Нова история Киевской Руси

Московский Державный Университет имени М. В. Ломоносова выпустил в 1948 року новый учебник истории Совітского Союза, предназначеный для неисторичных факультетов высшых учебных заведений. Учебник написали два авторы: член-корреспондент Академии наук СССР М. Н. Тихомиров и кандидат историчных наук С. С. Дмитриев. Том І обнимат историю Руси и другых народов Совітского Союза с найдавнійшых часов до 1861 року.

Ниже передаєме по тому учебнику историю Киевской Руси. В русской истории период перед татарскым нашествием зачисляют до Киевской Руси и называют киевскым периодом.

В учебнику М. Н. Тихомирова и С. С. Дмитриева история Киевской Руси написана по новому — на основі найновшых историчных данных. Совітскы учены провели громадну роботу по росслідованию историчных памятников и ріжных материалов, дотыкаючыхся початковой истории русского народа, и ныні совітска исторична наука дає инакше объяснение цілого ряда фактов истории Киевской Руси, як давала старша наука, 30—40 літ тому назад.


* * *

1. ПЕРВЫ ВІДОМОСТИ О СЛАВЯНАХ

В числі другых народов, населявшых с давных часов территорию Восточной Европы, находиме славян. Первы вісти о славянах встрічаются в І віку нашой еры, коли они упоминаются римскыми писателями. Но то суть найстаршы письменны упоминания о славянах, котры сложились в опреділенну группу племен много давнійше. Учены находят предков славян ище серед тых племен, котры были извістны Геродоту в V віку перед нашом ером. Найбольше обоснована теория, котра предками славян называт невров, жившых приблизительно в районі теперішной Волыни.

Языковы исслідования подтверждают, што первобытны славяне жили осідло. На то указуют общеславянскы назвы для означенья помешканья (дом, изба) и меблей (лавка, стол). Первобытны славяне были ознакомлены с земледілием и скотоводством; так им извістны были приряды для оброботкы земли (рало, плуг, серп, борона), многы хлібны рослины (жито, овес, просо), домашня скотина (бык, вол, корова, конь, баран, овца). Славяне уміли розводити сады и огороды (яблоко, слива, оріх, боб, горох, ріпа). Полювачка и рыболовство занимали важне місце в господарском житью найстаршых славян. На то указуют загальнославянскы назвы прирядов до полювачкы и рыболовства (лук и стріла, невод). Славяне знали также употребление металлов. Им были знаны золото, серебро, мідь, желізо. Они уміли “ковати”, употребляючи для того “молот”, и были вооружены мечами, копьями, сокирами и щитами. Важно отмітити, што найстаршы славяне мали высоку общественну организацию. Они были знакомы с такыми понятиями, як “власть”, “правда” (суд), “закон”, “войско”, жили в “селах” и в “городах”, под котрыми розуміли укріпленны місця.

Все то в достаточной мірі подтверждає, што первобытны славяне к тому моменту, коли они стали извістны римскым историкам, т. є. на початку нашой еры, прошли долгий путь культурного розвития.

Римскы авторы в І віку н. е. знают славян под именем “венедов”. Географ Птоломей поміщає венедов к востоку от рікы Вислы, у берегов Венедского залива (т. є. Балтийского моря). Название “венеды” сохранилось в німецком и финском языках для обозначения славян. Позже славяне роспались на три галузи. Западна галузь сохранила стару назву венедов. От них пошли поляны, чехы и полабскы славяне, жившы по рікі Ельбі (Лабі). Южна галузь стала извістна под именем славян (или, по византийскым документам, “склавин”). Славяне, или склавины, были родоначальниками южных славян: болгаров, сербов и хорватов. Третья, или восточна, галузь славян была представлена антами - родоначальниками восточных славян.


2. АНТЫ

В период готского и гуннского господства в причорноморскых степах (ІІІ—V столітия н. е.) поселения антов росполагались к сіверу от Чорного моря, меже Дністром и Дніпром. Ту жили “бесчисленны” племена антов, якы считались найхоробрійшыми меже славянами. О житью антов подробно говорят гдеякы византийскы историкы. Головным занятием антов было земледілие и скотоводство. При роскопках антскых городищ найдено желізны лемехы для плугов и серпы, зерна проса и пшеницы. Помешканья антов, по одному византийскому извістию, представляли собом полуземлянкы, соєдиненны меже собом подземными крытыми ходами. Таке жилище предназначено было для великой фамелийной общины — головы семейства с пару сынами и их фамелиями. Стіны полуземляных жилищ антов были сплетены из галузья и обмазаны глином. В середині стояли глинобитны пецы.

“Тот народ не управляєся одным человіком, но издавна живе в демократии. Длятого о всіх справах, што для них корыстно и шкодливо, они радятся разом”. В такых словах византийский историк рисує общественный быт антов. Однако историчны жерела показуют, што серед антов выділились уж отдільны вожди, власть котрых сділалась наслiдственном, появилась приватна власность и кары за єй нарушения. Всі жерела восхваляют особисты прикметы антов: их хоробрость в бою, честность и гостеприимство, скромность антскых женщин, мягке обходженье с плінными и рабами.

В ІV в. анты вели ожесточенны войны с готами. Готскы предания говорят, што вождь готов воювал с антами, но был розбитый в первой битві. Побідивши в другий битві, готы роспяли вождя антов Божа с його сынами и 70 старшинами. Из того выглядат, што анты мали свою самостоятельну державу, и своих власных вождей. Послі розгрома готов полчищами гуннов, анты подчинились гуннам и приняли участие в походах Аттилы в числі подвластных племен. Послі розвала державы Аттилы, анты разом с южными славянами (склавинами) вели ожесточенну борьбу против Византиской империи (VІ в.). В результаті той борьбы славяне проникли на Балканский полуостров. Их напады потрясли рабовладільский строй Восточно-Римской империи и способствовали розвитию больше прогрессивного феодального строя.

