На Чужині — И. Фрицкий
Тяжко жити на чужині,
Тяжко привыкати,
А найтяжше нашым лемкам
Родный край згадати.
Коли собі пригадаю
Родну Лемковину, —
Жаль на сердци, слезы в очах,
Мало не погину.
Як же-ж маме не тужити,
Родных не згадати —
Так зостала Лемковина,
Як без дітей мати?
Плаче наша Лемковина,
Вспоминат за нами,
Вода черчит по потоках,
Вітер рве верхами.
А мы лемкы на чужині
Во сні вспоминаме:
Лемковино, краю родный,
Право на тя маме.
Хоц нас били, катували,
Прогнали зо сбого,
Мы николи не забудем
Краю лемковского.
Бо и як же-ж мож забыти,
Та-ж мы там выросли?
Нашы родны там зостали,
Мы до світа пошли.
Коли пришла друга война
И стрясла краями,
То помстились нашы врагы
Над нами лемками.
Приписали чорну пляму
На нашу родину,
В такий способ мы стратили
Родну Лемковину.
Все то можна поправити,
Виновных скарати,
Родный край наш лемковский
Назад лемкам дати.
Так мы лемкы просим того
От брата польского,
Штобы могли мы вернутись
До краю родного.
Штобы всі славяне братья
В доброй згоді жили
И николи одны другых
Больше не кривдили.
И мы лемкы, як вернеме
До краю свойого,
В тот час будем ровны братья
Роду славянского
А вы верхы и потокы
Там на Лемковині,
Шумте, черчте, вас чуєме
В далекой чужині.

И. Фрицкий.



[BACK]