Красна Армия
RedArmyStalin
Маршал Сталин.

Два рокы тому назад гитлеровскы войска находилися над Волгом и на Кавказі. Гитлер кричал, што ніт в світі такой силы, котра бы выдерла німцам захвачены ними русскы земли. А тых русских земель захватили німцы больше, як три Германии. Но нашлася сила, котра знищила гитлеровскы орды над Волгом и на Кавказі, оточила цілу одну гитлеровску армию в Сталинграді, частью знищила, а решту взяла в плін с маршалом и генералами, и погнала из русской земли другы німецкы армии, оточуючи и вынищуючи их.

Тота сила то Красна Армия.

Днеска, коли пишеме тоты строчкы, уж очищена от німецкых наіздников вся русска земля, включно с Карпатсков Русью. Красна Армия находится днеска на німецкой территории, в Восточной Пруссии. Днеска Красна Армия воює в девятьох заграничных краинах, а именно: в Германии, Польші, Румынии, Югославии, Чехословакии, Болгарии, Венгрии, Финляндии и Норвегии. Николи в русской истории не была ище русска армия в так многых краинах в тот сам час.

Та и николи ище в истории русска армия не побідила таку воєнну силу, як в нашы часы Красна Армия. За границами Совітского Союза называют побіду Красной Армии над німецком воєнном машином — “русскым чудом”.

Чом называют “русскым чудом”? Бо за німецку побіду над Россиом говорило им всьо так переконуючо, певно, што лем “чудом” можут тепер оправдати свою помылку.

Вернийме до 1941 року, коли гитлеровска Германия напала на Совітский Союз:

Гитлеровска Германия, майже без страт зо свойой стороны, майже лем самым страхом свойой непобідимой воєнной машины взяла до того часу под свою контролю всю индустриальну Западну Европу с понад 300 миллионами индустриального населения, всі єй земны и индустриальны богатства зо всіми воєнными заводами, зо всім оружием и воєнными машинами. То была сила, с яком німцы мали завоювати уж цілый світ. Россия входила в тот их план уж лем як дорога до завоювания світа. Приміром, ту в Америкі дебатували уж лем о том, ци Россия поддастся Гитлеру добровольно, як така дорога для завоювания світа, ци буде, безнадійно, спротивлятися німецкой воєнной машині.

Розумієся, што длія такых людей побіда Красной Армии може днеска объяснятися лем “чудом”.

Но для русскых и другых народов СССР их побіда над гитлеровском Германиом — не чудо, а побіда свободоного и культурного народа над варварами. И то не перва така побіда в истории. Свободны и культурны, а патриотичны народы все побіждали варваров, хоц тоты варвары мали далеко большу силу. В истории читаме, што малый греческий народ и його мала армия громили огромну силу перскых царей в стародавных часах. Культурны римляне били велику силу варваров так долго, покаль были свободны и патриотичны.

Маршал Толбухин, Маршал Малиновский, Ген. Баграмян
Маршал Мерецков, Маршал Жуков, Маршал Конев, Ген. Черняховский

И єсли тоты нашы воєнны знатокы в Америкі и в западной Европі не могли припустити побіду Красной Армии над німецком воєнном машином, русского народа над німецкым, то лем потому, што они не хотіли, и ище днеска не хотят признати, што русский народ и другы народы Совітского Союза стоят выше культурно от німцов. Розумієся, што тоты люде мушены тепер объясняти побіду Красной Армии над німецком воєнном машином, збудуваном людском силом, в заводах, из материалов цілой западной Европы — лем “чудом”, штобы не признати неприятну для них правду, а именно: высшость совітской культуры над німецком фашистском.

Высшу культуру дала народам России Русска революция под руководством гениальных вождей народа — Ленина и Сталина. Послі революции в высшой совітской социалистичной культурі были воспитаны народы той великой краины и по социалистичной программі была перебудувана стара русска держава на нову державу всіх народов — Совітский Союз.

Maршaл Рокоссовский, Marshal Rocossovsky

Всі народы были зровнаны и воспитаны в ровности и братстві. По социалистичной программі и по одному державному социалистичному плану была збудувана могуча индустрия и индустриальне социалистичне земледілие.

Тоты, котры днеска называют “чудом” побіду Красной Армии над німцами и их фашистскыми союзниками, не вірили в успіх социалистичной индустрии и коллективного земледілия, народного господарства, и предсказували хаос и упадок того господарства. Другы повідали, што тота держава держится лем диктатуром над народом, и коли Гиглер нападе на Совітский Союз, то она розлетится за пару неділь.

Так само представлял собі тоту державу Гитлер.

Розумієся, што така держава, где панує ненавистна народу диктатура, где “миллионы людей были убиты том диктатуром”, другы “миллионы в лагерях невольничой працы”, “пятиліткы провалилися”, “в господарстві хаос” — не могла вести войну, не могла успішно оборонятися перед другорядном силом, а не то перед гитлеровском Германиом и цілом западном Европом под командом Гитлера. Кто тому вірил, то для того побіда Красной Армии над том силом была “чудом”.

