Календарь

Систематично упорядкованне роспреділение часу цілого року для практичного ужитку называме Календарем.

Природном одиницом для выміру часу служит солнечна доба. То єсть тревалость одного полного обороту земли коло свойой оси. Доба ділится на 24 годины, котры знова ділятся на минуты и секунды. В одной добі маме 24 годины, або 1440 минут або 86,400 секунд.

Годины, минуты и секунды то суть условны отрізкы часу, не связанны с даякым означенным явлением в природі.

Час одного полного обходу земли коло солнца называме солнечным роком (годом). По уплыві одного року земля найдеся точно в том самом пункті свойой еклиптикы (линии єй оборота коло солнца) где была на початку року.

Вычислено, што солнечный год має 365 дней, 5 годин, 48 минут и 46 секунд.

В вымірі и поділі часу важну роль грає и рух місяца (луны). В дійствительности люде скорше начали рахувати час за місяцем, як за солнцем. Луна завершат свой оборот коло земли приблизительно в 29½ днях. Тот отрізок часу называют лунным місяцем. 12 оборотов луны коло земли выполнит 354 дни, то-єсть около 11¼ дней меньше от солнечного року. Из того взято розділяти рок на 12 місяцев. Но ріжница меже солнечным роком и 12 лунными місяцами за пару літ была бы дост значна и отсунула бы початок року в инший сезон.

Як сказано выше, солнечный рок має 365 дней, 5 годин, 48 минут и 46 секунд. Из того видно, што солнечный рок не можна розділити ани на ровне число місяцев ани дней. А в практичном житью мы хочеме мати рок с ровным числом дней и місяцев. Тот практичный рок мы называме гражданскым або цивильным роком. Но гражданский рок може лем приближатися к солнечному, а на ділі не може николи выровнатися с ним.

Европейскы краины и Америка приняли свой гражданский рок от Рима. Так и нашы календари показуют тот гражданский рок.

Католицкы и протестантскы краины уживают Григорианский календарь, або календарь нового стиля. Православны краины ище донедавна уживали старого стиля календарь, т. зв. Юлианский. Часто можна чути от сторонников старого стиля: “Мы не хочеме римского календаря”. Но як Григорианский, так и Юлианский календарь єсть “римскым” календарем, бо был заведеный Римом.

Юлианский календарь несе свое имя от римского диктатора Юлия Цезаря, котрый казал выробити тот календарь и запровадил його до ужитку от 1 января 46 року перед рождением Христовым. В том календарі рок має 365¼ дней. Но так як чвертку дня не можна включити до року, то треба чекати, аж насбератся цілый день и тогди додати го. Длятого по Юлианскому календарю каждый четвертый рок єсть “переступный” и числит не 365, а 366 дней, причом додатковый день додаєся до найкоротшого місяца — февраля.

Юлианский календарь ровнал бы ся с солнечным, єсли бы солнечный рок мал 365 дней и 6 годин, бо тогди тых 6 годин за 4 рокы зробили бы 24 годины, то-єсть цілый день. Но солнечный рок єсть о 11 минут и 14 секунд коротший. То дост мала ріжница, но за 128 роков из того назбератся цілый день, а за 400 роков приблизительно три дни.

В 16-ом столітии ріжница меже Юлианскым календарем и солнечным часом превышала 10 дней. Папа Григорий ХІІІ за дорадом ученых астрономов объявил новый календарь, и в 1582 року посунули календарь на 10 дней вперед — заміст 5 октября рахували 15 октября. От 1582 до 1700 ріжница меже старым и новым стилем была 10 дней, от 1700 року до 1800 — 11 дней, от 1800 до 1900 — 12 дней, а от 1900 до теперь 13 дней. Тота ріжница росне от того, што по Юлианскому календарю рокы 1700, 1800 и 1900 были переступны, а по Григорианскому просты.

Як сказано выше, ріжница меже Юлианскым календарем и солнечным часом за 400 літ робит приблизительно три дни. Григорианский календарь устранят тоту ріжницу так, што при конці каждого столітня пропускат один день, за вынятком каждого четвертого столітня. Напримір, рокы 1700, 1800 и 1900 не были переступны по Григорианскому календарю, но год 2,000 буде переступным, як и по Юлианскому календарю.

Але и при всіх тых поправках Григорианский календарь так само не покрыватся точно с солнечным часом. Пересічный рок по Григорианскому календарю даст 365 дней, 5 годин, 49 минут, 12 секунд, а солнечный рок єсть 365 дней, 5 годин, 48 минут и 46 секунд, так ріжница єсть 26 секунд. Рок по Григорианскому календарю єсть о 26 секунд за долгий. В 3,323 роках то зробит цілый день.

Григорианский календарь был заведеный в Испании, Португалии и в гдеякых частях Италии того самого дня, як и в Римі. Во Франции был заведеный в декабрі того самого року, в католицкых частях Германии аж слідуючого року, а в протестантскых краинах Германии держалися Юлианского календаря до 1700 року. В Англии закон о новом календарі принято в 1750 року и на основі того закона с 2 сентября 1752 зроблено 14 сентября. Россия в свойом гражданском календарі держалася старого стиля аж до Великой Октябрьской революции.




[BACK]