Славянский Комитет на штат Мичиган устроил в 1947 року величавый Славянский Фестивал, в котром приняли участие всі народны славянскы группы. Я была выбрана от обох отділов Карпаторусской Секции МРО и от Лемко-Союза представляти наш народ в Славянском Комитеті, так треба было и мні поступати так, як и другы. В программі Фестиваля должны были выступити діти каждой национальной группы, то и мні пришлось глядати за нашом молодежом в Детройті.

Была то дост трудна робота, бо даже нашы передовы люде совсім не думали, же то ся даст таке дашто зробити. Но я всегда кажу, же всяку роботу можна выконати, наколи ся люде направду возмут за ню. С такым рішением и я взялася тогди до роботы. Моя сестра помогла мні трохи, и мы нашли четверо дівчат, котры мали и талант и охоту. Но ту друга біда: кто их буде вчити? Детройт — великий город и людей в нем много, але якоси мы так розметаны, же може зыйти и рокы, а один другого не видит, хоц го и добри знає.

Притом у нас профессиональных сил бракує, и коли приде дашто таке робити, то нема кому взятися за роботу.

Але якоси мы приготовили свою карпаторусску программу и выбрали дітей. Джини Герман співала по-лемковски; Рози Купчак, дочка Розалии и Френка Купчак, отограла два кавалкы на гармонии; Катерина и Наталия Гумецкы, дочкы Стефана и Юстины Гумецкых, танцовали.

Группа нашых молодых аматоров-артистов в Детройт, Мич. (Сліва направо). — Джини Фецяшко, Владимир Бен, Лилиян Фецяшко и Наталия Гумецка.

Our young amateur performers in Detroit, Michigan. (Left to right). — Jeanny Fetsjashko, Valdimyr Ben, Lilian Fetsjashko and Natalia Humetzka.

Тото дівча, што співало, научилося с рекорды. Джюди Мирек найбольше ся тым заняла и допильновала, штобы спів вышеол добре. Рози Купчак научилася от мамы, што треба грати и як. И Гумецкы дівчата училися сами дома за рекордом на грамофоні.

С того всего клопоту нашы дівчата досталися до газеты “Детройт Ньюз” на передову страницу за то, што были файно позбераны и вывязалися добре в свойой программі. Но фотографии с них не маме под руком, тилько што вырізок с газеты остался у нас.

В 1948 року тоже треба было таке дашто робити. Но ту уж организации добрали охоты, бо попередного року на Славянском Фестивалі было много нашого народа, и дуже ся то людям полюбило. Але труднійше была добрати дівчата до нашой программа Гдекотры не могли взяти участие по своих особистых причинах (кавалеры-будущы мужове не позволили), и знова треба было глядати. Но як бы оно ни было, молодежь у нас єсть, мают они и таланты, лем треба их гдеси показати. Так мы подобрали свою группу на фестивал 1948 року в том составі, як ту видите на фотографии.

В 1948 року было лекше, бо уж и организации дали не тилько моральну, но и финансову поддержку.

В 1949 року у нас суть планы на международный фестивал, але як выйде, то не знаме ище. Признательность велика належится дівчатам и хлопцям, котры не отказуются от такой роботы для свого народа, и их родичам, котры заохочуют своих дітей брати участие в народной роботі.