В VІ—VІII вв. славяне заселили майже весь Балканский полуостров и положили начало южнославянскым державам (Болгарии и Сербии).

Появление с востока новой кочевой орды, аваров, привело к ожесточенной борьбі аваров с антами. Гдекотры антскы племена подчинились аварской власти, другы отступили на сівер в глухы лісны области. Послідны упоминания об антах относятся к початкам VІІ в., но они продолжают существовати и позднійше. Предание о борьбі антов с аварами записано и в нашой найстаршой літописи. Потомками антов были восточны славяне.


3. ВОСТОЧНЫ СЛАВЯНЕ

В VІІІ—ІХ столiтиях потомкы антов, восточны славяне, росселились по обширным просторам Восточной Европы. Основна масса их жила по верхньому и середньому течению Дніпра, к западу и востоку от него. Найдальше на сівері были поселения ильменскых славян, жившых по берегам озера Ильмень и Волхова: тут возникло місто Новгород. Самым многочисленным восточнославянскым племенем было племя кривичей. Их головны міста были: Полоцк на Западной Двині и Смоленск на Дніпрі. В глухых лісах по Березині жили дреговичы, котры получили свое прозвиско от болот и трясовин заселенной ними земли (по-білорусски “дрягва” означат болото).

Густійше от другых районов был заселеный район середнього течения Дніпра, по обом берегам той рікы. К западу от Дніпра жили древляне и поляне. Як одны, так и другы получили свои назвы от характера містности, в котрой они жили. Древляне поселились в лісах по нижньому течению Припяти, а поляне дальше к югу, аж до рікы Роси, в лісостеповых областях. В землі полян находилось місто Киев. К востоку от Дніпра жили сіверяне, якы занимали громадну территорию по обох сторонах рікы Десны. Их головным містом был Чернигов. По рікі Сожу жили радимичы, а в глухых лісах, по верхньому течению Окы и дальше на сівер до Москва-рікы — вятичы. На запад поселения восточных славян простирались в область Карпатскых гор. Найчисленнійшым славянскым племенем ту были волыняне. Славяне жили также по Дністру и Южному Бугу, аж до Чорного моря. Тоты славянскы племена носили назву уличей и тиверцев. Славяне жили и у берегов Керченского пролива, к востоку от котрого находился город Тьмутаракань, центр отдільного русского княжества в ХІ в.

Відомости о росселении восточных славянских племен мы черпаме из літописи, составленной в ХІ в. на основании старшых жерел. Тоты информации дополняются извістиями арабскых писателей и археологичными находками.

Восточны славяне к моменту створения свойой державы дошли до значительной степени культурного розвития. Найважнійшым явлением в их господарском житью было утверждение земледілия як головного занятия населения. Земледільский быт восточных славян рисуєся многочисленными археологичными находками. При роскопках ряда городищ на Украині найдено цілый набор сельскогосподарскых прирядов: лемехов для плугов, серпов, кос. Кромі того, найдено обгорілы зерна проса, овса, жита, гороха и пр. Кромі земледілия и скотоводства, немале значение мали рыболовство, полюванье и бортничество (добыванье меда дикых пчол, водившыхся массами в дуплах старых дерев по лісах). Скоры лісных звірей, воск и мюд были основными товарами, котрыми торговали в тых часах восточны славяне.

Родовы отношения у восточных славян начали уж роспадатися. На их місце пришла территориальна община, яка на Руси называлась “вервью” або “міром”. Члены общины владіли разом земльом, но уж в тых часах появилася и приватна власность на землю. Связь меже членами общины была не фамелийном, а основанном на господарскых и общественных интересах.

Роспад родового строя показался и в религии восточных славян. Поклонение покровителям рода (Роду и Рожаниці) сохранилось, но все ширше роспространялся культ обожественных сил природы. Славяне покланялись Перуну — богу грома, Даждьбогу — солнцу, Велесу — покровителю скота, богатства и торговли.

Славянскы поселения находились головно по берегам рік, якы служили удобными путями для связи. То были невеликы укріпления (“городища”), оточенны валом и деревянном оградом из вбитых в землю колов. Гдекотры славянскы городкы, удобно росположенны на торговых путях, скоро ставали племенными центрами. В перву чергу высунулись вперед городы на великом річном пути, який связувал Балтийске (Варяжске) море с Чорным (Русскым). Водна дорога из краины варягов (Скандинавии) в краину греков (Византийску империю) получила у славянских племен название пути “из Варяг в Грекы”. Тот путь начинался от финского залива и продолжался по Неві, Волхову, Ловати, Западной Двині и Дніпру до Чорного моря. На сухых участках великого водного пути, “волоках”, маленькы річны лодкы перетягались або перевозились на колесах по землі. Найбольшы славянскы городы (Новгород, Полоцк, Смоленск и Киев) возникли на пути “из Варяг в Грекы”. Особенно важне торгове значение получил Киев, к котрому сходились каравны лодок, плывшы вниз по Дніпру, Припяти и Десні.


4. ОСНОВАНИЕ КИЕВСКОЙ ДЕРЖАВЫ

Восточны славяне с давных часов мали своих племенных старшин и князей. Память об особливых княжениях. у отдільных славянскых племен твердо сохранялась даже в ХІ в. Так основателями города Киева признавались князь Кий и його братья. Потомкы Кия стали княжити у полян. Древляне, дреговичы и ильменскы славяне мали свои отдільны княжества. О племенном объєдинении восточных славян говорит арабский писатель Масуди, живший в Х в. По його словам, славяне объєдинились под властьом волынян, но тото объєдинение неодолга роспалось. Час створения первого племенного союза у восточных славян Масуди не указал, но допускают, што то было в VIII в. Так начаткы державной организации появились у восточных славян самостоятельно, в связи с розвитием производительных сил, приватной власности и классов.

