Лемковска Співанка — Е. Демчак, E. Demchak, Gary, Indiana
Я молодый хлопец
Хочу ся женити,
Не знам, ци то дівча
Хоче за мя итти.

Я си рад танцую,
Но добри не вмію,
Так люблю дівчатко,
Добри не здурію.

Оно мя не хоче,
Бо оно парадне,
Я не дуже красный,
А оно барз ладне.

Піду я до попа,
Буду го просити,
Ци бы мя красотов
Не міг покропити.

А як не покропит,
То най мя посвятит,
Хоц не буду красный,
То мя обогатит.

А поп мі наказал
Так покутувати,
Як ты хочеш шумне
Дівчатко достати.

За три дни єм клячал,
А девять єм постил,
Лем жебы я тото
Красне дівча достал.

Юш єм такий зостал,
Як сушена рыба,
Певно юш мі теперь
И жены Не треба.

А потом єм хотіл
Кус ся посберати,
Мои ноженята, —
Не хтят мя тримати.

Иду до дівчины
И тото єй кажу:
“Так ся про тя мучу,
Што ледво юш лажу”.

А она ся сміє,
Дураком назвала:
“Та-ж я тебе, хлопче,
Завсе в серци мала”.

Бодай тот мій розум,
Бодай коза з’іла:
“Та я о том не знал,
Же ты мя любила”.

Юш буде весіля,
Заграй мі, музыка,
Про тету и діда,
Про уйка и стрыка.

А и про нонашку
И стрыну Марину,
Бо мі обіцяли
Зробити перину.

А як єм ся женил,
То-м сой кус заплакал,
Же аж теперь буду
Шапков керпці латал.


Е. ДЕМЧАК,
Гери, Инд.
FolksongEnd

[BACK]