Америка в войні

Коли пишеме тоты строчки, американскы и союзны войска, под командованием американского генерала, Д. Д. Айзенгауера, находятся на территории головного и найсильнійшого агрессора в другой світовой войні — гитлеровской Германии.

По другой стороні кули земской, нашы войска, под командованием генерала Д. Мекартура вернулися на Филиппинскы островы, а амерканский флот розгромил часть японского флота, який был высланый обороняти Филиппины.

AmericaWarIke
Генерал Д. Д. Айзенгауер

Так што побіда в той найтяжшой для американской державы, в той другой світовой войні певна и уж недалека.

То єст найтяжша война из всіх войн, якы вели Соєдинены Штаты против своих неприятелей, бо и тоты неприятели найсильнійшы, якых мала даколи Америка. Но мы видиме коло себе, в свойом каждоденном житю, што тота война не приходит нашому народу так тяжко, як она приходит тяжко другым народам, нашым союзникам. В союзных державах, в Совітском Союзі и Великобритании, як и в меньшых европейскых державах, а в Азии в Китаю фашистска войнна зруйновала край, опустошила великы обшары земель, знищила тысячи городов и сел и миллионы цивильного населения. Мы ту в Америкі, правду сказати, не знаме жестокостей фашистской войны, нашы городы и домы цілы, мы не ходиме голодны, всі зарабляме, и, як выходит из официальной статистикы нашых страт на фронті, певна и цілковита наша побіда не приходит нам так дорого в житю нашого молодого поколіния, як приходит дорого нашым союзникам.

Чому мы завдячаме, што тота найтяжша в истории Соєдиненных Штатов война не приходит нам так тяжко? Мы завдячаме то:

  1. нашому географичному положению,
  2. нашой индустриальной и економичной силі,
  3. нашым союзникам, котры взяли на себе головны удары головных сил самого сильного фашистского агрессора — гитлеровской Германии и єй европейскых союзников, вычерпали и розгромили их головны силы и дали нам час приготовитися и вооружитися.

Наша краина отділена от держав агрессоров с одной стороны Атлантичным океаном, а с другой Тихым океаном. Штобы Германия змогла напасти на Америку, то єй насамперед треба было захватити на дорогі Британскы островы, Великобританию и обеспечити собі тыл через побіду над Совітскым Союзом. Япония могла достатися на Американский континент лем тогды, коли, через побіжденный гитлеровском Германном Совітский Союз она змогла бы объєдинитися с німецком силом для такого наізду на Американский континент из запада.

Но с побідом гитлеровской Германии над Великобританиом и Совітскым Союзом, в Америкі напевно пришли бы до власти приятели гитлеровской Германии и Японии, котры привели бы Америку до капитуляцийного мира. Потому то так были важны для нас побіды Совітского Союза над гитлеровском Германном и оборона Англии. Потому мы завдячаме нетяжку побіду при малых людскых стратах в великой мірі нашым союзникам — Совітскому Союзу и Великобритании, их героичным народам и другым народам Европы, якы своим опором зломили силу гитлеровскрй Германии.

Потому то мы помагали нашым союзникам оружием и воєнным еквипунком, без чого им была бы тота война ище далеко тяжша, а тым самым она была бы тяжша и для нас, мы мали бы миллионы німцов больше до зцищения, мы мали бы далеко большы страты в людях, и война затяглася бы місяцами, а може роками дольше.

В том єст головна роль нашой индустрии в той войні. Наша индустрия не лем дала перворядне оружие нашой армии и флоту, створила огромный воздушный флот, но змогла помочи оружием нашым союзникам, котры, при помочи нашого оружия знищили много той німецкой силы, котра мала стояти днеска против нашой армии в Европі.

В другой світовой войні мали місце два чуда:

Русске чудо и американске чудо.

Русске чудо, то розгром німецкой воєнной машины в России. Русске чудо, то Красна Армия — єй вооружение, организация, руководство. Як знаме, до войны мало людей вірило в русске чудо.

Американске чудо, то американска индустрия, котра быстро перетворилася из мирной в воєнну и выпустила уж в воєнном часі понад 200 тысяч воєнных аеропланов, соткы тысяч танков и другых воєнных машин, тысячы воєнных кораблей и десяткы тысяч транспортных.