О возникновении Киевской державы урывковы відомости приносят літописи и гдеякы чужеземны авторы. Так, в греческых жерелах говорится о рускых нападениях на крымскы володінья Византийской империи. В 860 р. русскы облягали Константинополь, и спасение византийской столицы от “безбожного” народа “русь” греческе духоредстро приписувало вмішательству надприродных сил. В 839 р. посланцы от русского кагана появились при дворі германского императора Людвика Благочестивого (киевскых князей подобно хазарскым и аварскым властителям называли каганами). Так суть всі основания утверждати, што Киевска держава уж существовала в первой половині ІХ в. Наша літопись дійствительно называт двох князей, сидівшых в Киеві — Аскольда и Дира. Тоты имена извістны и арабскым жерелам, по котрым княжение Аскольда относится к началу Х в.

На чолі объєдинения восточнославянскых племен стояли поляне, в страні котрых найдены остаткы многых городищ, роскиненных на юг от Киева в напрямі до рікы Рось, притока Дніпра. Сама Киевска земля в памятниках Х-ХІІ вв. именовалась Русью, а жители єй русинами. Як можна допустити, Русью первоначально называлась краина полян, жившых по рікі Рось и єй притоку Россаві. Позднійше тото название могло поширитися на всі земли, населенны восточными славянами.

В ІХ в. в землі ильменскых славян и кривичей появляются пришельцы из Скандинавии, норманны, или “варягы” (по русской літописи). По річным путям они проникают в глубь краины и захвачуют власть над окрестными племенами. О борьбі с варягами говорится в “Новгородской літописи”. В ней упоминаєся и славянский старшина Гостомысл, поднявший восстание против варягов. Сами варягы не отзначувались высокым уровнем культурного розвития и быстро змішувалися со славянами, утрачуючи свой язык и обычаи. Літопись передає, што ильменскы славяне, кривичы и чудь скинули господство варягов, но стали ворогувати меже собом.

Желаючи покончити роздоры, они послали за помочом к варягам, котры, по словам літописца, назывались Русью. На призыв будто бы откликнулись три браты — Рюрик, Синеус и Трувор, и стали княжити в землі ильменскых славян. Послі смерти братов Рюрик продолжал княжити в Новгороді. Його наслідником был малолітный Игорь.

В оповіданью літописи о призвании варягов єсть много недостовірного. Призвание Руси, по літописи, мало місце в 862 року, но византийскы и западны историкы знают о Руси задолго перед том датом. Літопись говорит, што варягы назывались Русью, но в Скандинавии не было племени с такым названием. А тымчасово Русью называлась с давных часов Киевска земля. И саме родство Игоря с Рюриком не было вполні установлене. Длятого и название династии киевскых князей династиом Рюрика являєся условным. Літописец створил свою теорию о началі Русской державы и писал о событии, котре случилося 200 літ тому назад, на основании устных оповідань и власных догадок.

Утверждение динанстии Рюрика в Новгороді, если даже допустити достовірность того факта, пришло послі возникновения русской державности на югі, в районі Киева. Творцами русской державности были не варягы, а сами восточны славяне, культура котрых розвивалась самостоятельно и была выше норманской культуры VІІІ и ІХ вв.


5. КИЕВСКА ДЕРЖАВА В Х В.

Первыми киевскыми князьями, объєдинившыми под свойом властьом майже всі племена восточных славян, были Олег и Игорь. Подчинение отдільных племен киевскым князьям держалось тилько на силі. Длятого переход власти от одного киевского князя к другому не все был мирным, бо подчиненны племена отказувались платити дань новому князю. Но у князей была своя дружина, котра кормилась из собираємой дани. Значение дружины як основной силы выражено в словах одного киевского князя: “серебром и золотом не найду дружины, а с дружином найду серебро и золото”. В опреділенну пору року князь разом с дружином выберался в “полюдье” для сбора дани. Часто сбор дани перемінялся на ділі в грабительску експедицию, встрічавшу сопротивление со стороны покоренных племен.

Игорь погиб в Древлянской землі (945), коли по настоянию свойой дружины пробовал другий раз собирати дань с древлян.

Киевский князь был “великым князем русскым”, котрому подчинялись “світлы” князі и бояре. Внутренны связи в Киевской державі замітно укріпляются в 2-ой половинi Х в. Вдова Игоря, княгиня Ольга, правивша в малолітство свого сына Святослава, зробила порядок с собиранием дани в Новгородской землі и установила місця сбора — дани “погосты”. Но всетаки объєдинение восточных славян даже в самом конці Х в. было неполным. Так, полоцкий князь Рогволд был самостоятельным владітелем, а глуха страна вятичей в верховьях рікы Окы даже в ХІІ в. мала своих князей и старшин.

Головными продуктами, якы Русь сбывала на рынках Константинополя, были скоры пушных звірей, воск, мюд, и рабы, захваченны в непрерывных войнах. Отсюда русскы товары широко роспространялись по Средиземноморью, так як Константинополь в тых часах мал значение найголовнійшого международного рынка. Византийский император Константин Багрянородный, живший в Х в., подробно описує подорожь русскых купцов в византийску столицу (Константинополь, Царьград). Ище в зимі русскы приготовляли лодкы “однодеревкы”, сділанны из цілкового грубого дерева. На весну лодкы спускались к Киеву. Отсюда выплывал караван лодок по Дніпру до Чорного моря и Константинополя. Найбольше небеспечным пунктом были дніпровскы порогы, где купцов подстерегали печенігы, бо ту лодкы переправлялись через порогы на порожньо, а товары под охороном вооруженных людей перевозились по суші. Послі счастливого прохода через порогы караваны достигали устья Дніпра и коло западных берегов Чорного моря плыли к Константинополю. Русскы купцы остановлялись в предмістью Константинополя и могли появлятися в самом городі тилько в товаристві представителя византийского императора и без оружия, штобы не было драчок и кровопролития с місцевым греческым населением.

