Лемкы в Канаді (к 20-ой рочниці основания лемко-союза) — Н. А. Цисляк

Для нашой культурно-просвітительной организации Лемко-Союза сей 1949 год являєся юбилейным. Двадцет літ тому назад, 9-го января 1929 року, в Канаді родился первый отділ Лемковского Союза. Тот день и тот отділ были началом нашой славной организации. Так сего року Лемко-Союз, вокруг котрого объєдинилися всі культурны и прогрессивны силы нашого народа, с великой честью и достоинством празднує 20-літный юбилей свого рождения.

В истории Лемко-Союза навсе останеся интересным вопрос: чом Лемко-Союз не родился среди многочисленных и давно загосподаренных лемковскых колоний Соєдиненных Штатов Америкы, а в далеком городі Канады, при горсткі новых иммигрантов? Откуда взялася программа Лемко-Союза?

Послі Первой світово и войны, во всіх европейскых краинах, включаючи Польшу и Чехословакию, заострялся господарский кризис. Особливо он давался отчувати по обом склонам Карпат, на нашой знищенной войном, перенаселенной и отсталой Лемковині. Не дивно, што лемкы, хотячи сохранитися перед надходящом угрозом голода, смотріли в заморскы краины за заробками и куском хліба. В 1925 року, коли Канада открыла свободный путь для иммиграции, на 5 літ, то за тот короткий час там собралося поверх пяти тысяч молодых и енергичных лемковскых иммигрантов. Не маючи свого плану апи засобов на загосподарение, они были розвезены агентами по широкым просторам Канады и розміщенні при сезонных роботах на фармах.

Повольно але певным кроком господарска криза приходила и в Канаду. Под єй напором даже добре загосподаренны фармеры почали покидати свою землю, а разом с тым тратили роботу и нашы молоды иммигранты. Цілыми стаями они теперь почали встрічатися в місточках, где узнали горьку правду — што то не одного, а всіх их доля одинакова. Розгорчены, гдекотры повернули в родный край, другы при помочи родных переселилися в Соєдиненны Штаты, но больша половина рішила остатися и тут боротися за своє существование.

Прибывшы в Канаду повоєнны иммигранты чувствовали себе осамотненными меже чужым народом. Предвоєнных лемков в Канаді было совсім мало. Первым предвоєнным иммигрантом-лемком в Канаді можно назвати теперь 100-літного старушка Сидора Слюсарика. Он прибыл в Канаду при конці 19 столітня прямо из села Лосье, повіту Новый Санч, на Лемковині. На далеком Западі Канады, в Едсон, провинции Альберта, была єдинственна фармерска колония лемков, парудесят родин из Богушы и Королевы Русской, повіту Грибов, котры около 1898 року переселилися туда из Соєдиненных Штатов для господарства на землі. Другых лемковскых колоний в Канаді майже не было, кромі пару родин, жившых роскиненно по всей Канаді. До такых лемков из старшой иммиграции належит теперь 70-літный Теодор Кохан, живущий в Виннипегу, Манитобской провинции. Встріча того человіка с молодыми повоєнными лемками привела к рождению нашой народной организации Лемко-Союза.

Теодор Кохан родился 21 ноября 1878 року во Флоринкі, Грибовского повіта, прибыл в Америку молодым в 1894 р. и в часі испанской войны 1898-1904 рр. служил в американской армии. Зоювал на Филиппинах и працувал урядовцем в рекрутном уряді. Послі войны, в 1905 р., яко учитель, переселился в Канаду, в город Виннипег. По причині необыкновенной красоты свого почерку писма он был принятый на роботу в городский уряд Виннипега, где працувал поверх 30 літ.


Kohan2
Теодор Кохан в молодом віку
— солдат американской армии
в 1899 р.


В часі свого иммигрантского житья Теодор Кохан мало встрічал своих краянов, с котрыми мог бы поговорити по сердцу, повеселитися. Но тым не меньше он вспоминал свой любимый лемковский край, и роздумувал о його судьбі. Послі 1925 року он почал што раз частійше встрічати своих краянов, котры в несчастном положении, глядаючи роботы, остановлялися на хвилю в Виннипегу.

