Список ученых и писателей из галицкой Лемковщины — Теофил Курилло
(Ниже приводиме выдержкы из статьи Д-ра ТЕОФИЛА КУРИЛЛЫ, поміщенной в “Научно-Литературном Сборникі Галицко-Русской Матицы, Львов, 1934.” Д-р Теофил Курилло, родом лемко, был до войны польскым судьом в Познанщині, так як в довоєнной Польші чоловік русского або украинского роду не мог получити даякий уряд меж своим народом, даже учителей нашой народности школьны власти перекидали в Познанщину. Думаме, што приведены ниже выдержкы из статьи Куриллы п. з. “Краткая сводка писателей и журналистов на Лемковщині”, будут для емигрантов из Лемковщины, особливо в том часі — интересны).

* * *

“Руснакы-лемкы в границах польской республикы занимают тепер часть западной Галиции от потока, названого “Шляхтовскым”, ліпше сказати от села Шляхтовы (повіт Новый Торг) — от рікы Попрада до Сян. Лемкы говорят, што жиют на свойой землі — “От Шляхтовского потока аж до Сянока”. Они входят в склад 9-ти политичных повітов (районов): Новый Торг, Новый Санч, Грибов, Горлицы, Ясло, Кросно, Санок и Ліско.

Лемкы — старожилы, коренне население на свойой землі; нияк их не мож назвати пришлым елементом або “осадниками”, посланными в Карпаты польскыми королями.

На Лемковщині стыкаются дві культуры: восточна и западна, и три віроисповідания (віры, религии): греко-католицке, православне и римо-католицке. Русскы церкви построєны в византийско-лемковском, костелы, — в готицком стилях. Лемкы послугуются старославянском и русском гражданском азбуком, полякы — латинком.

Русскы жители Лемковщины сами называют себе руснаками; они творят собом незахвійну кріпость на западной окраині русской земли.


* * *

У мене скромне желание выказати участие лемков в писменности, церковной, світской и научной, в краткой сводкі писателей, ученых и журналистов. Но на сам перед хочу сказати пару слов о школах, образованию поза школы, печатных органах и библиотеках на Лемковщині.

Народны училища на лемковской Руси в средних віках истнували по селам при церквах и монастырях, як “парохиальны”, т. є. приходскы школы. Учителями в них были дьякы. Больше точны даны относятся лем до XVII столітия. И так в 1637 року была открыта школа в селі Поворозник, повіт Новый Санч, в котрой дьяк получал плату продуктами: 100 корцов овса на рок за учение дітей солтысов и панщизняных людей. Учили писати, читали, молитвы и церковного обряда. Подобных школ в так званой бискупщині, т. є. в селах и містах, якы належали до маєтков краковскых епископов, было дост много. Всі школы находилися под надзором духовенства.

В початку XIX столітия, за Австрии, замічатся уж организация школьного діла. Учили ліпше и дьякоучителям платили ліпше. Лемковщину розділено на школьны округы. Консистория в Перемышлі именувала деканов инспекторами, котры контролювали школы. Учителям платили мало: в 1836 року учитель в Грабі получал 250 флоренов рочно, а учитель такой самой школы в Радоцині всього 89 флоренов и 19 крейцаров на рок.

Потом были организованы “Школьны Рады” и місце дьякоучителей заступили народны учители с учительскым образованием.

Из сельскых народных школ священникы и богатшы газды посылали своих дітей до міст до школы, звычайно в гимназии. Но русской средной школы на цілой Лемковщині не было, так што лемкы мушены были ходити до польскых гимназий. Польскы гимназии были в Новом Санчі, Горлицах, Яслі, Коросні и Сянокі по польской стороні и в тых гимназиях училися тоты лемковскы діти, котрый родичов было стати послати дитину до міста в школы. Но спочатку много галицкых лемков ходило до гимназии в Пряшеві, по угорской стороні.

Така польска гимназия мала лем катехита, котрый преподавал лемкам религию на родном языкі и звычайно два-раз в неділю по одной годині галицко-русский, потом украинский язык.

Штобы дати своим дітям больше знания русского языка и русской истории — лемкы основували в тых окружных центрах “Русскы бурсы”, где ученикы мали квартиру и в свободных годинах училися русскых предметов.