Права русскых купцов в Константинополі обеспечались силом русскым князей, морскы походы котрых к берегам Византийской империи представляют выдающеся явление средньовіковой истории. Первый такий поход датуєся 860-м роком. Один византийский писатель ІХ в. описує невіроятну панику, причиненну тым походом в греческой столиці. Особенно замічательным был поход Олега в 911 року. В літописном оповіданью о том поході трудно отділити выдумку от правды. Літописец передає, што Олег приплыл под Царьград на 2 тысячах кораблей, на каждом из котрых было по 40 воинов. Грекы были примушены згодитися платити дань Олегу и заключили с ним договор, знаный нам по русской літописи. Другий, меньше удачный поход на Царьград совершил Игорь. Он тоже закончился заключением нового договора.


6. ПОХОДЫ СВЯТОСЛАВА

Великого розмаху набрали походы Святослава, сына Игорям Святослав воювал с Хазарскым царством и наложил дань на ясов (осетин) и касогов (черкесов) на Сіверном Кавказі. Поход против хазар нанюс непоправимый удар Хазарской державі и был одном из причин єй роспада.

Ище больше значение мали походы Святослава в Дунайску Болгарию. Болгарскы и русскы поселения стыкались непосредственно по нижньому течению Дуная, к котрому прилегали поселения уличей и тиверцев. В VІІІ—Х вв. Болгария представляла собом могучу державу с розвитом культуром. Усиление Киевской державы совпало с ослаблением Болгарии в 2-ой половині Х в. при слабом и находившемся в подчинении у византийского императора царі Борисі ІІ.

Византийский император, задумавший утвердитися на Дунаю, рішил нанести удар Болгарии с помочом русского князя Святослава, котрый прославился як блестящий полководец. Он предложил Святославу напасти на болгаров. Святослав згодился помочи византийской императору, и Болгария была быстро завоювана войсками киевского князя (968). Тому способствовали отчасти и сами болгары, котры желали выужити помоч русского князя для борьбы с греками. Святослав основал нову свою столицу в Малой Преславі (по русской літописи — Переяславец), в устью Дуная и назвал тот город центром своих владіний (“то єсть середа в земли моей”). Византийский император, занепокоєнный тым сосідством, подкупил печенігов, штобы они напали на Киев. То заставило Святослава поспішити на Русь. Розгромивши печенігов, он знова вернулся в Болгарию. Русскы взяли болгарску столицу, Великий Преслав, и захватили в плін царя Бориса, оставивши йому знакы царского достоинства. Святослав перешол Балканскы горы, занял Филиппополь и подошол к Адрианополю, угрожаючи непосредственно византийской столиці. Новый византийский император, Иоанн Цимисхий, примушеный был собрати громадне войско для отпора русским. Святослав отступил на сівер, но слідуючого року он знова перешол Балканы и, не встрічаючи сопротивления, начал быстро продвигатися в глубь греческых владіний. Але Цимисхий тымчасово, занявши горны проходы в Балканах, рушил с войсками к Преславі и послі кровопролитной битвы занял єй. Святослав поспішно отступил к Доростолу (Силистрии) на Дунаю, где русскы завзято оборонялись, но примушены были заключити мир с греками и уйти из Болгарии. На обратном пути в Киев у дніпровскых порогов на русскых напали печенігы, и Святослав погиб в бою.

Послі ухода русских из Болгарии Цимисхий позбавил Бориса ІІ царского сана и обернул Болгерию в византийску провинцию. Тилько западны болгарскы области сохраняли свою самостоятельность ище несколько десятков літ.


7. КРЕЩЕНИЕ РУСИ

Послі смерти Святослава начались роздоры меже його трьома сынами. Они закончились гибельом старшых братов и побідом молодшого, Владимира.

Княжение Владимира Святославича (978—1015), по выражению Маркса, являєся “найвысшым пунктом” в истории Киевской державы, периодом єй найбольшого могущества. При Владимирі было закончено объєдинение восточных славян под властьом киевского великого князя и присоєдинена к Киевской державі Полоцка земля.

Найважнійшым событием в княжение Владимира было утверждение на Руси христианства, котре и попередно проникало на Русь из Болгарии и Византии. Княгиня Ольга была христианком, но єй сын Святослав до конца свого житья оставался язычником и осмівал нову религию. Основна масса русскых по старому держалась языческой віры. Одержавши побіду над братьями, Владимир на початках старался укріпити языческий культ и придати йому большу стройность. Деревянному идолу Перуна с серебряном головом и золотыми усами, поставленному на высоком холмі в Киеві, приносились человіческы жертвы. Однако стара языческа религия не могла уж задоволити киевлян, связанных о другыми больше культурными народами, исповідавшыми ислам и христианство. Літопись передає, што Владимир при выборі новой віры колебался меже христианством и исламом, но сама літопись указує на то, што многы варягы были христианами, а варягы грали важну роль в княжеской дружині.

В Х в. существовали дві христианскы церкви, претендовавшы на мірове господство: католицка на чолі с папом в Римі и православна со вселенскым патриархом в Константинополі — городі, котрый торжественно назывался новым Римом. Католицкий вплыв поширился на всю Западну Европу, а православие господствовало в Болгарии, Сербии, Грузии и на всьой территории Византийской империи. Тісны связи Руси с тыми краинами обеспечили принятие русскыми христианства по православному (греческому) обряду.

