КОЛО ЦЕРКВИ В КРАЮ

— Чом днеска не отправляют в церкви?

— Німцы батюшку арештували.

— За што?

” — Кажут, што баба Матрона молебен замовила. А внукы ей в партизанах.



PoliCartoon040

Остаток, гитлеровской німецкой армии, яка выбралася на завоювание русскых земель.


НЕ ОТКЛАДАТ НА ЗАВТРА. . .

Два німецкы солдаты бесідуют коло окопу:

— Нашто ты выкопал собі могилу, Фрице? Таж русскы ище далеко.

— У мене правило, Гансе: николи не откладай на завтра тото, што мож зробити днеска...



“ЛУЧШЕ БУЛО-Б НЕ ХОДИТИ. . .”

1. НІМКА: Ногы Фрица Швайнкопфа николи не будут в нашом домі.

2. НІМКА: А што, он тебе образил?

1. НІМКА: Ніт, йому оторвало обі ногы на русском фронті.


Дмитро Білоус.


ВСЕ ОДНО

Фриц уже про нагороду
Думать зовсім перестав:
Все одно хоц з мосту в воду —
Ци с крестом ци без креста.

Дмитро Білоус.


PoliCartoon060

И чом я пробовал той пипкы?


ДЛЯ КАЖДОГО СВОЄ

Прислали німецкому майору пуцера, а он показался дурньом над дурнями. Розсердился майор и звідує:

— Чом тебе, такого осла, до мене прислали? Та ци там не нашлося розумнійшого?

А пуцер отповідат:

— Та што я винен, пан майор? Розумнійшых послали до розумных, а мене уж до вас.



ЩИРА БЕСІДА

— Друже мой, Гансе! Што бы ты хотіл ище видіти до закончения войны?

— Моя найбольша мечта — увидіти фюрера повішеным на конарі, вот ту, на полібитвы. Тогды, нарешті, можна бы было закончит тоту блискавичну войну. . .



ОТ ДОЛІ НЕ ВТЕЧЕШ

Комендант одного прикарпатского міста, який-си фон-барон, был дуже забобонный німец. Каждого рана, встаючи, он ревно дякувал Богу за божы турботы о його баронске житя.

Іхал одного разу комендант до Львова, тай мосток под ним завалился, и шубнул барон в воду. Добри, што пуцер його мог плавати и выратувал фон-барона от загибели. На том місці, где го вытягли з річкы, он наказал поставити великий крест с надписом:

“Бог барона от смерти избавил.
Барон Богу крест поставил.”
А люде місцевы на кресті дописали:
“Не бойся, дурный бароне,
Кто має висіти, тот не втоне.”


ПОЗНАЛ ГЕНЕРАЛА

Перед отправом на фронт німецкой тотальной дивизии был назначеный генеральский огляд. Почали фельдфеблі своих солдатов муштрувати, як генерала познати и як з ним розмавляти.

— Запамятайте, ничгоды, — кричат они, — што у генерала лице благородне, на вашы высмоктаны биты морды не подобие. Отповідати му коротко и чисту правду, бо он брехню не любит.

Почался огляд. Приіхал генерал, а у него ціла гамба в перевязках. Подходит генерал до правофлангового и звідує:

— Ано, скаж мі, кто я такий?

— Генерал.

— Як ты познал, што я генерал? Лем коротко и по правді.

А фельдфебель, непомітно тыкат пальцом на свою пику, реку, гвар, што по благородному лицу. А солдат выпалил:

— По битой морді, ваша ясность!



PoliCartoon076


УРОЖАЙНА ЗЕМЛЯ

— Я слышал, што украинска земля найурожайнійша в світі.

— То правда.

— А што там родится найліпше?

— Та як вам сказати. Одним здаєся, што на Украйні земля найліпше родит партизанов, другы кажут, што найшвидше там ростут кресты на німецкых могилах. Што до мене, то я думам, што єдно и друге родится в ровной пропорции.



ТУПЫЙ СОЛДАТ

— Солдат Шульц, як найти стороны світа?

— Коли стати лицом на восток.

— Чом на восток? Дурню!

— Том, што восток и глядати не треба — где Красна Армия там и восток, а остальны стороны глядати не хочу — всяди партизаны.



НЕПОРОЗУМІЛИСЯ

— Фриц, хочеш, я тобі што-си интересне скажу?

— Слухам.

— Мы побідиме!

— Кто так повідал?

— Фюрер.

— А я думал, што ты серьозно. . .