Ученикы, котры покончили тоты польскы гимназии, поступали на университет. Спочатку майже всі шли на священников, но потом, коли украинский епископ не хотіл принимати “москвофилов” на богословие — лемкы поступали на другы факультеты.

Лемковщина, в поровнанию, выдала много писателей. Она мала своих стихотворцов (вершикаров), як Павел с Кросна, Федор Курилло, Модест Гумецкий, Антон Дошна, Константин Курилло, Теофил Качмарчик, Михаил Нестерак, Стефания Вербицка, Василий Дідович, М. Волошинович; своих журналистов, як Владимир Щавинский, Михаил Гнатышак, свящ. Роман Прислопский, свящ. Иосиф Федоронко, Григорий Гануляк, Д. Вислоцкий; своих бытописателей, як свящ. Владимир Хиляк, Николай Малиняк, Клавдия Алексович; своих историков, як Михаил Криницкий, Михаил Константинович; своих дослідников по истории церкви, из котрых епископ Юлиян Пелеш, митрополит Иосиф Сембратович и проф. д-р Тит Мышковский занимают передове місце; своих етнографов, як Дамьян Левицкий, Дмитрий Качор, а навет своих композиторов, як Петр Дуркот.


* * *

ПАВЕЛ С КРОСНА

— родился в другой половині XV столітия, умер в ноябрі 1517 року. Он знаный, як Paulus Crosnensis Ruthenus, або Paul de Crossna, або Paul de Russia. Назвы Ruthenus и de Russia означают, што Павел з роду был лемком. В 1500 року он получил степень бакаларя на Краковском университеті, а 6 літ позднійше — степень магистра. При конці 1508 року уіхал в Варадин, в Венгрии; потом знов вернулся в Краков, где продолжал свою профессорску роботу до 1517 року, и умер в том року на сердце. Павел с Кросна — поет ученый в латинской культурі; свои поезии почал писати приблизно с 1500 року, а в 1509 выдал их в Відню особным сборником, котрый посвятил якому-си Гавриилу Перемыі. Тоты поезии религийного и світского змісту носят на собі вплыв римскых поетов Горация и Овидия. Написал 2500 елегий и около 1500 разных вершов. Полякы причисляют го до своих поетов.


МИХАИЛ ВАСИЛЬЕВИЧ

зо Санока жил в XVI столітию и был в Санокі архипресвитером. В половині того самого віка перевел на галицке нарічие из церковно-славянского языка штыри евангелии. О нем упоминат Павел Иосиф Шафарик в свойом труді п. з. “Словански народопис”.


ИОАНН ПРИСЛОПСКИЙ

родился спочатком ХѴIII столітия в селі Камяной грибовского повіта, где його отец был священником; там и умер в половині того віка. Где-си около 1730—1735 роков списал: “ЛИТУРГИКОН св. Иоанна Златоустого” и “ИРМОЛОГИОН” и тоты обі книгы подарувал свойой церкви в Камяной; його власный труд “Пісни церковны на всі праздникы”. Из церковно-славянского языка он перевел на лемковске нарічие “ПСАЛТЫРЬ ДАВИДА”, и додал свои пояснения. Из польского языка перевел дві части "ЗЕРЦАЛА” и “Описание св. Патрикием мучений в чистилищі.” О рукописях Иоанна Прислапского упоминат также Иван Франко в “Карпаторуськом письменстві ХѴII—ХѴIII".


ТИМОФЕЙ ИЗ ВЫСОЧАН,

у Санока, жил в половині ХѴII віка, оставил написание “Евангелие учительное”, котре хранится в библиотекі “Народного Дома” во Львові.


ДАМЬЯН ЛЕВИЦКИЙ

жил в половині XVIII віка, родом из Новой Веси, повіт Новый Санч. Он составил “Сборник духовных пісней”. Меж його поезиями находится также “КАНТ” (ода) на Полтавску побіду по-велико-русскы.


СТЕФАН С РЫХВАЛДА

у Горлиц, жил в половині ХѴII столітия, написал: “Учительное евангелие” в 1666. Хранится в епископской библиотекі в Перемышлі.


ЙОСИФ ЯРИНА

родился в селі Радоцина Горлицкого повіта, в другой половині ХѴIII столітия. Был сыном місцевого священника. Гимназию кончил в Венгрии, а философию и богословие во Відню, где получил диплом доктора по тым двом предметам. Умер во Львові 15 сентября 1817 року, як профессор богословия. Ярина писал по латинскы и по німецкы.