Перед введением христианства на Руси византийский император звернулся к Владимиру за помочом для подавление восстания, яке ширилось тогди в Византии. Восстание было подавлено при поддержкі русского вспомагательного отряда, но потом император отказался выполнити то, што обіщал Владимиру — выдати за него замуж византийску царевну Анну. Тогди Владимир вступил в Крым и послі долгой осады занял Херсонес (по-русски: Корсунь), який мал важне значение для защиты византийскых владіний в Крыму. Византийский император поспішил заключити с Владимиром мир и выполнити свое попередне приречение. Але перед вінчанием с царевном Анном Владимира должен был принята христианство и очистити Херсонес. Потом слідовало крещение жителей Киева, а так и жителей другых русскых городов (989).

Принятие христианства отограло громадну роль в житью русского народа. На Руси появилась нова важна политична сила — духовенство. На чолі духовенства стоял митрополит, якого резиденция была в Киеві, и подчиненны йому епископы, розміщенны в большых городах. Право поставления митрополита на Руси мал константинопольский патриарх. То значит, што русска церков была зависима от греческой церкви. На початках русскими митрополитами назначались переважно грекы. На содержание духовенства ишла десята часть княжескых доходов от данин и оплат (“десятина”). Митрополитам и епископам было подчинено “біле” (женате) духовенство, сидівше в городскых и сельскых приходах, а также “чорне” духовенство (монахы или чернецы).

Церковь была дуже серьозном политичном силом, яка поддержувала идею єдинства краины и потребу сильной княжеской власти.

Для культурного житья русского народа принятие христианства мало важны послідствия. На Руси стала розвиватись письменность. При княжескых и епископскых дворах, при церквах и монастырях закладались библиотеки и працували “писцы” (переписчикы книг). Владимир открыл первы школы, в котрых дітей учили грамоті и письму. В тых часах то была штука рідка и трудна. Заграничны архитекторы и маляры приізжали на Русь, де строили каменны будинкы и украшали их малюнками, передаючи свою штуку русскым майстрам. Принятие христианства открыло пути к тіснійшым сношениям с греческыми, южнославянскыми и западноевропейскыми краинами, так як Русь сділалась одном из юристианскых краин средньовіковой Европы.

Нова религия с початку утвердилась прочно лем в высшых кругах, а в народной массі христианство встрічало сильне сопротивление. Языческы жрецы (“волхвы”) даже в ХІ в. тішились великым вплывом среди народа, котрому были больше понятны стародавны языческы обряды, чым сложны христианскы погляды и догматы. И тому русскы люди нерідко соєдиняли стары языческы представления с христианскыми, вытворяючи помiшанну віру, котру можна назвати “двоєвірством”. Народ продолжал покланятися Роду и Рожаниці як покровителям рода, почитал дальше русалок и домовых. Образы языческых богов соєдинились по созвучию с гдеякыми христианскыми святыми. Бога Велеса продолжали почитати в образі святого Власия, Перуна в образі пророка Илии. Стары языческы свята были прилучены к христианскому календарю, и христианска неділя перед великым постом соєдинилась с языческом “масляницом”, коли люди веселились, проганяючи зиму и встрічаючи весну.


8. ЯРОСЛАВ МУДРЫЙ

Владимир ище при свойом житью выділил Полоцк в отдільный княжеский уділ, посадивши в нем свого сына, рожденного от полоцкой княжны. Остальны його сынове сиділи в ріжных городах як подчиненны князі: старший Святополк княжил в Турові, Ярослав — в Новгороді.

Послі смерти Владимира началась долга борьба меже його сынами за владіние Киевом. Святополк приказал убити своих братов Бориса и Гліба, штобы спрятати опасных конкурентов. Тогди Ярослав рушил на Киев и розбил Святополка. Святополк біжал в Польшу, и с помочом польского короля Болеслава занял наново Киев. Но он не думал подчинятися польскому королю, тым больше, што полякы показували за дуже свою пыху и грабили население. По приказу Святополка по містах начали тайно убивати поляков. В виду того Болеслав покинул Киев, захвативши громадну добычу. Опираючись на варяжский отряд, Ярослав другий раз овладіл Киевом. Святополк вернулся с печенігами, но был розбитый недалеко Киева и біжал на запад, где погиб без вісти. В церковных кругах Святополка прозвали “Окаянным”, а Бориса и Гліба церковь признал мучениками и русскыми святыми.

Утвердившись в Киеві, Ярослав, прозванный Мудрым (1019— 1054) удержал в своих руках власть над всіми русскыми княжествами, за винятком Полоцка. При ньом окончательно утвердилось высоке международне значение Киевской Руси, и установлены были постоянны связи с цілым рядом держав. Сам Ярослав вступил в супружество с дочком шведского короля. Дочкы Ярослава были замужом за королями — французскым, венгерскым и норвежскым, а його сын Всеволод оженился с византийском царевном. Русь мала постоянны торговы связи с Византийском империом, Польшом, Венгриом, Чехиом, Германиом, странами Востока и с Закавказьом.

Загранична политика Ярослава была звернена в сторону дальшого укріпления и росширения границ Киевской державы. Ярослав мал часто войны с Польшом и отвоювал захваченны польскыми князьями “Червенскы городы”. Вмішавшись в межеусобны войны польскых князей, Ярослав совершил удачный поход в Мазовию (в сіверной части Польшы) и закріпил супружескыми союзами свои дружескы отношения с польскым князьом Казимиром. Ярослав укріплял пограничны районы будовом новых городов. В краю естов в 1030 року был побудованый Юрьев (Дерпт). Ланцух невеличкых городков появился к югу от Киева по рікі Роси. Ярослав провадил рішительну борьбу с кочевниками и розгромил печенігов, якы напали на Киев, но окончательный розгром печенігов довершили новы кочевникы — половцы, котры откинули печенігов к Дунаю. Половцы осіли в степном краю и сділались не меньше грозными врагами для русскых земель, як были печенігы.