Тото американске чудо — Америка и єй союзникы завдячают мудрому американскому державному руководству с Президентом на челі, досвідченому индустриальному руководству и досвідченой и патриотичной американской робочой массі.

Вот и мы, карпаторусскы емигранты и наше поколіние ту в Америкі причинилися до того великого американского чуда. Нашы люде працуют головно в копольнях угля и в тяжкой желізной индустрии, то єст в тых двох индустриях, котры являются основом воєнной индустрии. Без угля, желіза, стали — не може быти воєнной индустрии, а тым меньше индустриального чуда, яке показала Америка в той другой світовой войні, чуда, якому мы будеме завдячати тоту певну и нетяжку побіду в найтяжшой войні, яку знала история.

Наша карпаторусска емиграция дала Америкі, єй индустрии твердых робочых в найтяжшой индустрии, и твердых воинов в найтяжшой войні. Наше поколінне ту в Америкі не лем што не уступит в службі в Американской Армии, Морском и Воздушном Флотах другым, но нашы тверды и отважны хлопцы отзначаются на фронті.

До войны коло нашой газеты и того календаря в нашой типографии робили три хлопцы, а днеска они, два сержантами в Американской Армии, а третый стафсержантом механиком в Воздушном Флоті. Много нашых людей, карпаторусскых емигрантов, мают по трьох, штырох и пятьох сынов на войні. Коли пишеме тоты строчкы, то як раз пришло писмо с фармы, из Барнесборо, Па., от нашой читателькы, Анны Зрьовка, в котром находиме вырізок с английской американской газеты. Тота наша краянка має штырьох сынов в армии, меж ними двох сержантов и один корпорал. Так в том вырізку из американской газеты читаме, што один из тых штырьох сынов, сержант Ваньо Зрьовка, артиллерист Третой дивизии взял сам 30 німцов в плін.

Подобными чинами своих дітей можут похвалитися многы нашы краяне — отцы и матери, емигранты с Карпат.

Из оповідань нашых молодых воєнных людей мы довідуемеся, што американцы дуже высоко цінят их воєнны способности, тым больше, што нашы діти в Америкі отдідичили русске имя по своих родичах с краю для означения свого национального происхождения, и коли американцы довідаются о их русской народности, то их респектуют, як людей с того народа, котрый розгромил німецку воєнну машину.

Но най никто не думат, што в Американской Армии ніт офицеров нашого роду. Мы знаме многых офицеров, докторов, старшых воєнных норскых нашого карпаторусского роду.

Як в попередных нашых воєнных календарях, так и в календарі на 1945 рок поміщаме фотографии гдекотрых молодых воєнных людей нашого роду, сынов членов нашой организации и читателей календаря и газеты.

Мы не можеме хвалитися, як хвалятся польскы паны, што каждый десятый американский воин — польского роду. По тому польско-панскому рахунку выходило бы, што поляков в Америкі найменьше 13 миллионов на 135 миллионов населения Соєдиненных Штатов. Но они сами рахуют, што их лем 6 миллионов, с чого выходит, што они рахуют, што полякы больше як два и пол разы ліпшы от другых американцов, бо больше як два разы больше выдают Солдатов от другых. Но американска статистика говорит, што поляков в Соєдиненных Штатах около двох миллионов. Можете собі представити, до чого договорилися польскы паны, коли твердят, што каждый десятый американский солдат — поляк, бо выходит, што найменьше каждый другий поляк и полька в Америкі — в армии. . .

Мы, ліпше, не наслідуйме польскых панов, а говорме правду, и то ліпше сказати меньше, як больше:

Нашого народа с Карпат — т. є. с Подкарпатской Руси, с Пряшевщины и галицкой Левковщины с первым поколінием понад пол миллиона. Так што молодых людей карпаторусского роду в вооруженных силах Соєдиненных Штатов буде даяка 270-а часть, то буде всього около 43 тысяч.

Но тоты нашы 43 тысяч людей нашого твердого роду и мы николи не заганьбимеся за них. Они такы самы, як их отцы в американской тяжкой индустрии — тверды, загартуваны и отважны. Мы можеме быти певны, што они не уступают другым — на суші, на воді и в воздухі, што они не крыются за другых, а идут сміло вперед против фашистов, штобы причинитися ділом до спольной побіды над найбольшым врагом Америкы и людства.



[BACK]