Пожелания На 1947 Год — Федор Русин
С новым роком вас витаю,
Счастья-здравья всім желаю —
В Америк! и в Канаді
Всім краянам погромаді;
В Аргентині, в Уругваю,
В Бразилии, в Парагваю,
Где лишь живут нашы люде,
Най их счастье не забуде.

* * *

Старшым людям жичу много,
Штоб дожили віку свого,
И слабости не терпіли,
И ничым ся не журили.
А и того им бажаю,
Штоб вернулись ще до краю,
Откаль они сприходили,
Где молодый вік лишили.
Штобы могли там прожити,
Свою старость звеселити,
А по смерти в родну землю
Свои кости положити.

* * *

Всім родичам и их дітям,
Тым молодым, красным цвітам,
Щирый привіт засылаю,
Красной долі им желаю.
А всім хлопцям жичу тоже,
Най их житья буде гоже,
Штоб счастливо поженились
И маєтку доробились.
Всім дівчатам-красавицям,
Залюбленным молодицям
Жичу пару скоро мати
И под вінец разом стати.

* * *

А вы, стары кавалеры,
Бессемейны всі бордеры,
Уж с женячком зачекайте,
В край родимый повертайте.
Там суть вдовы и дівчата,
А тут доля ваша клята,
Бо вас никто не жалує,
Лем на вашу смерть чатує.
А всім нашым землеробам,
Што земленьку вывертают,
Орют, сіют и збирают,
Нераз сами голодают,
Бо с них другы корыстают, —
Сорок семый нехай буде
За всі рокы, за их труды,
Тым счастливым новым роком,
До прогрессу смілым кроком.
Вам, робочы по фабриках,
И писарям при столиках,
Лісорубам и майнерам,
И шторникам и драйверам —
Одно хочу пожелати:
Меньше годин, больше платы.

* * *

Ище всім вам, што читате,
“Русь Карпатску” предплачате,
Хочу счастья пожелати,
Штобы всі здоровы жили,
За газету не забыли, —
Бо предплату тра зложити,
Свого труда доложити,
Штоб газета также жила
И частійше выходила.

* * *

С новым роком вас витаю
И всім радость возвіщаю,
Што мы уж не угорщане,
А совітскы горожане.
Нас до спілкы там приняли
И нам рівны права дали, —
Тепер треба нам подбати,
Штоб и для них помоч дати.

* * *

Всі здоровы оставайте,
Як што-м забыл, пребачайте,
С новым роком счастья много
Для руснака Карпатского.

Парагвай, Сентябрь 1946.

ФЕДОР РУСИН,

из села Лисичева, Закарпатска Область УССР.



[BACK]