Ярослав Мудрый належал до числа первых русскых князей, на якых показались глубокы культурны переміны, появившыся на Руси послі принятия христианства. Ярослава хвалят за його любовь к просвіщению и называют його “книголюбцем”. При ньом были побудуваны великы каменны соборы Св. Софии в Киеві и Новгороді.


9. ПОЧАТОК ФЕОДАЛЬНОЙ РОЗДРОБЛЕННОСТИ НА РУСИ

Ярослав был послідным єдиновластным великым князем Киевской Руси. Начавшеся уж попередно феодальне дробление Киевской державы на отдільны княжества осуществилось зараз послі його смерти. Ище за свого житья Ярослав роздал найбогатшы земли трьом старшым сынам: Изяславу дал Киев, Святославу — Чернигов, Всеволоду — Переяславль Русский (теперь Переяслав Хмельницкий). Три браты должны были разом управляти русском земльом. Послі смерти старшого брата в Киеві должен был княжити другий брат по старшинству, а остальны так само должны были переходити по порядку с меньшых княжескых столов на высшы. Такий порядок не можна было утримати, так як каждый князь старался основати власну динанстию в свойом роді. Постоянны роздоры меже князьями вызывали потребность созыва съіздов (“снемов”), штобы уладити непорозуміния. В 1097 князі съіхались в Любечі и признали, што каждый князь должен владіти тыми землями, якы належали до його отца (“каждый да держит свою отчину”). Так было признано розділение Киевской державы на отдільны феодальны, владіния.

Послідным киевскым князем, при котром ище сохранялись деякы рисы єдинства Русской земли, был Владимир Всеволодович Мономах (1113—1125). Свое прозвище он получил по матери, византийской царевні, родственниці императора Константина Мономаха. Владимир был образованным человіком и написал интересне “Поучение” для своих дітей. Його имя было прославлено удачными походами против половцев, котрых он отогнал к Дону.

Переход к земледілию як основному занятию жителей был тісно связаный с розвитием феодальных отношений. Головными богатствами сділались земля и робочы рукы, котры могли єй обрабляти. Як во всяком феодалньом обществi, в Киевской Руси существовали два основны классы: непосредны выробникы — земледільцы и другий класс, котрый жил из труда земледільцев — феодалы. Земледільцы в Киевской Руси назывались “смердами”. На початках смерды были свободными общинниками, платившыми данину князю от свойой земли. Однако розвитие феодальных отношений приводило к тому, што они ділались зависимыми. Часто феодалы ставили смердов в зависимость от себе, насильственно присвоюючи собі населенны земли. То способствовало закріпощению попередно свободных селян и установлению панщины. В случаю, если смерд умирал, не оставляючи сынов, то його маєток переходил на пана.

Были и другы способы укріпления зависимости смердов от панов-феодалов и заведения панщины. Розоренным и обіднівшым смердам трудно было наладити господарку без чужой помочы. Они звертались за помочом к феодалам и получали от господина будинкы, скот, земледільскы приряды и становились “закупами”. Такий закупленный смерд мал свой власный кавалок земли, але притом он обраблял и землю свого пана. Пан мог карати закупа и посылати його на роботу. Закуп не мал права уйти от пана, доки не росплатился с паном, а пан не мал права продавати його в рабство. Так закуп стоял на границі меже смердом и рабом.

Холопами или рабами назывались люди, котры цілковито належали до пана. Они обрабляли землю своих панов и выполняли обязанности домашных слуг. Ключникы и ключницы, якы завідували панскым домом и хозяйством, были звычайно из холопов. Ряды рабов непрерывно пополнялись плiнными, захваченными в войнах. Надвышку рабов, яка оставалась, продавали заграницу, головно в Византию. В ХІ—ХІІ столітиях холопов все больше саджали на землю. Холопы, якы осіли на землю, по свому положению были близкы к закупам.

К пануючому классу феодалов Киевской Руси належали князі, бояре и высше духовенство. В ХІ—ХІІ столітиях всі княжескы столы на Руси были заняты Рюриковичами, потомками Владимира Святославича. Так всі княжескы линии вели свой род от одного предка и находились в родстві меже собом.

Боярство выросло в важну политичну силу. Значна його часть вышла из числа княжескых дружинников. Кромі того, ряды боярства пополнялись богатыми горожанами и землевладельцами. Бояре стремились набыти як найбольше земли и завести свои дружины из зависимых людей. В гдекотрых русскых землях бояре уж в ХІІ в. набрали такого значения, што заставляли князей подчинятися их волі.

Обширну княжеску, боярску или церковну господарку обслугувала “челядь”, т. є. зависимы смерды, закупы и холопы. Центром такой господаркы был укріпленный двор пана. На панском дворі стояли мешкальны домы и церковь, а также пивницы, стодолы, шпихліры, в котрых хранились розличны поживны запасы и сельско-господарский инвентарь. Полевы роботы выполнялись под надзором “полевых” и “ратайных” старостов. Гурты скота, овец, коров и коней паслись на лугах под присмотром конюхов, на чолі котрых стоял “старый конюх”. Княжескы кони клеймились специальным “пятном”, што всяди можна было их роспознати.

Рядом с укріплением феодальных дворов росли и міста. Первоначальны русскы міста (города) VІІІ—ІХ вв. представляли собом укріпленны замкы, где жили князі и дружинникы, а также гдеяке число ремесленников. С конца Х в. около замков выростают предмістья, населенны ремесленниками и купцами. На югі тоты предмістья назывались “предградьями”, а на сівері “посадами”. Самом оживленном частьом города становилась рыночна площа — “торговище”, или “торг”. Тут “кликали”, т. є. объявляли, о холопах, біжавшых от пана, и о ріжных выпадках. Тут купцы вели оживленну торговлю ріжными товарами, а “мытникы” собирали оплату, мыто от продавцов.