Было то 9 января 1929 року. На дворі сыпало снігом, тягло морозом, свистали вітры. Образ, острой канадской зимы. Того дня в теплом домі Теодора Кохана собралися гдекотры краяне, штобы поздоровити го с праздниками русского Рождества и провести пару хвилин в родинном кругу. Он принял их по отцовски, и всі они начали обмінюватися своими мыслями. Им было легко порозумітися. Теодор Кохан скусил много в свойом житью, виділ широкий світ, а його гості, молоды лемкы, перешли тоже велику практику у себе дома. Они пережили Перву світову войну, виділи, як ломлятся святы империи, як родятся новы свободы. Положение, в яком теперь нашлися, заставило их думати серьозно о свойой будучности. Теодор Кохан высказал свои мысли и планы, котры нераз передумал и хранил в свойом сердці. Тут наступил тот историчный момент основания Лемко-Союза, бо молоды лемкы сейчас принялися за роботу. Так была составлена программа, записаны первы члены основатели и избраный уряд, котрого Теодор Кохан стал предсідателем. Их программа была така:

ЦІЛИ ЛЕМКОВОКОГО СОЮЗА

Ціли моральны: а) Ширити взаимну любовь и згоду между лемками; б) Старатися о бурсы, школы, читальни и другы пожиточны институции, ци тут ци в старом краю.

Ціли економичны: а) Помочи члену в нужді, хотя бы нужна была коллекта; б) Помочи крайне бідным студентам.

Ціли политичны: а) Злучити в одну мысль всіх лемков с обох сторон Карпат; б) Боронити свой край от гибели и народ Лемковины от вынародовления; в) Голосити світу, што мы єсть и должны остатися русскыми людьми.

Первы члены основатели были слідуючы: Владимир Цисляк, Семан Добровольский, Николай Кобеляк, Михаил Ванько, Димитрий Чан, Иван Похна, Григорий Вахновский, Нестор Волчак, Иван Галечка, Константин Крыницкий, Теодор Пейко, Иван Вандзиляк, Ярослав Рейда, Тимко Ришко, Теодор Кохан и Борис Кохан (12-літный).

Kohan
Теодор Кохан, основатель и перший предсідатель Лемко-Союза
ChislakVlad
Владимир Цисляк, основатель и бывший предсідатель КЦКЛС

Кромі цілей Лемко-Союза, основатели составили программу и устав о формі организации и обовязках отдільных членов. А штобы их программа не остала мертва, а наоборот, штобы их идеи ширилися меже лемками, основатели не забыли о найважнійшом — о свойом печатном органі. За свой орган они рішили принята газету “Лемко”, котру єжемісячно выдавал редактор Дмитрий Вислоцкий в Соєдиненных Штатах, в гор. Филадельфии.

Pohkna
Иван Похна, основатель
и б. гл. организатор КЦКЛС

Volchak
Нестор Волчак, основатель и б. кассир КЦКЛС

Вість о основании Лемковского Союза в Канаді была принята с великом радостью и блискавично поширилася по всіх лемковскых колониях Америкы и в старом краю. Редактор Д. Вислоцкий высоко оцінил народны идеи вложены в программу организации и отдал всі свои силы и талант на поширение их меже лемками. Велику моральну потугу и помоч родившийся Лемко-Союз получил и от бывшого редактора “Правды”, Д-ра Симеона Пыжа, под редакторством котрого газета “Правда” славилася найвысшом популярностью в свойой истории. Он не лем умістил программу Лемковского Союза и письмо Т. Кохана в “Правді”, но и в редакторской статі п. з. “Лемки Просыпаются”, в номері от 15 февраля 1929 року, он кинул воодущевляючий призыв к лемкам организоватися и представил значение Лемко-Союза широкой публикі. Меже иншым, там сказано:

“Одным из особенно отрадных явлений нашей народной жизни в Америкі является рост самосознания и діятельности среди выходцев из Лемковщины. Лемкы составляют главную массу нашей емиграции на американской землі, но до сих пор они мало или совсім не давали знати о собі. Даже свойой родной Лемковщині не оказали они больше замітной организованной помочи, хотя жертвовали и жертвуют тысячы на народны ціли всякым діятелям и организациям. Розділенны между многочисленными церквами и епископами, они держат своими центами сотни священников як униатскых так и православных, як русскых так и украинскых. Они составляют главну массу членства майже всіх русскых и украинскых запомоговых организаций и через тоты организации они жертвуют покорно на всевозможны народны и политичны ціли... Жертвуют покорно, не получаючи за то ниякого кредита, а наоборот часты насмішкы за свою заотсталость, неподвижность и майже дітску легковірность.”

