Дивна Пригода — Т. Шост
Выбрался раз старик-фармер
До церкви в неділю,
Послухати слово Боже,
Выбрал добру хвилю.
День был красный, солнце гріло,
Як то быват в літі;
Штыри милі пішки ишол,
Штоб ся помолити.
Засапался бідолаха,
На грудях уж тяжко,
Вода с чола покапкує,
И ногы ледашто.
Помаленьки приблизился
Ку пляцу святому,
Стал, утерат пот из чола, —
Дивно стало йому.
Слухат, смотрит наоколо, —
Та всяди тишина,
В храмі двери зачинены, —
Зас нова новина!
И оперся старик-фармер
На свою палицу,
Роздумує, што такого, —
Тихо, як в пятницу.
Посмотріл он на зигарок, —
Десята година,
Солнце вышло уж высоко, —
Што ту за причина?
Приблизился он ку дверям,
Там “нотис” прибитый,
Впял он очы и читає, —
Не хоче вірити.
Наложил он окуляры,
Нич не помагає,
Вытріщил он дрбре очы,
Та знов повторяє:
“Церковь сия зачинена,
Пастыря ніт вдома,
Он выіхал на вакейшин
Аж до Оклагома.”
Одыйшол он пару кроков
От пляцу святого,
Заговорил сам до себе:
“То штоси нового...
Уж сімдесят роков жию
На том Божом світі,
А не читал я в Библии
Ни в жадном завіті,
Штобы святы слугы Божы
Так могли ділати —
Зоставити душы свои,
На “гуд тайм” іхати.”
Сердце жальом преполнене
Фармера-старика:
“Якы тоты душпастыре,
Яка их наука?
Не боятся Божой кары
И ломлят присягу,
Тепер в світі тилько обман
На каждому шагу.”
Не раз, не два роздумує,
Пріє, от обавы.
Ци Бог прийме душу його
До небесной славы.
Може буде на небесных
Вратах тыж прибито:
“Святый Петр на вакейшині,
Небо єсть закрыто.”

Т. Шост.



[BACK]