Сталинград, Stalingrad

Дня 2-го февраля 1943 року закончилася велика битва за Сталинград, страница истории, яка николи не выйде с памяти людства.

Битва за Сталинград, то не лем великий примір храбрости, найвысшой отвагы и любви оборонцов до свойой отчизны, до свойой родной земли. Битва за Сталинград, розгром и цілковите знищение выбраных німецкых войск, то поворотный пункт в другой світовой войні против німецкой воєнной машины, яка была створена для завоювання світа и поневолення людства.

Выбраны німецкы армии и вооружены наймодернійшым оружием всіх родов, почали офензиву против Сталинграда в середині літа 1942 року. В плані німецкого командования было блискавичным ударом взяти Сталинград, отрізати Москву от єй тыла и индустриальных центров, а так заатаковати совітску столицу и покончити войну в 1942 року.

Но тот фантастичный план німецкого командования почал, однако, розлітатися в великых пространствах меж Доном и Волгом. Тот блискавичный скок не удался: войска Красной Армии, якы оперували в Донскых степах, обескровили гитлеровскы дивизии, вычерпали их цілковито. На подступах ку Сталинграду было знищено понад 100,000 фашистскых солдатов и офицеров в двох місяцах бойов. Кромі того было знищено совітскыми войсками много німецкого воєнного материала, воєнных машин и оружия, в том понад 88 танков и понад 100 аеропланов. И то лем в боях по дорогі в Сталинград.

Коли наконец гитлеровцы приближилися ку Сталинграду, они уж были готовы празднувати побіду. Гитлер трубил по світу, што Сталинград упаде в пару найблизшых днях, што діло Сталинграда уж рішено, што то лем вопрос часу.

Город, положеный на правом (западном) берегу рікы, нашолся направду в трудном положению. Єдином дорогом, по якой Сталинград мог получити подкріпления, оружие, амуницию и другы бойовы припасы — вела через широку замерзнену Волгу, котру німцы беспрестанно бомбардували из артиллерии и воздуха.

Бои отбывалися спочатку на подступах к городу, а познійше, на його улицах, среди руин його домов. Бои были страшно завзяты. Кажду пядь совітской земли обороняли совітскы люде с нерписаном самопосвятом. То были бои, якых не знала история.

Воины Красной Армии не были сами в тых боях за Сталинград. С ними разом боролися всі жители города — мужчины и женщины, старины и діти. Они показували незнаны до того часу приміры мужества, непревысшеной стойкости, героизма, и готовности посвяты всього за свою краину.

Улицы Сталинграда, зруйнованы вражыми бомбами, стали ареном страшных бойов, в часі котрых потрепаны гитлеровски дивизии были здесяткованы ище больше. Фашисты, напружаючи всі свои силы, хотіли за всяку ціну сокрушити опор, но Сталинград держался кріпко!

Побідила в тых боях моральна сила чоловіка, вихованого свободным социалистичным обществом. Красна Армия не могла и не отдала Сталинград. Храбры сталинградцы постановили защищати Сталинград своими жизнями, а не пустити врага дальше. Цілый світ подивлял геройство защитников того великого города на Волгі.

В місяці ноябрі, Сталин, Головнокомандуючий, дал приказ Красной Армии наступати. Тоты офензивны операции были дуже добри прикрыты и плануваны, были переведены с великом точностьом и принесли знамениты, результаты: гитлеровска армия числом 330,000 солдатов и офицеров, с огромным воєнным материалом, была оточена с классичным воєнным досвідом желізным перстенем совітскых войск.

Коли командование Красной Армии предложило фашистам ультиматум сдатися, они отповіли отказом. “Єсли враг не сдаєся, то он повинен быти знищеный!” — писал раз великий русский писатель Максим Горький. Слідуючи тым мудрым словам, войска Донского фронта задают один за другым сокрушительны удары войскам фельдмаршала Паулюса, и цілковито розгромляют их.

Соткы тысяч німецкых офицеров и солдатов было убито под Сталинградом. Больше як 91,000 сдалися в плін, меж ними 2,500 офицеров и 24 генералов, включно зо самым командуюцчым фельдмаршалом Паулюсом. Тота битва стояла німцам 750 аеропланов, 1,550 танков, 6,700 канонов, 61,102 автоматов, и т. д.

За час зимушной офензивы 1942-43 совітскы войска выкинули німцов с территории обшаром 480,000 квадратных километров (больше, як дві Германи). Поражка, задана німецкым ордам Красном Армиом у Сталинграда, то одна из найбольшых поражок в истории войн.

Офензива Красной Армии, почата под командованием сталинскых генералов Жукова, Воронова, Василевского, Ватутина, Еременко, Чуйкова и другых, увінчалася світлыми побідами русского оружия.

Слідуючи героичной обороні Сталинграда и чудесным побідам совітскых войск, наступила ровно чудесна отбудова города. Совітский народ не мог дозволити, штобы Сталинград, найбольше улюбленый город, два раз прославленый в героичных битвах (первый раз як город Царицын в гражданску и интервентску войну в 1918 року), оставался долго в руинах.

Он шумит днеска отбудовном роботом и индустриом и жиє напруженом творчом діятельностьом. Заводы, офисы и школы наполняются новым житьом. Народ сходится зо всіх і сторон Совітского Союза, робочы, инженеры, учители, докторы, агрономы, штобы отбудувати город. Творча сила народа повертат Сталинград назад до житя.

Минут рокы и Сталинград вылічится зо своих ран. А його слава, подвига його защитников, их храбрость, и отвага, останутся на вічны часы в памяти народов світа. Ветераны Сталинграда будут вспоминатися вікывічны, як русскы герои, якы показали світу, як треба боротися за свою землю, свою честь, свободу и независимость свойой краины.

Stalingrad45End

[BACK]