Повысше приведенный вывод о положении лемков в Америкі был уж так правдивый и наболівший, што лемкы возгоріли желанием отрястися от него и кинулися строити народну организацию, в котрой нашли свою власну программу. Из всіх концов Америкы почали приходити добры вісти о организации новых отділов. Новости были так утішаючы, што в той самой статі Д-ра Пыжа говорится дальше так:

“Предложение Т. Кохана и вість об основании первого отділа Лемковского Союза в Канаді нашли восторженный отклик среди американскых лемков, чому доказательством служат многочисленны письма, получаемы и нашей редакцией... Нам сообщают, што в ділом ряді городов подготовляєся основание отділов Л. С. То буде самый правильный путь. Місцевы отділы, когда их буде больше, соберут конвенцию и там завершат свою организацию выбором центрального правления и принятием одного общого устава.”

Тоты предвіщания исполнилися, бо отділы Лемко-Союза почали рости як грибы по дожді, и первый Съізд при участи делегатов из 11 отділов, состоялся 22 февраля 1931 року, в городі Кливланді. С того часу центральне руководство организации автоматично перешло в Соєдиненны Штаты, в гущу лемковсйой иммиграции. Отділы Л. С. завязувалися оден по другом. И так, коли канадскы лемкы осідали в даякой местности, они завязували там отділ Лемко-Союза и тым пополняли ростуще число отділов в таком порядку: Едсон, Алта ч. 11, Торонто, Онт. ч. 21, Едмонтон, Алта, ч. 23, Монтреал, Кве., ч. 36, Гамильтон, Онт., ч. 48, Виндзор, Онт., ч. 56, Порт Артур, Онт., ч. 59, Форт Вилльям, Онт., ч. 63.

Первый отділ Лемко-Союза в Виннипегу завмер скоро послі свого основания, бо члены його розышлися по всей Канаді. А коли о десять літ, в 1939 року, лемкы зышлися в Виннипег и обновили житье в отділі, то Главне Правление Лемко-Союза наділило отділу порядкове число живых отділов, ч. 73. Кромі отділов, в містностях, где не было достаточного числа членов, предписанного уставом для основания отділа, творилися группы, котры кооперовали с найблизшыми собі отділами. Такы группы существовали в Арвиді, Валдор, Капускейшинг, Ормсайд и др.

Chepa
Василий Чепа, б. первый организатор КЦКЛС
Payko
Владимир Пейко, б. гл. организатор КЦКЛС

Ціль политична “злучити в одну мысль всіх лемков с обох сторон Карпат”, нигде так не была выполнена як в Канаді. Молоды, прогрессивны иммигранты с Пряшевщины порозуміли точно тоту точку устава, приняли программу Лемко-Союза за свою власну народну программу и так численно вступили в члены Лемко-Союза, што они составляли все добру половину всего членства. Первым такым членом слідує назвати Василия В. Чепу. С неуказанных на мапі місцевостей в Канаді появилися в “Лемку” його патриотизмом переполненны дописи, за подписью “Лемко от Ужгорода”, А коли он замешкал в Торонто, сейчас вступил в организацию и активно трудился для єй розвития. При великых отділ ах в Торонто и Монтреал, як и в другых містностях, пряшевщане брали велику участь во всіх кружках и комитетах, были выбераны на почетны уряды, выходили народными руководителями. Велике большинство останутся на все вірны традициям Лемко-Союза. Своими молодыми иммигрантами в Канаді Пряшевщина може заслуженно гордитися. И история Лемко-Союза буде гордитися своими членами, походящыми из Снинского, Межелаборецкого и Бардейовского округов, из котрых они найчисленнійше соєдинилися в Лемко-Союзі для народной роботы.