Для нас, котры сме знали историю русского народа, розуміли Русску революцию, слідили за великом будовом и побідами на индустриальном и земледільском полях, за ростом добробыта, розвитием новой культуры и дружбы народов — тота русска побіда над німецком силом не являтся чудом, а побідом великого культурного и объєдиненного народа над вооружеными модерным оружием ордами варваров.

Німецка гитлеровска армия — плод німецкой фашистской “культуры”. Красна Армия — плод высшой совітской культуры.

Красна Армия не створена для агрессий и завоюваний чужых земель, а для обороны свойой народной державы. Німецка армия была створена для агрессий, завоюваний чужых земель, грабежа и убийства безборонных невинных людей. И потому Красна Армия побідила німецку армию, мимо того, што тота німецка армия была сильнійша в числі дивизий зо своими фашистскыми союзниками, в оружию, в индустрии, в воєнных заводах, и уважалася за найліпшу армию в світі, под руководством найліпшых генералов.

Американцы розуміли, што побіда гитлеровской Германии над Совітскым Союзом буде означати велике несчастье для Америкы. И коли вы зашли в бесіду с тыми патриотичными американцами, то они жаліли Россию и єй армию, што у ней ніт добрых генералов. “Русскы генералы — казали они, — не можут ровнатися с німецкыми. Добри было бы, штобы выслати России пару американскых генералов,” — говорили.

Но война показала, што русскы мают и добрых генералов. Та не лем русскы, бо маршалов и генералов дали Красной Армии всі национальности совітской державы. И майже всі они вышли из простого роботного народа, а побідили німецкых маршалов и генералов специального генеральского юнкерского роду с діда прадіда.

Но старой культуры люде, якы не хотят признати ровности людей и народов, не можут погодитися с тым, што выбор способных людей далеко больший из 200 миллионов народа не поділеного на классы и “высшы” и “низшы” расы, як выбор из одного класса або расы, лем зато, што они присвоили собі специальны привилегии коштом народа.

При старой царской системі в России, такий гений, як Маршал Сталин, под котрого руководством был створеный Совітский Союз и його Красна Армия, яка спасла свободу світа и нашу цивилизацию, — помер бы в царской тюрьмі. Не было бы днеска такой силы, котра могла бы побідити німецку воєнну машину. И не лем Сталина не было бы, но не было бы и тых другых славных маршалов, котры добивают німецку фашистску потвору, бо майже всі они вышли с простого народа и из разных национальностей России. В старой царской России на их місці были бы лем люде упривилегиованого класса, тай русской национальности, кромі поодинокых німцов, штобы были шпионами в русской армии и зрадниками в боях русскых с німцами.

Красна Армия побідила німецку армию потому, што она правдиво народна, армия ровных народов, тогды, коли німецка армия, то армия класса и одной расы.

Німецка армия захватила много чужых территорий, поневолила всі народы западной Европы, поневолила всі славянскы народы, кромі найбольшого — великорусского. Но тоты поневолены німцами народы не погодилися с том невольом. Они боролися за свободу, смотрячи на армии демократий, но головно на Красну Армию, як на народны армии, армии союзны.

Красна Армия мала своих союзников в тылу німецкых армий, не лем на русскых землях, но на всіх поневоленых німцами землях.

Uncle Talash
Дідо Талаш, 100-рочный партизан.

Тыми союзниками Красной Армии были партизаны, народны мстители.

Білорусскы партизаны знищили майже столько німецкого войска, зо сколькым даколи выбрался Наполеон на завоювание России. Украинскы партизаны под командованием славного партизанского командира генерала Сидора Ковпака пробилися глубоко в німецкий тыл, на соткы километров. В часі рішаючых бойов под Курском и Білгородом — Ковпак зо своим отрядом находился в Карпатах, в Галичині. Совітскы партизанскы отряды, то отділы Красной Армии, воюючы в тылу врага. Лем Красна Армия може мати такы отділы в тылу врага, потому што она армия народна. Партизанскы отряды против воли народа не могли бы удержатися и воювати с врагом.

Нам кажут, што на каждого солдата на фронті мусит працувати в тылу 17 роботников, штобы го вооружити, выеквиповати, прокормити и достарчити му амуниции и живности. На німецку армию працували не лем німецкы роботникы, німцы зогнали в саму німецку индустрию и земледілие понад 10 миллионов чужых роботников працувати на их армию. А кромі того в завоюваных ними краях были мушены працувати на німецку армию всі способны до працы люде — в индустрии и земледілию тых крайов.

Як объяснити, што Красна Армия могла побідити німецку армию силами свого народа и индустрии и земледілия свойой краины, коли німцы захватили ище из той краины найурожайнійшы земли и индустриальны области?

То мож объяснити лем героизмом всего совітского народа, такым самым героизмом в тылу, в индустрии и земледілии, як и солдатов на фронті.

Мож объяснити лем так, што в той Великой Отечественной войні всі 200 миллионов людей совітской державы воюют за свою свободу и свою отчизну.

Так што Красна Армия в войні, в обороні свойой державы, то весь народ Совітского Союза — всі 200 миллионов.

И потому они побідили фашистскы силы и спасли свободу світа и нашу цивилизацию.




[BACK]