ВЕНЕДИКТ МОХНАЦКИЙ

родился в Баниці Грибовского повіта, в конці XVII столітия. Кончил университет во Відню, як доктор медицины, написал медицинский труд, котрый был напечатаный в Відню в 1814 року.


МИХАИЛ КОНСТАНТИНОВИЧ

родился 21-го. . . . 1790 року в селі Жидовске Ясельского повіта, где його отец был священником. Кончил школы во Львові, помер 19-го сентября 1875 року на 85 року житя. Написал “Генеалогия рода Острожскых — Константиновичей", в котрой выпровадил свой род от тых князей.


МИХАИЛ КРЫНИЦКИЙ

— родился в 1797 року на Лемковщині. Был священником в Ганчові Горлицкого повіта, потом в місточкі Тылич, где умер в половині XIX ст. Коло церкви в Тыличі находится його могила с памятником до днеска. Крыницкий зберал материалы о сандецкых лемках, списувал акты зо судов и архивов. Коли польский профессор Варшавского университета выпровадил, што лемкы, то польскы осадникы, переселены с Польшы Казимиром Великым, Крыницкий доказал документами неправильность такой теории в свойом труді “Историческое состояние намістничества Мушинского.”


ОНУФРИЙ КРЫНИЦКИЙ

— родился в Кривой Горлицкого повіта, в 1793 року. Школы кончил в Яслі, в Пряшеві и богословие во Львові. Был неженатым священником и занялся дальшыми студиями, так што получил диплом доктора на Віденском университеті и был назначеный профессором истории церкви в Львовском университеті в 1816 року, и по два-раз был выбраный ректором и проректором университета и деканом и продеканом богословского факультета.


ВАСИЛИЙ ЧИРНЯНСКИЙ

— родился в селі Злоцком Новосандецкого повіта. Покончил два факультеты, философский и медицинский. Даякий час был лікаром в Крыниці, а с 1852 року преподавателем Академичной гимназии во Львові, потом был назначеный профессором университета. Написал пару трудов по німецкы.


ТОМА ПОЛЯНСКИЙ

— родился в 1796 року в селі Бортне Горлицкого повіта, был сыном священника. Высвятился безженным, занял по Григорию Яхимовичу епископский престол в Перемышлі в 1859 року. Умер в 1869 року. Писал по русскы и по польскы.


ФЕДОР КУРИЛЛО

— родился в 1818 в селі Высова Горлицкого повіта, мати Анна, роду Смерек. Кончил гимназию в Пряшеві, духовну семинарию в Перемышлі при епископі Снігурском. Федор Курилло писал по латини о церковных ділах.


ИВАН КОНСТАНТИНОВИЧ

— родился 1821 року в Кремпной Ясельского повіта. Отец його был священником. Покончил юридичный факультет во Львові, послі служил 40 літ в министерстві внутренных діл в Відні. Написал “Описание икон в церквах русскых в столичном граді Львові”. (Львов 1858 р.).


ЙОСИФ СЕМБРАТОВИЧ

— родился 8-го ноября 1821 року в Крыниці Но-сандецкого повіта, где його отец был священником. Гимназию кончил в Новом Санчі и Перемышлі. Высланый епископом Снігурскым до Відня, покончил там богословие и рукоположеный в священникы в безженстві. Через рок получил в Римі степень доктора и был назначеный префектом духовной семинарии во Львові и доцентом библейскых наук в университеті. В 1853 року переіхал до Відня и был там вицеректором русской духовной семинарии. В 1858 року был назначеный профессором в Львовском университеті. В 1870 року был поставленый митрополитом Галицкой Руси, архиепископом Львовскым и членом Галицкого сойма и Австрийской палаты панов. Послі процесса Ольгы Грабар, о. Иван Наумовича и др. в 1882 року цисар Франц Йосиф приказал му отказатися от митрополичого престола; його місце занял його родняк Сильвестер Сембратович, кандидат Відня. Йосиф Сембратович уіхал в Рим, где як изгнанник доживал свои дни. Умер на выгнанию в 1896 року, оставляючи по собі память великого патриота, стоячого на стражі восточного обряда.