В Лемко-Союзі в Канаді нашли своє притулище многы иммигранты из б. так званной автономной части Карпатской Руси. Не маючи свойой народной программы ани политичного руководства, они в розмірі 10% объєдинилися вокруг Лемко-Союза, яко єдинственной карпаторусской прогрессивной организации.

ChislakNic
Николай Цисляк,
б. секретарь КЦКЛС

Ksenich
Иван Ксенич,
б. председатель КЦКЛС

Соєдинившися кріпко, як братья близкы собі по звычаям и обычаям, по бесіді и территории, канадскы отділы провели громадну и николи незабыту діятельность. При отділах творилися театральны кружкы, котры за представления из народного житья и на народной бесіді славилися великом популярностью. Организовалися хоры, діточы школы, курсы для старшых, проводилися активно финансовы кампании на пекучы народны потребы. За свою активность канадскы лемкы и их отділы все были ставлены в примір для наслідования. Но уж на само перве місце лемкы в Канаді ставили кампании поширения свойой народной литературы и прессы, через котру они стремилися осягнути єдинство мысли не лем, меже краянами на иммиграции, но и меже нашым народом по обох сторонах Карпат. И так, газета “Лемко”, котра до основания Лемко-Союза мала всего 32 предплатников в Канаді, теперь почала досягати 400 предплатников. В початку 1934 року, в часі кампании для предплаты газеты в старый край, лем оден отділ Лемко-Союза в Торонто здобыл поверх 300 долларов фонда. На нужденны канадскы условия то была така громадна сумма, котра удивила самых активных участников кампании. При том выявил велику организаторску способность Иван Ксенич, руководитель предприятий для того фонда. Соткы чисел газеты почала высылати наша редакция на Лемковщину, Пряшевщину и Подкарпатску Русь. Но того не было долго, бо польске правительство побоялося народной прессы, и при конці того самого року газета “Лемко” была строго заборонена в Польші.

Помимо свого трудного економичного положения, канадскы лемкы все заботилися о судібі своих братов в родном краю. Они пильно прислухувалися, што говорят и яку будучность они плануют для себе. Из поодинокых писем трудно было узнати о планах крайовых лемков. И длятого в Канаді с великым интересом была принята книжечка п. з. “Лемковина-Сибирь”, издана во Львові в 1934 року.

Poliniak
Теодор Полыняк, б. предсідатель КЦКЛС
Vansach
Иван Вансач, б. окр. организатор КЦКЛС

В той книжечкі народный лемковский діятель инж. Сергий Дуркот (Зынин) порушил житьевы проблемы лемковского населения. В практичном світлі он представил наближаючуся руину нашого, племени, єсли положение буде погоршатися дотеперішным темпом. Он доказал, што всі способы и дорогы, котрыми ратувалося до сего часу лемковске население, перед ним раз на все закрыты. Он указал лем на одну можливость выхода, а то звернутися лемкам на старый историчный путь емиграции на Восток. Он предложил добиватися лемкам права на емиграцию в богаты районы Сибири, где лемкы могли бы основати свои колонии и устроитися по свому уподобанню. Тота программа вышла у них от самого народа, и за проведение єй в житье там организовался переселенческий комитет, котрый соберал подписи на петицию к Польскому, Чехословацкому и Совітскому правительствам. На тоты петиции подписалося около 13 тысяч лемков, желавшых переселитися в Сибирь. Потом сбор подписей был приостановленый польскым правительством. На просьбу того комитета Лемко-Союз в Америкі выслал своих делегатов Марию Похна и Д-ра С. Пыжа к совітскому амбасадору в Вашингтоні, где они были встрічены дуже жичливо и получили прихильне приречение, што их просьба буде поддержана в Москві. Совітске правительство отнеслося прихильно к тому проекту, но польске правительство, боячися, што через таку емиграцию буде продертый вал, котрый оно будовало против Совітского Союза, рішительно отказалося выпустити лемков для переселения на Восток и заборонило цілый тот переселенческий рух. По поводу того оотказу канадскы отділы Лемко-Союза при всякых случайностях выносили протесты и резолюции, вытыкаючи польскому правительству нежичливость к лемкам в их жизненных вопросах. Такы резолюции часто попадали и в канадску прессу.

