1945 Рок — не забуде история

Пережили сме рок, який не забуде история, як долго жити буде на землі чоловік. В истории світа не было другого такого року, в котром было бы столько великых событий, як в 1945 року. События тоты дотыкают всі народы світа и будучы поколіния на многы тысячы літ. Будучы историкы зазначат пережитый нами рок, як рок рождения новой еры.


1. Побіда над фашизмом

На сам перед в том року была отнесена цілковита побіда над вооруженым фашизмом, який выбрался на завоювание цілого світа и поневоление всіх народов. Фашизм поставил собі за ціль повернути світ назад, в стародавну тьму, с німецкыми и японскыми панами и двома миллиардами их покорных слугов. Для той ціли німецкы фашисты с Гитлером на челі и японскы самураи с Гирогито на челі, побудували страшны воєнны машины — земны, водны и воздушны и напали на свободолюбивы народы, переконаны, што демократичны державы заслабы для свойой обороны. Гитлер был переконаный, што он подиктує свою волю в Москві и Лондоні, а Гирогито был переконаный, што подиктує свою волю в Вашингтоні.

Но свободолюбивы народы скоро сознали, яка велика опасность грозит им от фашизма и объєдинилися духовно для обороны свойой свободы. Всякы стары непорозуміния меж правительствами демократичных держав были забыты. Руководители найбольшых демократичных краин, якы войдут в историю як великы люде — Рузвельт, Сталин и Черчилль подали собі рукы. Они всі три виділи, што грозит світу и людству, єсли их державы не объєдинятся для обороны свободы народов и розгрома фашизма. Для людства выпало велике счастье, што руководителями в демократичных державах были в тоты страшны для нас рокы великы, зрячы, мудры люде.

Правда, один из тых трьох великых людей, якым світ найбольше завдячат побіду над фашизмом — Франклин Делано Рузвельт, Президент нашых Соєдиненных Штатов — помер ище до одержания побіды над гитлеровском Германном и самурайском Япониом. Но он оставили нам таку воєнну силу и так кріпкий союз с Совітскым Союзом и Великобританиом, што он померал переконаный в цілковитой побіді над фашистскыми агрессорами, и в тот день, 12 апріля 1945 року не было уж людей не лем в демократичных державах, якы бы сомнівалися в нашой побіді, но не было уж думаючых людей и во вражых фашистскых державах, якы бы вірили в фашистску побіду над демократиями. Лем цілком сліпы фашисты могли надіятися ище на даяке фашистске чудо.

Не знала история такого розгрома великых империй, який принюс гитлеровской Германии и самоурайской Японии рок 1945. Што Германия и Япония были могучы империи, то уж доказує сама ціль их войны — завоювание цілого світа и диктование свойой воли в Вашингтоні, Лондоні и Москві.

Тым часом вышло як раз наоборот: Вашингтон, Лондон и Москва подиктовали могучым агрессорам свою волю, волю своих демократичных народов — в Берлині и Токио.

Німецкий и японский милитаризмы знищены. Николи больше тоты державы не будут грозити войном миролюбивым народам и их державам.


2. Фундамент тревалого мира

В 1945 року был заложеный фундамент тревалого мира. 25 апріля съіхалися в Сан Францизско делегаты 46 держав, штобы заложите тот фундамент. А 26 юня они закончили укладание Чартера Объєдиненных наций, чартера новой світовой организации, яка повинна смотріти за тым, штобы мир миролюбивых народов не был нарушеный агрессорами.

В 1945 року, 17-го юля встрітилися в Потсдамі, коло Берлина представители трьох великых союзников — за Соєдиненны Штаты Президент Труман, за Великобританию Винстон Черчилль, за Совітский Союз Йосиф Сталин, где они выробили план остаточного розгрома другого фашистского агрессора Японии, и план будучого мира. Для будучого мира они постановили знищити цілковито вооружену силу німецкого агрессора и саму можность вооружения на будуче. Стародавны славянскы земли німцы мушены отдати славянам. 


3. Выборы в Англии

Третье велике событие в 1945 року, то несподіваный результат выборов в Английский парламент. 26 юля было объявлено світу из Лондона, што на выборах в Английский парламент Консервативна партия с Черчиллем на челі провалилася, а Робоча партия выбрала большинство депутатов, так што в Великобритании пришло до власти робоче, социалистичне правительство. Дармо Черчилль и другы консервативны діятели страшили английский народ социализмом. Английскы выборы показали, што народ в Европі уж больше не боится социализма, а хоче го.