Такы міста, як Киев и Новгород, мали величавы каменны будовы, но большинство городских будинков, даже дворцы князей и бояр были обычайно из дерева. То объясняєся холодным климатом нашой краины, множеством дерева и його дешевизном. Большинство городского населения составляли ремесленники. Они разом с простыми людьми в городі носили название — “чернь” или “проста чадь”. Политична власть в городах находилась в руках купцов и бояр, опиравшыхся на свои земельны посілости за преділами города.

Памятником, рисуючым социальный строй Киевской Руси, являєся “Русская Правда”. Она дошла до нас в двох редакциях: короткой и пространной. Коротка редакция єсть старша и она в основном дає понятие о житью русского народа в Х—ХІ вв. Пространна редакция “Русской Правды” возникла позже и она дає материал ХII віка. В “Русской Правді” записано право, котрым послугувалися в Киевской Руси при розборі судовых діл (законы о наслідстві, уставы о холопах и закупах, записи о судовых оплатах и т. д.).

Социальный порядок Киевской Руси формовался в обставинах острой классовой борьбы, находившой свое отражение в восстаниях смердов и горожан. В 1024 року выбухло восстание смердов в Суздальской землі под руководством місцевих языческых волхвов. Массовы восстания мали місце в Киеві в 1068 и 1113 роках. В них принимали участие горожане и смерды. Восстание 1068 р. было звернене против князя и його администрации — тысяцкого и тиунов, творившых от имени князя суд и росправу. Купцы и ремесленникы были головными руководителями того восстания, подавленного Изяславом с помочом поляков. Восстание 1113 року выбухло зараз послі смерти Святополка Изяславича. Киевляне розграбили двор тысяцкого и гдекотры кварталы, населенны лихварями. Восстание перекинулось за преділы Киева и утихло тилько тогди, коли новый киевский князь Владимир Мономах установил гдеякы охоронны міры против лихварства и незаконного поневоления свободных людей и закупов.


10. РУССКЫ КНЯЖЕСТВА В ХІІ—ХІІІ ВВ.

Дробление земель Киевской Руси на отдільны майже независимы княжескы владіния пошло найбыстрійше в ХІІ в. Оно было природным наслідком розвития феодальных отношений и роста новых важных екномичных и политичных центров, притягавшых до себе ремесленников и торговцев. Однако, гдеякы елементы русского єдинства сохранялись и при феодальной роздробденности. Так власть киевского митрополита ростягалась на всю Русску землю, а вспольность языка и культуры объєдиняла русский народ в одну цілость. Представление об єдинистві Русской земли встрічаме у многых старорусскых авторов: в літописи, в житиях, в “Слові о полку Игореві”. Паломник Даниил, посетивший Палестину в началі ХІІ в., поставил в храмі лампаду от “всей Русской земли”, считаючи себе єй предтавителем на далекой чужині.

В основном русскы земли в период феодальной роздробленности составили три, большы группы. Южнорусскы земли были представлены Киевском, Черниговском и Галицко-Волынском землями; западны — Полоцком и Смоленском, сіверны — Новгородском и Владимиро-Суздальском.

Киевска и Черниговска земли в ХІІ в. уж стратили свое давне значение, хотя Киев все ище сохранял положение найбольшого русского города и торгово-ремесленкого центра. Постепенне запустіние начинатся аж при конці ХІІ в., послі того як Киев был занятый и розграбленый войсками Андрея Боголюбского (1169). От того часу киевскы князі с трудом обороняли свою землю от набігов половцев, котры опустошали южны русскы окраины. Но Киев долго ище славился своими величавыми будовами, свідками його давнійшого величия.


11. ГАЛИЦКО-ВОЛЫНСКА ЗЕМЛЯ

Тота земля занимала найдальше на запад высуненне окраинне положение на Руси, по сосідству с Венгриом и Польшом. Однако граница русскых поселений тут не совпадала с границами Галицко-Волынского княжества. Русскы отдавна жили в Карпатскых горах, где находилась “подугорская” Русь, получивша таке название от того, што сосідила с Венгриом (Уграми).

Галицко-Волынске княжество складалось из двох ріжнородных по своим географичным условиям районов: Галицкой земли и Волыни. Галицка и Волынска земли в началі ХІІІ в. объєдинились под властьом одного князя.

В ХІІ столітии в Галицкой землі закріпляєся своя княжеска династия, ведуща род от Ярослава Мудрого. Она дошла до найбольшого могущества при Ярославі Владимировичi Осмомыслі (1152-1187). При ньом южны границы Галицкой земли доходили до Дуная. О том князі так говорится в “Слові о полку Игореві”: “Галичині Осмомысле Ярославе! Высоко сідиши на своем златокованном столі, подпер горы угорскыи своими желізными пълки, заступив королеви путь, затворив Дунаю ворота, меча бремены через облакы, суды рядя до Дуная. Грозы твоя по землям текут; отворяеши Киеву врата; стріляеши с отня злата стола салтани за землями”. В том отрывкі особенно подчеркуєся могущество Ярослава, преградйвшого путь венгерскому королю. Ярослав судит до Дуная, отворяє ворота в Киеві. Така характеристика могущества Ярослава подтверждаєся византийскыми авторами, якы описуют пребывание претендента на византийский престол, позже императора Андроника, в гостях у Ярослава Осмомысла.

Княжеска столица Галич была обширным городом. Недавны роскопкы открыли місцем княжеского замка на высоком холмі меже ріком и крутом яругом. Найдены фундаменты величавого собора и даже каменный саркофаг со скелетом, як думают, самого Ярослава.


WestBorder
Примірна граница польских и русских княжеств в ХІІ—ХІІІ вв.
— по карті, приложенной к І тому Истории
СССР М. Н. Тихомирова и С. С. Дмитриева.


