Наша Народна Организация — И. К. Адамяк

John Adamiak
ИВАН К. АДАМЯК
Гол. Предсідатель Лемко-Союза

В 1929—30 р. р., коли за старанием т. Д. Вислоцкого организовался тут наш Лемко-Союз, мене не было в Америкі. В тых часах я жил ище на Лемковщині, где родились мой Тато и моя мама. Я родился в Америкі, но перед самом первом світовом войном мои родиче вернулися до старого краю и вывезли мене с собом.

Но коли отбывался ІѴ Съізд Лемко-Союза в г. Олифант, Пенн., я был уж в Америкі, и перед самым тым съіздом я вступил в члены той нашой народной организации, до отділа ч. 1 в г. Бруклині. Мні было тогди 18 роков.

Як я стал членом нашой организации, я зачал слідити пильно за єй программом и розвитием, и длятого сегодня я сміло можу сказати, што наша организация, Лемко-Союз, служила вірно тым цілям, для якых была организована, и выполняла честно программу, приняту делегатами на первых съіздах.

Лемко-Союз поставил собі такы задачы:

1) працувати для культурного поднятия нашого народа як тут в США и Канаді, так и там в родном краю, на Лемковщині и на Карпатской Руси взагалі;

2) помагати родному краю в його борьбі за национальны права, за освобождение от чужого владычества и за соєдинение с родными братьями в Советском Союзі;

3) нести материальну помоч нашым братьям в старом краю для улучшения их господарства и освобождения их от віковічной біды.

Што наша организация по своим силам выполнила тоты задачы, видно из короткого обзора єй діятельности за минувшых 16 літ существования Лемко-Союза.

Само перше, можна указати на нашу газету: попередно “Лемко”, а тепер “Карпатска Русь”, котра успіла широко роспространитися меже нашым народом не лем в США и Канаді, но также за преділами Американского континента.

Притом, наша молода организация за короткий час выдала далеко больше другой литературы, як всі стары карпаторусскы запомоговы и церковны организации взяты разом за 50-60 літ их существования.

Перед самым началом 2-ой світовой войны мы закончили будову нашого центрального народного дома — Карпаторусского Американского Центра в Юнкерс, Н. Й., где поміщаєся тепер редакция и типография нашой газеты. Мы лемкы можеме похвалитися, што мы маме один из найкрасшых народных домов меже всіми славянами в Америкі.

Через нашу организацию и Карпаторусский Ам. Конгресс в минувшой войні было собрано на помоч нашым братьям в Советском Союзі около $120,000.00, котры были переданы через Комитет Русского Воєнного Релифа (“Рошен Вор Релиф”). Лем в одной кампании на отбудову госпиталя Боткина в Москві мы собрали поверх 35 тысяч долларов.

Так само на ІІІ Американском Славянском Конгрессі в Нью Йорку, 20—22 сентября 1946, наша организация мала найчисленнійшу делегацию меже карпаторусскыми организациями. За Лемко-Союзом слідовал по численности представительства на Славянском Конгрессі Карпаторусский Запомоговый Союз М. Р. О. Так само были представлены гдеякы приходы. По мойому мнінию, найбольше делегатов на Славянский Конгресс повинны были прислати приходы и духовенство. Из истории знаме, што духовенство причинилося найбольше до розъєдинения славянскых народов, так тепер духовенство и церкви повинны бы найбольше трудитися, штобы затерти тот народный гріх.

Наша организация могла выполнити таку красну роботу головно завдяки свойой газеті, котра правильно учила, и освідомляла своих членов и читателей. Наша газета, на початку “Лемко”, а тепер “Карпатска Русь”, вела, все прогрессивную правдиво народну линию, и тому она зыскала собі таку популярность в широкых массах нашого народа.

За тоту успішну роботу газеты належится велика признательность и подяка як Д. Вислоцкому, єй основателю и долголітному редактору, так и соредактору, а тепер отвічательному редактору Д-ру С. Пыжу.

Тов. Д. Вислоцкий находится сейчас в Совітском Союзі, як представитель нашой организации и корреспондент нашой газеты. От имени членов Лемко-Союза и читателей “Карпатской Руси” я, як предсідатель Л. С., желаю т. Д. Вислоцкому и його супругі найлучшых успіхов в их роботі для добра нашого народа в старом краю.

Робота, яку мы провели в нашой организации, не была легком, бо Лемко-Союз и його газета “Лемко” мали от самого початку загорілых противников меже своим власным народом, котры доношали федеральным властям и клеветами старались убити организацию в зародку. Сегодня часы змінилися. Нашы лемкы видят, што Лемко-Союз и газета “Лемко” служили и служат вірно интересам свого народа и показуют йому Правильну дорогу житья.

Трудность такой роботы, яку начал Лемко-Союза, объясняєся и тым, што наш народ мал дуже мало свойой народной интеллигенции. Под Польшом при режимі пилсудчиков наш народ в старом краю не мал доступу до высшой школы. В культурном и економичном отношении Польша была далеко горшом мачохом для нашого народа на Лемковщині, як стара Австро-Венгерска империя. При австрийском императорі наш лемко мал право послати свого сына до высшой школы, як лем мал потребну сумму грошей на содержание сына в місті и на ріжны школьны оплаты, а при польском фашистском режимі школа была открыта лем для поляков.

Послі 2-ой світовой войны у нас в родном краю пришли великы переміны. С огляду на международну ситуацию Лемковщина не була присоєдинена к Совітскому Союзу, хотя весь наш народ жаждал того. Но была дана возможность нашым братьям переселитися в Совітский Союз. Больше половины населения Лемковщины выіхало из Польшы в Совітский Союз. Там наш народ получил полну национальну ровноправность. Тепер в совітскых школах из нашой молодежы выйде нова прогрессивна интеллигенция, яка поможе вести дальше начату Лемко-Союзом роботу по просвіщению и культурному поднесению нашого народа.

А мы в Америкі повинны продолжати добру роботу свойой народной организации. Я призываю всіх лемков-емигрантов вступити в Лемко-Союз и по своим силам працувати для осуществления тых цілей, якы поставили перед нами основатели Лемко-Союза 16 літ тому назад. Наша организация все стояла за прогресс и народну свободу. В часі великой войны она всі усилия направила к тому, штобы наша краина США и союзникы отнесли полну побіду над фашизмом. Днес она стоит за то, штобы обеспечити світу справедливый и тревалый народный мир.




[BACK]