Бехеровяне — Михаил Бринда, Michael Brinda

Я не можу написати историю нашого села Бехерова, бо я ей не знам, и пишу лем тото, што єм сам пережил и виділ, або, што повідали мі старшы люде.

MichaelBrinda
Михаил Бринда

Сто літ тому назад нашы люде, кромі газдовкы на землі, занималися фурманком, бо желізны дорогы были ище слабо розвиты и товары по большой части перевозили на возах. Нашы бехеровяне, котры мали коні, брали хліб, солонину и другы продукты, якых было дост на Венграх, и перевозили в Галичину, до Горлиц и дальше. А из Галичины брали соль, нафту и другы товары и привозили до Бардийова и дальше. Оповідали старшы люде, што на такых фурманках нашы люде добри дост зарабляли и тым заробком помагали собі в газдовстві. Но так заробити могли лем тоты, што их было стати ховати коні.

Другы, у котрых коней не было, то шли на жнива до мадьярскых панов, где мушены были тяжко робити, штобы заробити собі хліба на зиму.

Но 60 літ тому назад бехеровяне, як и другы села на Маковиці дозналися о Америкі, в котрой мож было заробити центы, и почалася и с Бехерова емиграция за море. Каждый іхал с тым, што собі заробит грошей и верне назад в своє родне село, в родный край. Там або докупит поля до свого, або, єсли не было свого, то купит поля в селі або дагде дальше, и так буде ліпше газдувати. В коротком часі люде почали іхати в Америку так, што здавалося, што в Бехерові уж никто не остане. Где было веце дітей, то лем єдно оставало дома на господарстві, а всі другы шли в Америку.

Достатися в Америку не было так трудно, як по первой світовой войні. Тогды старчило мати “регию” (пашпорт на худобу) с коня ци коровы, с тым пашпортом перейти на галицку сторону, показати тот пашпорт агенту, и агент запровадил, як коня, в Америку, бодай лем гроши на шифкарту были.

Першым из нашого села в Америку выіхал Федор Микула, а за пару роков за ним майже половина села дорослых мужчин. Позднійше пустилися и дівчата и жены ку своим мужам в Америкі. Так што в перву світову войну мож было в Америкі збудувати такий сам Бехеров, як и в краю, и заселити бехеровянами. Не было в Бехерові такой хижи, с котрой бы не было дакого в Америкі, но много было такых, што больша по ловина фамелии выіхала в Америку. Приміром, из мойой фамилии лем родиче остали дома, а их штырох сынов и дочка выіхали в Америку. И ту в Америкі всі поженилися и мают великы фамелии.

Послі первой світовой войны пришла на Бехеров, як и цілый наш край депрессия, бо діти дорастали, дорослы женилися, до світа не пускали, всі молоды люде оставалися дома, а поля в Бехерові не причинялося. Кого было стати на даякого цента, або кто достал помоч из Америкы от своих родных, то ище мог даяк зводити концы с концами так, што діти голодны не ходили. Дальше на мадьяры, до мадьярскых панов на жнива не мож было идти, бо то было уж за границом. А ту недалеко уж не было великых панскых ровнин. Но тоты паны, што были за мадьяров коло Пряшова, то и остали, и бехеровяне все ище ходили на жнива до тых панох в Келемеш, Капушаны, Жупчаны, Мигаляны, Радачов и др. Стары працували дома, а молоды от 16 літ выше шли до тых панов заробити кусок хліба на зиму. Як робил о душу ціле літо, то мог заробити 5 метров зерна. За три килограммы зерна треба было робити цілый день от свиту до змерку, по 15 годин.

Населения прибывало, не лем в нашом селі, но в цілом нашом краю и емиграцию мушено было дагде открыти. И так, в 1924 року почали люде с Бехерова знов іхати во світ, тым разом в Канаду. До 1930 року выіхало в Канаду молодых дорослых людей 59, в другы край 5, то разом 64. С того лем 7 вернуло до Бехерова, а всі остальны жиєме в Канаді до сего часу. Головно жиєме в Монтреал. И мы ту также взросли численно, майже подвоилися.


* * *

В Бехерові была до первой світовой войны одна церков, греко-католицка, котра даколи давно была православна, но нашы карпаторусскы бискупы пошли до Рима. И аж недавно бехеровяне довідалися о том и не хотіли належати под римского папу, так што в 1923 року побудували другу, православну церков, и большинство бехеровянов належат до православной церкви. Школа была в Бехерові лем єдна, с єдным учителем, хоц дітей приходило што рока поверх соткы. Но бехеровскы діти хотіли знати читати и писати, и всі знали, хоц им треба было для учителя дрова різати, в стайни лорядок робити, але ровночасно пильнували наукы, так што мы тепер в Канаді всі грамотны.

А ище треба вам знати, што тото наше старо-русске село Бехеров было насильно записано в демократичной Чехословацкой республикі за чисто словацке, и не было на тото ниякой рады у нас. Протестували сме, но ничого не помогло. Така уж, видно, была чехословацка конституция, што всі руснакы мали быти чехословаками, ци хотіли або ніт.


* * *

Бехеровяне в Канаді

Перед самым кризисом, бехеровяне, якы пришли в Канаду, посходилися в Монтреалі. Роботы ище шли добри, каждый мог заробити и заробил, и каждый рахувал, сколько му треба ище ускладати, штобы вернути до краю. Но в 1929 року пришол кризис и безроботя, и мы осталися без роботы. Грошы, котры сме заробили, то сме послали до краю — єдны за подорож, другы женам и дітям або родичам. Так што мы нашлися без роботы и без грошей.

Тогды мы почали думати о том, як мы будеме жити, с чого тот кризис и безроботя приходит, и што нам треба робити? Як раз кто-си получил газету “Лемко”, яка выходила в Кливлэнд. Мы почали читати тоту газету и она объяснила нам причины кризиса и безроботя, и як нам треба боротися против тых найгоршых врагов роботных людей.

Так мы пришли на то, што нам треба организуватися. Мы основали найперше Подкарпаторусске Братство Взаимопомочи им. св. Петра и Павла, запомогову организацию, в котру належали емигранты из другых нашых сел, як Комлоша, Регетовка, Стебник, Полянкы и др. Но члены, по причині безроботя, не могли платити членского, а подруге нашы краяне не могли погодитися с гдеякыма параграфами конституции той запомоговой организации, так што по року тота организация померла, а пару долларов, якы по ней осталися, были переданы пару роков позднійше, т. є. 1942 року на помоч нашым братьям в Совітском Союзі.

И мы, майже тоты самы члены, основали собі отділ нашой культурно-просвітительной карпаторусской организации — Лемко-Союза, и тота организация зробила из нас свідомых людей.

Коли фашизм запалил другу світову войну, то мы уж всі розуміли, о што росходится в той войні. Штобы помочи борцам против фашизма, мы основали отділ Карпаторусского Общества борьбы с фашизмом. До половины 1944 року наше общество собрало лем самыми пожертвованиями от особ до 4,000 долларов. Меж жертвователями нашы бехеровяне идут на переді.

VillagePeople

Памятайте, бехеровяне, што пред нами єст ище головна задача: Помочи свому родному селу Бехерову послі войны. Мы, бехеровяне в Монтреалі организували для той ціли комитет, и надіємеся, што всі емигранты с Бехерова причинятся до того родного бехеровского діла.

Михаил Бринда.


[BACK]