По нашому, выборы в Англии мают огромне значение для повоєнного часу и тревалого мира. Английский народ высказался на тых выборах против нового фашизма и войны, за нову систему господаркы державными богатствами, за тревалый союз с Совітскым Союзом, за братство народов и ровность людей. Никто днеска не може предповісти, ци руководители английской робочой партии выполнят волю народа. Но тота його воля ясна.

За приміром английского народа пойдут и другы народы западной Европы.


4. Атомна бомба

Шестого августа 1945 року Американский Президент Труман объявил світу, што на японский город Гирошима была скинена перва атомна бомба. А скоро послі того Воєнне министерство США дало информацию американскому народу о той бомбі, выдержкы из котрой поміщаме ниже:

“Людство вступило успішно в новый вік — вік атома, 16-го юля 1945 року перед очами знаменитых ученых и воєнных людей, што собралися в пустыні стейта Нью Мексико для обсервования над первыми результатами их усилий, што стоило державі два миллиарды долларов.

Вот отособненый район воздушной базы Аламагордо в 120 милях на юго-запад от города Альбукерке. О пол до шестой годины рано 16-го юля мал місце первый атомичный взрыв.

С хмарного неба лял дощ и блискали блискавицы до найпосліднійшого момента потрясаючой драмы.

На желізной вежі было поставлено революцийне оружие, якому презначено змінити характер войны и яка, можливо, може принести конец всім войнам. Взрыв той бомбы стал сигналом вступления чоловіка в новый физичный світ.

Успіх исслідования показался великым, большым, як надіялися найбольшы оптимисты. Невелика сколькость материи — продукт цілой сіти великых специально побудуваных промышленных заводов, выділил материю вселенной, што была предтым в маленьком атомі. Чоловік добился великого достижения. Спекулятивна теория в довоєнных лабораториях была перетворена в практичну дійствительность.

На челі той части атомного проекта стоял генерал-майор Лесли Р. Гровс, а науковым директором был профессор теоретичной физикы Калифорнийского университета д-р Ж. Р. Оппенгеймер. Йому належит честь примінения атомной енергии до воєнных цілей.

Концовый збор атомной бомбы почался ночом 12 юля на старой фармі. В міру того, як прибывали с разных отдаленых місц складовы части бомбы, зростало напружение среди собранных ученых. Найспокойнійшым был тот, котрому поручено собрати само “сердце” аппарата — д-р Р. Ф. Бейчер, в мирный час профессор Корнельского университета.

Перед початком зобрания бомбы помочник генерала Гровса бригадир Гомас С. Фарел подписал документ о одержанию “материи”. Подписание документа означало передание знаменитыми учеными материала армии. Концовы роботы перед пробом виконувалися в сильну блискавицу.

Найбольший обсервацийный пункт был установленый приблизно 6 миль на юг от вежи, где-си в деревяно-земном схоронищу были сконцентрованы всі контрольны прилады для пробы в 10 милях от вежи на подвысшению собралися важнійшы діючы особы атомного проекта.

О 3-й годині рано группа рушила ку контрольной станции, на єй челі Гровс и Оппенгеймер. Час взрыва был назначеный на 5:30 рана.

Напружение дошло до незносного пункта, в міру того, як приближался рішаючий момент. Напружение убольшалося регулярными сигналами, якы повідомляли: “ище 20 минут”, “ище 15 минут” и т. д. Здавалося, што всі перестали дыхати. Перед 45 секундами пришол в рух автоматичный механизм и с того момента почал робити великий складный механизм уж без участи людской воли.

В назначеный момент сталося осліплящче світло, што освітило цілу околицу яснійше солнца. Позднійше послышался великий протяжный гуркот и могуча фаля тиснения збила з ног двох людей, што стояли коло контрольного центра. Дораз послі того разнобарвна хмара вскипіла до вышины 40,000 футов. На єй пути зникали звычайны хмары.

Проба была закончена и проект оказался успішным.

Желізна вежа, на котрой была уставлена бомба, зникла, “выпарувала”. На єй місці был величезный кратер (яма).”

Столько из воєнного рапорта о той страшной силі атомной бомбы, котра презначалася для японскых городов.

Треба знати, што над том бомбом працували німецкы фашистскы учены, и єсли бы война затяглася пять-шесть місяцов, єсли бы русскы не розгромили вчас німецкых армий на востокі, а тым самым нашы армии не змогли бы высадитися в западной Европі и разом занята німецку землю, то німцы мали бы свои атомны бомбы и знищили бы цілковито Англию, с английскыми городами сталося бы то само, што сталося с японскыми — Гирошимом и Нагасаки.

Недобри, што тота небесна сила родилася в формі воєнной нищительной бомбы!

Американский карикатурист представил тоту силу, як радуєся ньом божок войны:



poliCart025
“Нарешті! Атомна бомба
гарантує знищити всьо!”



[BACK]