ЕМИЛЬЯН ЧИРНЯНСКИЙ

— родился в 1824 року в селі Флоринка Грибовского повіта. Был сыном священника. Покончивши физико-математичный факультет и получивши степень доктора тых предметов, был призваный як доцент химии в Краковский университет, где до смерти (1888) трудился по свойой специальности. Свои труды писал по польскы и они видавалися в Кракові. О ньом, як о ученом писали много польскы газеты.


ИВАН ПЕТРОВИЧ ПРИСЛОПСКИЙ

— внук спомянутого Иоанна Прислопского, родился в Камяной Грибовского повіта, в 1831 року. Он написал труд п. з. “Сандецкая Русь” (Львов, 1893, издание О. А. Маркова, тип. Ставропигийского Институт).


АЛЕКСЕИ ТОРОНСКИЙ

— родился 1838 року, в селі Завадка Сяноцкого повіта, умер в 1901 року. Был сыном священника и сам был священником и катехитом при гимназии в Дрогобычі, а потом при академичной гимназии во Львові. Список його трудов: “Русины-Лемкы” в “Зорі Галицкой, як альбум” (Львов, 1860); “Ганця”, повість зо житя подбескидского народа; “Русска читанка для высшой гимназии” (Львов, 1868); “Руководство до наукы малого катехизму”, “Лужицко-сербский народ”; “Споры о прапись у Русинов и Румунов” и много другых трудов церковно-религийных.


МОДЕСТ ГУМЕЦКИЙ

— родился в 1842 року в селі Токарня Сяноцкого повіта, был сыном священника, учился в Кросні и Ряшеві. Послі окончания гимназии пошол на богословский факультет, но скоро перешол на медицину в Кракові, потом в Відню, где покончил университет в 1871 року, як доктор медицины. Як студент был предсідателем русского студент. общества “Основа”.

Як лікар, Гумецкий працувал в Ліску, Добромилі и 25 літ в Кросні, где был навет выбраный бурмистром. Помер в 1890 р.

Модест Иванович Гумецкий писал по русски, польскы и німецкы, вершами и прозом; його труды печаталися в галицко-русскых изданиях. Биография М. И. Гумецкого напечатана в календарі о-ва им. М. Качковского на рок 1901.


ЕП. ЮЛИАН ПЕЛЕШ

— родился в 1843 в селі Бортне Горлицкого повіта. Його отец Григорий был дьяко-учителем. Народну школу Юлиан покончил в Яслі, гимназию в Пряшеві и Перемышлі. Покончивши с отличием богословие в Відні, в 1867 року был рукоположеный в священникы перемышльскым епископом Фомом Полянскым. В том самом року был назначеный префектом русской семинарии в Відні, где в 1870 року получил докторат богословия. Послі того он переіхал во Львов, где занял місце префекта духовной семинарии и профессора богословского факультета при Львовском университеті. В 1872 перенесеный в Перемышль, где Стал референтом Консистории и членом комиссии для составления школьных учебников.

В 1874 року Юлиан Пелеш знов во Відні настоятелем прихода св. Варвары и префектом русской духовной семинарии. Даякий час был учителем австрийского престолонаслідника архикнязя Рудольфа.

В 1885 року Пелеш был назначеный первым епископом новой греко-католицкой епархии в Станиславові. Як епископ, был членом крайового сойма.

Пелеш написал много учебников религии, як и трудов по истории церкви, так по русскы як по німецкы. Звернули на него увагу богословы другых крайов. Німецкы богословы запросили го за сотрудника німецкого богословского лексикона во Фрейбургі.


ВЛАДИМИР ХИЛЯК

— родился в 1843 року в селі Верхомлі Великой Ново-сандецкого повіта. Школы кончил в Новом Санчі и Пряшеві, богословие в Перемышлі, высвященный был в 1866 року. Выполнял душпастырскы обовязкы в Долинах, в Избах, и Бортном на Лемковщині, и в Литыні коло Дрогобыча, где и умер в 1893 року.

Владимир Хиляк писал много, и он был знаный як писатель не лем в Галичині, но и в России. Подписувался псевдонимами (прибраными именами), як “В. Нелях”, “Я сам”, “Лемко-Семко”, “Іероним Аноним” або грецкыми буквами. Писал повісти, с котрых ліпшы: “Польский патриот”, “Влечение сердец”, “Супружество и факультеты”, “Шубеничный верх”, “Послідня чарка”, “Счастье не в грошах”, “Не только жену, но и тещу выбирай”, и много другых.

