С Лемковского Весіля в Америкі— Стефан Ткач, Stefan Tkach

В городі Кливланді, Огайо, в Лемковском Народном Домі, отбылося 4-го сентября 1949 года весіля, с котрого фотографии поміщены ниже.

Женилися молоды американски уроженцы Йосиф Барна, из Кливланд, О., с Любком Ковалик, из Акрон, О., котры родились и выросли в Америкі, но их весіля назвали Устьянскым весільом, бо мамы молодых суть устьянкы, родом из Устья Русского, повіт Горлицы. Отцове молодят родом из иншых сел, но так само на нашой старой Лемковщині.

Отец молодого, Игнатий Барна, родился в селі Климкивка, повіт Горлицы, а мама, Мария Дзьоба — из Устья Русского.

Отец молодой, Иван Ковалик, родился в селі Граб, повіт Ясло, а мама, Стефания Пейко — из Устья Русского. Брат Стефании Владимир Пейко был широко знаный меже нашом лемковском емиграциом в Канаді и США, бо он трудился с найвысшом самопосвятам для добра нашой народной организации Лемко-Союза. Зламанный тяжкыми условиями житья в часі великой депрессии в Канаді, он умер предвчасно, в молодом ище віку.


Wedding1
На Устьянском весілю в Кливланді. Молода пара с дружками и дружбами: (Сліва направо) молода друженька Соня Ковалик, перша дружка Меляния Пырч, друга дружка Дарка Ковальчик, третья дружка Елена Лопецка, свашка Евфимия Цисляк.

Молодица Любка Варна, молодый Иосиф Варна, староста Дорофей Ковальчик, первый дружба Стефан Ковалик, другий дружба Стефан Вахновский и третий дружба Стефан Кобеляк.


Вінчание молодой пары отбилось в Русской Православной церкви в Кливланді. Обряд вічания совершил прот. Капанадзе. Послі вінчания всі весільны гости переіхали пару блоков до Лемковского Народного Дома, где была приготовлена богата гостина кухарками из Акрон.

Столы были уж накрыты, и коли гости позасідали, то весільный староста Дорофей Ковальчик, краян из Устья Русского, постукал по столу и попросил всіх стати и по старому обычаю помолитися Господу Богу, як то бывало и у нас дома в родном краюю. Гости встали и проспівали “Отч Наш”, а так стали ся угощати. Послі доброго угощения староста призвал гостей пожелати молодятам благоденствия и поблагодарити их и родичей за гостеприимство. Всі встали и проспіві “Многая літа”.


Wedding2
Устьянске весіля в Кливланді: — На поправинах в Лемковском Народном Домі.

На великой галі грала уж оркестра, так теперь туда перешло весіля. И музыканты были свои — молоды хлопці-устьяне из Карнеги, Пенн. Диригентом оркестры был сын Теодосия Вахновского, славный музыкант на цілу Питтсбургску околицу. Тут всьо вышло, як бы по плану. Молодшы пустилися до танцу, а старшы до співу.

Я ту подам, кого я там виділ из близкой родины и краянов:

Тета молодого Татьяна Дзьоба с дочком из Сейнт Катрен, Канада; Любка Крайняк, из Виндзор, Канада, и Мирон Вахновский из того самого міста; Еди Плясконь и його жена Меляния зо сыном из Детройт; Андрей Коблош, жена Меляния и діти из Чикаго; Варвара Мацканич с дочками и зятями из Карнеги (Пенн.); Теодосий Вахновский с цілом фамилиом из Карнеги и миссис Пырч с дочком и сыном из Карнеги.


Wedding3
Устьянске весіля в Кливланді: — На поправинах в Лемковском Народном Домі.

Иван и Андрей Мацканич из Ембридж (Пенн.); Симеон Войтович со женом из Ири; старый стрык молодой Андрей Пейко; адвокат Иван Ткач со женом из Акрон; старушка Землянска и єй дочка из Акрон; София Микуляк с мужом, Демьянович и фамелия, Креничин и фамелия; Стефан Пырч и дві дочкы с мужами; миссис Малецка и дочка; Наталия Михальска с мужом (всі из Акрон); Евфрозина Костельна с дочком из Лорейн; Иван Ковальчик с дочком из Лорейн; Параскевия Врона с дітьми из Лорейн; тета молодой миссис Давид и ціла фамелия из Воррен; миссис Барна из Воррен; миссис Костишак из Воррен, Анисия Федоровска с мужом; Иосиф Колдевский из Нью Джерзи.

Може я гдекого пропустил, бо то с памяти пишу, а народу было полно. Нашых гостей из Кливланду было тоже немало, ани их не мож перечислити. Я сам был на весілю, але не мог всього спамятати, тилько то памятам, же-м собі заспівал с краянками.


Стефан Ткач.



[BACK]