнаты для удобства при сцені и галі. Дом не лем был купленый, но под добрым руководством быстро приведеный до порядку и славы и приспособленый до ведения культурной діятельности. Лемкы и всі другы народности в Кливланді получили наглядный примір, што в культурно-просвітительной организации за короткий час можна провести громадну роботу и высоко подняти добре имя и престиж организации. Напримір:

Ище лем минувшого року в нашом календарі Л. С. была поміщена фотография прекрасно устроєнной сцены нашого дома, с видом на лемковске село, украшенной емблемом Лемко-Союза. Сцена прекрасна, но она была тиха, як пустыня: на ней не было видно живой душы. Єсли нам треба было устроити концерт, мы нанимали чужы силы, або спроваджали своих из другых місцевостей. До рока у нас зашла велика зміна. Найлучшым доказательством того суть тоты фотографии успішных представлений, поставленых уже власными отділовыми силами за протяг минувшого 1950 року.


Matters
Народный Дом Л. С. в Кливланді: Сцена из представления “Лемковскы спросины”, отогранного 28 февраля 1950 року.

В февралі минувшого року поставлено представление “Лемковскы Спросины” — традицийный обычай нашых предков, а в маю с громаднійшым успіхом поставлено “Лемковске Весіля”, на котром было множество народа с самого Кливланда и с далекых околиц Америкы. Представление было так удачно составлено и отограно, што оно получило широкий отголос по всей Америкі. Другий раз с такым же успіхом оно было поставлено в июлі місяці в поблизком місточку Лорейн, Огайо. Наш драм-кружок получил предложение от Комитета 5-го Округа Л. С. дати тото представление в Питтсбургу, Пеннсильвания, в мясницях 1951 року и про отділ Л. С. в Детройт, Мичиган, на весну 1951 року. Єсли нам удастся выполните тоты предложения, то наш народ буде мати наглядный доказ, што значит свой дом в культурно-просвітительной организации. На велике требование місцевой кливландской публикы, “Лемковске Весіля” ище раз буде поставлене в Кливланді, в нашом домі, в честь делегатов 16-го Съізда Лемко-Союза, котрый тут состоится под осень сего року. В октябрі минувшого року у нас было поставлено представление “На граници”, в котром ясно выражено историчне стремление лемков и их борьба за свободу и єдинство лемковского краю. Кромі выше упомянутых предприятий, в 1951 року в нашом домі буде поставлено пару другых предприятий народного характера. Громадный успіх тых предприятий, завдячуєме тому, што они суть выдержаны в чисто лемковском характері и в составлении их операмеся выключно на нашы власны кливландскы культурны силы. Приміром, представление “ Лемковскы Спросины” было написано нашом членкиньом Мариом Телех. “Лемковске Весіля” было сложено из предложений самих акторов, якы обрисовали обычаи тых сел, из котрых они походят, а представление “На граници” было дано под руководством свого автора.


LemWed
Народный Дом Л. С. в Кливланді: Участникы “Лемковского Весіля”,
отогранного 28 мая 1950 р., на сцені в головном залі.


Из поміщенных тут фотографий читатель зауважит, што и молоде житье появилося на нашой сцені — маленькы танцоры и музыканты. Их ище немного, но они уж суть, готовы к выступлениям, то к ним помалы прилучатся и другы, такы котрым ани не снилося выступати даколи перед публиком. В ноябрі минувшого року при Лемко-Союзі для лемковскых дітей была открыта школа русской грамоты, а так буде организована группа народных танцев.


OnBorder
Народный Дом Лемко-Союза в Кливланді: Аматоры, котры отограли представление “На Граници” 15 октября 1950 р.

Кромі концертов и представлений, в Лемковском Домі отбываются часто другы народны и семейного характера торжества, на котры сходится наш народ и проводит час в близком приятельстві и краянской атмосфері. Николи незабытным народным торжеством останеся юбилейный праздник женского отділа Л. С., отпразднованный в маю 1950 року, на котром пионеркы того отділа были одарены прапором Лемко-Союза, котрый потом был представленый делегатам на 15-ом Съізді Лемко-Союза в Юнкерс, Н. Й.


LemkoHomeView
Народный Дом Лемко-Союза, ч. 6, в Кливланді, штат Огайо.

В Домі Лемко-Союза поміщатся клуб, котрого стіны розмалюванні артистично и представляют собом красоту природы карпатскых гор и вид на лемковске село. Перед полотнами выступат ряд ляльок, убранных нашыми членкинями Л. С. в лемковскы костюмы, а меже ними рухомы електричны освітления с надписом: “Витайте в Лемковском Домі”. Слава о Лемко-Клубі поширена на весь город Кливланд, но найбольше приятно он дійствує на лемковскых визиторов, котры тут приізжают в час вакаций из цілой Америкы и Канады. Каждый лемко, коли увидит красоту свого любимого лемковского краю, почує бесіду, співы и музыку своих народных мелодий, чувствуєся обновленным на духу.

Наш клуб має свою особливость — он стался місцем культурного отдыха и розрады, где находят свою потугу нашы місцевы и далекы краяне. Наш Лемковский Дом в Кливланді стал служити лемковскому народу, для чого он был основаный, и свою діятельность буде дальше вести и розвивати.

Радуючися великым успіхом, осягненным в народной діятельности, нашы отділы в Кливланді с гордостью встрічают 20-літный юбилей свойой любимой организации Лемко-Союза.


Николай А. Цисляк.



[BACK]