Розвитие феодальных отношений в Галицкой землі ишло особенно быстрым темпом и привело к господству богатого боярства, опиравшогося на свои замкы и земли. Уж Ярослав Осмомысл примушений был рахуватися с требованиями бояров, котры вмішувались даже в його фамелийны діла. Коли послі смерти Ярослава начались роздоры меже його наслідниками, бояре помогли венгерскым королям вмішатися в галицкы діла. Борьбу за независимость Галицкой земли возглавил волынский князь Роман Мстиславич, пра-правнук Мономаха. Он изгнал венгров и соєдинил под свойом властьом Галицку и Волынску земли в одно княжество. Роман был убитый в часі похода против польскых князей (1206). Послі його смерти венгерский и польский короли заявили свои претензии на Галич и Волынь. Даниил, малолітный сын Романа, принуждений был втікати из Галича, спасаючись не тилько от венгров и поляков, но и от взбунтувавшыхся бояров. Он утвердился на княжеском столі в Галичі аж послі многолітной борьбы с непокорными боярами, опиравшымися на заграничну помоч. Княжение Даниила Романовича (1229-1264) в основном относится уж к периоду монгольского нашествия на Восточну Европу.


12. КУЛЬТУРА КИЕВСКОЙ РУСИ

Киевский период в русской истории был отміченый высокыми культурными успіхами, оставившими глубокий слід в жизни русского народа. К тым часам относится утверждение пиьменности на Руси, появление русской самостоятельной литературы и создание архитектурного и малярского стиля.

Письменность появилась на Руси, по крайной мірі, с начала Х в. К 911 року относится первый письменный документ на русском языкі — договор Олега с византийскими императорами. Немале значение для быстрого росширения письменности на Руси мали связи русских земель с сосідными южнославянскими крайними. Многы болгарскы книгы (епохы росцвіта Болгарии в Х в.) переписувались на Руси. Послі принятия христианства на Руси появились люди, знакомы с греческим языком и литературом.

С ХІ в. начинат розвиватися родима русска литература, на початках представленна сказаниями и житиями святых. Россадником просвіщения был Печерский монастырь под Киевом. Монахы Печерского монастыря занимались переписком книг и составлением житий и поучений. Появился сборник житий печерскых монахов под названием “Печерский Патерик”. В том же монастырі составлялся первый больший труд по истории русского народа, літопису, названна єй составителями “Повѣстью временных лѣт”. Она начинатся оповіданьом о росселении славян и доведена до 1110 року. Оповіданье с початку ведеся без обозначения літ, а с 852 року, котрый составителями “Повісти” признаєся роком, коли первый раз “стала прозываться Русская земля”, всі события приводятся под определенными роками. Составителем “Повісти” считают монаха Нестора, справедливо получившого имя “отца русской истории”. “Повѣсть временных лѣт” успішно розрішила задачу створения общерусской истории — “откуда єсть пошла земля Руская”.

Замічательным поетичным памятником Киевской Руси являєся “Слово о полку Иореві”. Оно написано около 1188 р. незнаным поетом, повидимому княжескым дружинником, и посвячено походу черниговскых князей на чолі с Игорем Святославичем против половцев. Автор ярко описує страдания цілой Руси от набігов кочевников. От межеусобий князей “сѣяшется и растяшеть усобицами; погибашеть жизнь Даждьбожа внука; в княжих крамолах веци человѣком скратишась”. Тот замічательный памятник старорусской литературы говорит нам о розвитии поетичных творов в старой Руси, от котрых до нашых часов дошли лем немногы отрывкы.

О художных настроях Киевской Руси можна составити представление по сохранившимся каменным будовам, головно, соборам и церквам. Из гражданских будов сохранились тилько остаткы дворцовых палат в Боголюбові и гдеякы кріпостны сооружения: кріпость в Ладогі, построєнна на початку ХІІ в., Золоты ворота во Владимирі и остаткы Золотых ворот в Киеві; фундаменты каменного княжеского дворца открыты у Десятинной церкви в Киеві.

Каменны церкви ХІ—ХІІ вв. до сих пор стоят в Киеві, Владимирі, Чернигові, Новгороді, Смоленскі и другых старинных городах. Софийский собор в Киеві представляє собом велику будову с хорами, на котры ведут сходы в двох башнях у западной стороны собора. Мраморны колонны украшают внутренность собора. Центральный купол, алтарь и часть стін покрыты дорогом мозаиком. Замічательна фрескова живопись. Напримір, одна фреска изображає жену и дочок Ярослава Мудрого, котры с засвіченными свічами идут в торжественной процессии.

Во Владимирі-Залесском стоит замічательный пятиглавый Успенский собор, побудуванный Андреем Боголюбскым и росширенный Всеволодом Большое Гніздо. Церкви во Владимирі украшены різными украшениями из камня. Так верхня часть стін Дмитриевского собора во Владимирі заполнена різными фигурами людей, звірят и цвітов и изображениями цілых сцен (напримір, молодого царя, окруженного земном тварином).

Богаты будовы и малюнкы на них выполнялись первоначально греческыми майстрами, но уж в ХІ в. появляются свои русскы артисты и будовничы. Об одном из них, Алипии-иконописці, говорится, што он учился с дітства у греческых майстров составляти мозаику, а потом сділался самостоятельным художником. Киевска Русь славилась также майстерным приготовлением украшений, покрытых емалью.

Богата культура Киевской Руси, єй міста с торговым и ремесленным населением, каменны будовы, малярство, литература вызывала подив у сучасников. “Всего еси исполнена, земле Руськая”, справедливо пише один свидітель культурного росцвіта родной земли до прихода татаров. В ХІ—ХІІ вв. Киевска Русь не уступала другым европейскым краинам в культурном и политичном розвитии и являлась одном из передовых краин Европы.


[BACK]