Labick
Николай Лабик, б. фин. секретарь, КЦКЛС
Spiak
Николай Спяк, б. окр. организатор КЦКЛС

В 1935 року наша организация вступат в Общество Друзей Совітского Союза. Канадскы отділы всеціло поддержали тоту акцию, бо то дало можность нашой организации стати наровень с другыми прогрессивными организациями, и успішнійше боротися за своє економичне положение в крайні и за ширение идей дружбы народов с Совітскым Союзом.

Теперь уже всім извістно, што мирный период меже первом и другом світовыми войнами был лем тымчасовым перемирием. Перва бойна на фронтах закончилася, но дипломатична борьба продолжалася. На одной стороні формовалися прогрессивны силы во главі с Совітскым Союзом, на другой стороні громадилися силы реакции, котры ориентувалися на нацизм и фашизм, на Гитлера и його спольников. За весь тот час заносило воєнным дымом. В 1936 року испанский народ избрал законным способом своє народне правительство. Того не мог стерпіти домашний и заграничный фашизм. В Испании розгорілася кровава гражданска война. То были грозны признакы надходячой войны. Лемкы в Канаді уж были настолько сознательны, што розуміли значение происходившых в Испании подій, и пару нашых молодых лемков вступили в Интернациональну бригаду и выіхали в Испанию, штобы с оружием в руках помочи испанскому народу боротися против фашизма. Меже ними были Василь Глива, из Панкной, Григорий Рончковский, из Климковкы, и основатели Лемко-Союза Семан Добровольский, из Радоцины, и Ваньо Вандзиляк, из Ганчовы. Всі они повернули в Канаду послі закончения войны, кромі Вандзиляка, котрый погиб на фронті.

Kuzmochka
Николай Кузмочка, б. Предсідатель КЦКЛС
Brinda
Михаил Бринда, передовый член Лемко-Союза

Так як граница между Соєдиненными Штатами и Канадом до певной міры гамовала нашу организацийну связь, то ІѴ Съізд Лемко-Союза, котрый отбылся в июні 1935 року в Олифант, Па., уполномочил передовый Торонтонский отділ подготовити централизацию канадскых отділов и созвати съізд своих канадскых делегатов. Временный комитет исполнил припоручение и первый Всеканадский Съізд состоялся в сонтябрі того же 1935 р. в городі Торонто, Онт. На том съізді был створеный Канадский Центральный Комитет Лемко-Союза (КЦКЛС), до котрого были избраны: Иван Ксенич, предсідатель, Владимир Цисляк, секретарь, Нестор Волчак, фин. секретарь, Василий Чепа, главный организатор, Иван Вансач, организатор Западной Канады, Николай Цисляк, корреспондент. Город Торонто стал центром канадскых отділов.

В маю 1936 року КЦКЛС выслал одного из способных членов, Владимира Пейко, на высший политично-просвітительный курс, до Виннипег, Ман.

Другий съізд канадскых отділов отбылся в октябрі 1936 року в городі Монтреал, Кве. Правление КЦКЛС на слідуючий рок было пополнене так: Владимир Цисляк, предс., Иван Ксенич, місто-предс., Николай Цисляк, секретарь, Иван Лабик, фин. секретарь, Нестор Волчак, кассир, Владимир Пейко, главный организатор, и окружны организаторы: И. Похна, В. Петрончак и И. Вансач.

Vandziliak
Иван Вандзиляк, основатель Л.С.
и охотник в Испании

Dobrovolsky
С. Добровольский основатель Л.С.
и охотник в Испании

Слідуючий ІІІ и послідний ІѴ съізды отбывались в Торонто. Главны позиции в КЦКЛС занимали: председатели: Теодор Полыньи и Николай Кузмочка, секретари: Владимир Цисляк и Ю. Корош, главны организаторы: Иван Похна и Нестор Волчак. Окружны организаторы: В. Чепа, П. Лукач, В. Петрончак, Н. Спяк, Ю. Гончак, М. Сивик.

В початках 1937 р. организатор Иван Похна сділал организацийный тур по всіх канадскых отділах, а в місяці марті того самого року исполнял лекцийный тур в канадскых отділах главный секретарь Л. С. из Соєдиненных Штатов Д-р Симеон Цыж.