PoliCartoon082

Так принял німца Дон.


НА КИЄВЩИНІ

НІМЕЦКИЙ КОМЕНДАНТ до селянина: — Иване, як то розуміти: “Настрашеный мішком и торбы боится.”

ИВАН: — Та вот, приміром, под Сталинградом армия фельдмаршала Паулюса попала в мішок. . . А коли бы даяка компания красноармейцов оточила дашто меньше, возмеме, напримір, наше село, то буде. . .

НІМЕЦКИ КОМЕНДАНТ (озератся): — Ну-ну! Ты у мене договоришся до шибеницы!



PoliCartoon085

Так приняла німцов Волга.


ЧОГО ЖАЛЬ

Німецкому фрейтру под Тростянцом гранатом оторвало ногы. Коли німец нашолся в совітском госпиталі, то почал сковуліти. Лікар звідує:

— Чого ты плачеш? Мы тобі ище красшы ногы приправиме, на шарнирах.

— Та ногы, біс их взял — отповіл ефрейтор. — Чоботы жаль!

Санитар, який доставил ефрейтора, покрутил головом:

— Вот дурень, чым ся смутит. Ліпше бы подумал, где золі достати: його чоботы уж давно кашы просят.



PoliCartoon088

Русска офензива.


В ОСВОБОЖДЕННОМ СЕЛІ

Дідо копат студню. Разом з выкиненом з ямы земльом валятся німецка каска, німецкы черепы и кости. Проходит дівчинка з ведром. Звідує:

— Ну як, діду, скоро студня буде?

— Зле, дочко, — отповідат дідо, — уж в седмом місці починам копати и мушу кидати. Где лем не штуркнеш лопатом — всяди тота падлина похована.



PoliCartoon091

Гитлерова стратегия.


ДОБЫЛ ЗЕМЛЮ

Догодил один німецкий поміщик Гитлеру. И постановил фюрер нагородити го. Призвал ку собі и гварит:

— Подарую я тобі землю на Украйні. Сідай на машину и ід. Сколько объідеш за день, столько твойой земли.

Прибыл поміщик на Украину. Сіл на авто и давай гнати, што силы, покаль не наскочил на партизанску мину. Рознесло машину на тріскы, а німца выкинуло гет. Зорвался он на ровны ногы и давай біжати, што духу. Покаль біг, покаль біг, а дальше задыхался, закашлялся, упал и лізе на рачках. Нарешті люг, рукы ростяг, прохрапіл:

— Аж дотля земля моя! — и здох.



ГЕРИНГ

— Чом Геринг тлустійший от свині?

— Бо свиня іст ерзац-кормы, а Геринг натуральну свинину.



НІМЦЫ В ПЕКЛІ

Иде старый дідо дорогом, а навстрічу йому німецкы офицеры ідут.

— А откаль ты, старичок? — звідуют го офицеры.

— С тамтого світа, — отповідат старый.

— А што там нашы німцы робят?

— А што-ж, паны добродій. Німцам всяди добри: в котлах сидят, гріются, а бідный мужик дрова рубат и под ними палит.



ШТО РОБИТИ С ГИТЛЕРОМ

Школьна рада в стейті Огайо предложила ученикам нагороду за написание заданы на тему “Што зробити с Гитлером”. Одна ученица негритянка написала:

“Натягнути на Гитлера чорну кожу и скинути го в Соєдиненных Штатах на ціле житя."

Она получила нагороду.



РІШИЛИ ЗА НЕГО

— Куцы мі летіти, — роздумувал німецкий летчик, стоячи коло свого самолета, — ци на восток, ци на запад?

В тот час на фашистский аеродром налетіли совітскы самолеты и скинули бомбы. Голова німецкого летчика, разом с фюзеляжом самолета, полетіла на восток, а ногы разом с крылами на запад.



НЕПРЕДВИДЖЕНА ЛЮБОВ

Послал румынский офицер свого пуцера зарізати курку. Тот крутился, крутился, а потом вошол и рапортує:

— Різати єй не можу.

— Як так? Дораз зарізати и засмажити!

— Не мож єй різати, милостивый пане, бо до ней когут німецкого коменданта залицатся.



НЕРВОВЫЙ ЧОЛОВІК

Партизаны поймали німецкого ката и рішили го повісити. Почувши вырок, кат затремтіл.

— Чого ты, стерво, трясешся? — звідал партизан.

— Я нервовый чоловік, — отповіл кат.



PoliCartoon113


[BACK]