Дакотры повісти и новеллы Хиляка печаталися в России, в журналах: “Славянский мир”, “Русский Вѣстник”, “Иллюстрованный мир”, “Орловский Вѣстник”. Його творы были изданы “Академичным Кружком” во Львові. О творах Хиляка писал русский критик акад. А. Н. Пыпин.

ФРАНЦ ЛЕВИНСКИЙ

— рожденный в селі Ольховцы Кроснянского повіта, написал на великорусском языкі дуже интересный труд п. з. “Воздухоплавание” с рисунками (1895). Левинский был судьом в Дуклі.


ВАСИЛИЙ ЧЕРНЕЦКИЙ

из Воли Цеклинской Ясельского повіта написал “Згадки с 1846 рока”, в котрых Чернецкий, як очевидец, описал різню польской шляхты польскыми селянами на челі зо знаним Шельом. Воля Цеклинска узброилася под водительством дьяка Пеляка.


ВЛАДИМИР ЩАВИНСКИЙ

— родился в 1853 в Климковкі Горлицкого повіта, отец його был священником. Послі окончания гимназии записался на медицинский факультет в Відні, но не покончил го. Всі способности посвятил журналистикі. Он дуже любил свою Лемковщину, часто приізжал в Королеву Русску до свящ. Русиняка. Выізжаючи з Лемковщины послідний раз, взял зо собом грудку земли, котру просил вложити в свой гроб. Помер в Відні в 1913 року. До самой смерти не перестал писати.

Владимир Щавинский был сотрудником-корреспондентом головных галицко-русскых газет: “Галичанина”, “Червоной Руси" и “Прикарпатской Руси”, и Петроградского “Нового Времени”. Свои статьи подписувал псевдонимом “во” (от первых букв имени и отчества, Владимир Осипович). Кромі статей в газетах, написал “Самоучитель німецкого языка”, “Крещение Руси”, “Туга за родным селом”, “По сіверной Италии”, и т.д.


НИКОЛАЙ МАЛИНЯК

— родился в 1851 року в селі Камяна Грибовского повіта, был сыном селянина тесли. Завдякы помочи митрополита Йосифа Сембратовича, он кончил гимназию в Новом Санчі, богословие в Римі, где в 1875 року получил докторат богословия и философии; в слідуючом року был рукоположеный в священникы. Был за короткий час сотрудником в Вороблику, а потом 4 рокы адъюнктом богословского факультета во Львові и префектом гр. кат. духовной семинарии. Потом знов пошол на села, як сельский священник и был парохом в Вороблику, Новиці, Кристинополі, Злоцком, Крыниці, Шляхтові и в Сливниці коло Перемышля. За свои русскы переконания был арестуваный німцами спочатком войны 1914 року и умер от тифа в Талергофі.

Малиняк писал под псевдонимом Н. Д. Камянин. Писал вершом и прозом. В своих “Зернах”, описуючи своє житя, описує лемковскы села. “Записки Римлянина” появилися в “Русском Сионі” 1880 р. “Церков и держава” в “Церковном Вістникі”. В 1885 Малиняк помістил во французском церковном журналі ряд статей о нашых церковных ділах. Был также постоянным сотрудником церковного журнала в Инсбрукі.


ТИТ МЫШКОВСКИЙ

— родился в 1861 року в Перегримкі Ясельского повіта. Был сыном священника. Гимназию кончил в Перемышлі, богословие в Відню, получил степень доктора богословия. С 1889 року был префектом гр. кат. духовной семинарии во Львові. В 1894 року он был назначеный профессором семинарии в Перемышлі, но намістник Галичины Казимир Бадени спротивился тому назначению. Бадени виділ в Мышковском завзятого руссофила, так што он был скиненый и с префекта львовской семинарии и назначеный регистратором. Только в 1903 року был именованый профессором библейских наук и ориентальных языков в Львовском університеті.

Спочатком войны 1914 был интернованый. В 1916 року на основі рекламации университета вернулся во Львов, мимо протеста головного “украинского комитета” во Відню. Был усуненый из университета послі войны, бо не хотіли сложити присягы польскому правительству. Потом был назначеный профессором львовской гр. кат. семинарии.

Проф. Мышковский написал много религийных трудов по латини и по русскы.



[BACK]