Gliva
Василь Глива, член Л. С.
и охотник в Испании

Ronchkovsky
Григ. Рончковский, член Л.С. и охотник в Испании

Значение съіздов канадскых отділов Лемко-Союза в послідны рокы уж было так замітне, што съізды покрывалися корреспондентами КПА (Канадске Прессове Агентство), вслідствие чого ход съіздов и резолюции поміщалися в канадской прессі. Для приміра, короткий перевод из трронтонской “Дейли Стар” от 30 сентября 1938 року:


Конвенция требує свободы лемкам

“Мы требуєме автономии для 250.000 лемковского народа, заселяющого Карпатскы горы в Польщі, штобы он мог злучитися с 250.000 своих братов-лемков, заселяющых другу сторону границы в Чехословакии — таке єсть требование делегатов, собравшыхся на конвенцию канадского Лемко-Союза, котра отбыватся в Торонто.

“Мы притоптаны, як порох, под польскым сапотом”, заявил Владимир Цисляк, рекордовый секретарь организации, корреспондентам. “Нам не дают свойой народной школы. Мы не маме представителя в парламенті. Лемкы не мают свободы.

“Г-н Цисляк сказал, што в 1919 року лемковске население в Польші боролося за автономию и возможность злучитися с другой частью свойой территории через границу и належати до Чехословакии. Но то была даремна борьба. В 1935-36 роках 13 тысяч лемков подписали прошение о возможности емиграции в Сибирь для колонизации. Совітске правительство было прихильне, но Польша отказалася взяти под увагу тоту просьбу.”


Подобных заявлений в справі лемков, о их кривдах, в послідных роках до войны появилось много в канадской прессі.

С началом 1940 року, по причині войны, діятельность Лемко-Срюза в Канаді была приостановлена. Канадске правительство относилося с подозрінием до всіх чужеязычных прогрессивных организаций, а с часом, подобно польскому правительству, заборонило вступ нашой газеты в Канаду. В октябрі 1941 року лемкы дали почин Карпаторусскому Обществу, в котром всі лемкы и выходцы из Подкарпатской Руси ище больше объєдинилися, и в часі войны провели громадну роботу. Трудилися дуже енергично в надіи, як заявил представитель К. О. Нестор Волчак на 14 Головном Съізді в Ансонии, што в той войні куєся и доля нашого народа...

Той долі наш край и наш народ не получили, бо стары националистичны стремления у поляков ище дуже сильны. Корыстаючи из повоєнного замішательства, они постаралися стерта из лиця земли ціле наше лемковске племя и в той ціли провели фашистскыми методами переселение лемков на Запад.

Лемкы в Канаді не отреклися того, за што трудилися в Лемко-Союзі. Посредством Карпаторусского Общества они продолжают свою культурну діятельность, основуют кооперативы, воспитуют нове, поколінне в народном духі, стараются помочи родному краю, бо он им буде все найблизший. Рок тому назад, в Бервин, Ман., основался первый послі другой світовой войны отділ ч. 74, котрый несе назву Лемко-Союза и веде роботу на його чартері.

20-рочница Лемко-Союза припала на дуже смутный для нас час. Наш край опущеный, частинно заселеный чужым народом, а нашы найблизшы братья розогны. Нам здаєся, што мы утратили всьо, што было нам близке и дороге. Гдекотры упадают духом, што нашы труды были даремны. Но тот солдат, котрый кидат, оружие и біжит с поля битвы, коли враг наступат, планный солдат.

Успіх розвитая Лемко-Союза в Канаді, не приписуєме лем самым основателям або членам Центрального Комитета, спомненных на сем місци, бо каждый отділ має заслуженных урядников и рядовых членов-героєв. Без их участия, планы основателей и діятельность в отділах были бы незамітны. Каждый отділ канадский має дуже интересну свою власну историю. Будувати было трудно и длятого вытревалость и вірность каждого члена буде достойно оцінена в нашой будущой истории.

То єсть коротка история початков Лемко-Союза в Канаді. Во власной истории свойой организации, канадскы и всі другы лемкы будут находити примір и воодушевление на новых путях к выполнению программы, вложенной в основу Лемко-Союза, за котру каждому лемкови варто трудитися.


Н. А. Цисляк.



[BACK]